រថយន្តម៉ាក TRAILER បានបោះពួយក្នុងល្បឿនយ៉ាងលឿន ហើយក៏ជ្រុលទៅបុកសត្វក្របីដែលកំពុងរត់ឆ្លងផ្លូវ បណ្តាលឱ្យក្របីងា.ប់ភ្លាមៗ បន្ទាប់មករថយន្តនោះក៏រ៉េចង្កូតទៅបុករថយន្តសណ្តោងរ៉ឺម៉កទៀត បណ្តាលឱ្យឆាបឆេះយ៉ាងសន្ធោសន្ធៅ ធ្វើឱ្យរបួសមនុស្ស
ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា រថយន្តម៉ាក TRAILER បានបោះពួយក្នុងល្បឿនយ៉ាងលឿន ហើយក៏ជ្រុលទៅបុកសត្វក្របីដែលកំពុងរត់ឆ្លងផ្លូវ បណ្តាលឱ្យក្របីងា.ប់ភ្លាមៗ បន្ទាប់មករថយន្តនោះក៏រ៉េចង្កូតទៅបុករថយន្តសណ្តោងរ៉ឺម៉កទៀត បណ្តាលឱ្យឆាបឆេះយ៉ាងសន្ធោសន្ធៅ ធ្វើឱ្យរបួសមនុស្សចំនួន២នាក់បង្កឱ្យមានការភ្ញាក់ផ្អើលដល់សមត្ថកិច្ច និងប្រជាពលរដ្ឋទាំងយប់។
សេចក្តីរាយការណ៍បន្តថា ហេតុការណ៍ខាងលើនេះ បានកើតឡើងនៅវេលាម៉ោង០០និង៥០នាទីរំលងអធ្រាត្រឈានចូលថ្ងៃទី២២ ខែកក្កដា ឆ្នាំ២០២១ នៅលើផ្លូវជាតិលេខ៦ ត្រង់ចំណុចបង្គោលគីឡូម៉ែត្រលេខ៣៣០, ៣៣១ ស្ថិតក្នុងភូមិគោកថ្មី ឃុំពួក ស្រុកពក ខេត្តសៀមរាប។
បើតាមលោកវរសេនីយ៍ឯក ទេព ពុំសែន អធិការនគរបាលស្រុកពួក បានឱ្យដឹងនៅរសៀលថ្ងៃទី២២ ខែកក្កដា ឆ្នាំ២០២១នេះថា មុនពេលកើតហេតុ មានរថយន្តម៉ាក TRAILER ពណ៌ស ពាក់ស្លាកលេខកំពង់ចាម 3A.8132 ហើយមានសណ្តោងស៊ឺមីរ៉ឺម៉ក ពាក់ផ្លាកលេខ ភ.ព4A.8127មួយគ្រឿង បើកបរដោយឈ្មោះ អាំ ធារី ភេទប្រុស អាយុ៣២ឆ្នាំ រស់នៅភូមិព្រៃចម្លាក់ ឃុំកញ្ជូ ស្រុកឈ្លូង ខេត្តក្រចេះ និងមានអ្នករួមដំណើរម្នាក់ទៀតជាប្អូនបង្កើតឈ្មោះ អាំ ដារី ភេទប្រុស អាយុ២៥ឆ្នាំ នៅភូមិ-ឃុំជាមួយគ្នា ហើយបានធ្វើដំណើរពីកើតទៅលិច ។
លោកអធិការនគរបាលស្រុកពួក បានបន្តថា លុះមកដល់ចំណុចកើតហេតុ រថយន្តនោះក៏បានបុកជាមួយសត្វក្របីដែលកំពុងតែរត់ឆ្លងផ្លូវពីត្បូងទៅជើងធ្វើឱ្យសត្វក្របីនោះងា.ប់ភ្លាមៗតែម្តង ហើយរថយន្តបង្កក៏បន្តរ៉េចង្កូតទៅបុករថយន្តមួយទៀតម៉ាកហ៊ីយ៉ាន់ដាយ ពាក់ស្លាកលេខកំពង់ចាម 3B.0773 សណ្តោងស៊ឺមីរ៉ឺម៉កពាក់ផ្លាកលេខ ភ្នំពេញ ប4.A.29.47 ពណ៌ខៀវ ដែលបើកពីលិចទៅកើត ចំណែកអ្នកបើកបរមិនស្គាល់អត្តសញ្ញាណនោះទេ ព្រោះបានចុះគេចខ្លួនបាត់។ ក្រោយពេលរថយន្តទាំង២គ្រឿងនេះ បុកគ្នាហើយ បណ្តាលឱ្យឆាបឆេះយ៉ាងសន្ធោសន្ធៅនៅកណ្តាលផ្លូវតែម្តង។
លោកអធិការបន្តថា ករណីខាងលើនេះ បានបណ្តាលឱ្យរបួសមនុស្សចំនួន២នាក់បងប្អូនបង្កើត គឺ១-ឈ្មោះ អាំ ធារី និង២-ឈ្មោះ អាំ ដារី ។ ហើយក្រោយពេលកើតហេតុ ជនរងគ្រោះទាំង២នាក់ត្រូវបានដឹកយកទៅសង្គ្រោះនៅមន្ទីរពេទ្យបង្អែកស្រុកពួកផងដែរ។
លោកបញ្ជាក់ថា ពាក់ព័ន្ធនឹងករណីឆេះរថយន្តខាងលើនេះផងដែរ បានធ្វើឱ្យខូចខាតថយន្តទាំង២គ្រឿងយ៉ាងធ្ងន់ធ្ងរ និងងា.ប់ក្របីញី១ក្បាលទៀតផង។ លោកបញ្ជាក់ទៀតថា ចំពោះមូលហេតុ គឺដោយសារតែសត្វក្របីរត់ឆ្លងផ្លូវ ហើយអ្នកបើកបររថយន្ត TRAILER វិញ បានបើកបរក្នុងល្បឿនយ៉ាងលឿន ដោយខ្វះការប្រុងប្រយ័ត្ន ។ ហើយក្នុងពេលកំពុងកើតហេតុនោះ រថយន្តពន្លត់អគ្គិភ័យស្រុក១គ្រឿង និងរថយន្តពន្លត់អគ្គិភ័យរបស់ស្នងការដ្ឋានខេត្តមួយគ្រឿង បានចេញជួយអន្តរាគន៍ប្រើប្រាស់ទឹកអស់៣ឡាន ទើបរលត់ទាំងស្រុងនៅម៉ោង២និង៣០នាទីយប់កណ្តាលអធ្រាត្រឈានចូលថ្ងៃទី២២ខែកក្កដានេះ។
បច្ចុប្បន្ន រថយន្តឆេះទាំង២គ្រឿងខាងលើ ត្រូវបានកម្លាំងនគរបាលជំនាញ អូសយកទៅរក្សាទុកនៅអធិការដ្ឋានស្រុកពួក ដើម្បីចាត់ការបន្តតាមផ្លូវច្បាប់។ ចំណែកអ្នករបួសទាំង២នាក់ ក៏បានដឹកយកទៅសង្គ្រោះនៅមន្ទីរពេទ្យបង្អែកស្រុកពួកផងដែរ៕
ចែករំលែកព័តមាននេះ