ខេត្តកំពង់ឆ្នាំង ៖ មន្ត្រីនៃមន្ទីរសុខាភិបាលខេត្តកំពង់ឆ្នាំង នៅព្រឹកថ្ងៃទី២២ កក្កដា នេះ បានបន្តចុះសំណាកលើអាជីវករផ្សារលើ ជាលើកទី២បន្តទៀត ដែលជាលទ្ធផលលើតេស្តរហ័ស ក្នុងចំណោមអាជីវករ២៤៨នាក់រកឃើញវិជ្ជមានកូវីត១៩ចំនួន១១នាក់…
ខេត្តកំពង់ឆ្នាំង ៖ មន្ត្រីនៃមន្ទីរសុខាភិបាលខេត្តកំពង់ឆ្នាំង នៅព្រឹកថ្ងៃទី២២ កក្កដា នេះ បានបន្តចុះសំណាកលើអាជីវករផ្សារលើ ជាលើកទី២បន្តទៀត ដែលជាលទ្ធផលលើតេស្តរហ័ស ក្នុងចំណោមអាជីវករ២៤៨នាក់រកឃើញវិជ្ជមានកូវីត១៩ចំនួន១១នាក់ បន្ថែមទៀត ។ ជាមួយគ្នានេះ រដ្ឋបាលសាលាខេត្តកំពង់ឆ្នាំងនៅព្រឹកថ្ងៃដដែលនេះ ក៏បានចេញសេចក្តីប្រកាសព័ត៌មានស្ដីពីការរកឃើញអ្នកឆ្លងកូវីដថ្មីចំនួន៤៦នាក់បន្ថែមទៀត លើតេស្តរហ័ស កាលពីថ្ងៃទី២១ ខែកក្កដា ម្សិលមិញនេះ ។ ចំនួនតួលេខដ៍ច្រើន គួរព្រួយបារម្ភបែបនេះ ប្រធានមន្ទីរសុខាភិបាលខេត្ត នៅតែបន្តទាមទារ ឲ្យប្រជាពលរដ្ឋចូលរួមប្រុងប្រយ័ត្នទាំងអស់ គ្នា ដោយត្រូវបន្តអនុវត្ត ៣ កុំ ៣ ការពារ ។
លោក ងិន សារ៉េត ប្រធានការិយាល័យសុខាភិបាល ស្រុកប្រតិបត្តិកំពង់ឆ្នាំងបានឲ្យដឹងថា រយៈពេលមួយព្រឹកថ្ងៃទី២២ ខែកក្កដា នេះ យើងបានយកសំណាកជាលើកទី២ លើអាជីវករចំនួន២៤៨នាក់ ហើយបានរកឃើញវិជ្ជមាន១១នាក់ ។ ការយកសំណាកលើអាជីវករលើកទី២នេះ គឺក្នុងគោលបំណងពេលបើកឱ្យដំណើរការផ្សារឡើងវិញ ប្រកបដោយសុវត្ថិភាព ប៉ុន្តែបន្ទាប់ពីទទួលលទ្ធផលវិជ្ជមានលើអាជីវករ ១១នាក់និង ការរកឃើញជាបន្តបន្ទាប់មានចំនួនច្រើននាក់បែបនេះមិនដឹងថា៖ អាចឱ្យដំណើរការបានវិញដែរឬទេ។
ដោយឡែក យោងតាមសេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំងដែលចេញនៅថ្ងៃទី២២នេះ បញ្ជាក់ថា៖ បានរកឃើញវិជ្ជមានCovid ១៩ ចំនួន៤៦ (ស្រី២៧នាក់) អ្នកទាំងនោះមាន ជាអាជីវករ មន្ត្រីរាជការ គ្រូបង្រៀន អ្នកអ៊ុតសក់ និងបុគ្គលិកអង្គការ ដែលពួកគាត់ទាំងនោះ មាននៅ ក្នុងក្រុងកំពង់ឆ្នាំង ១៣នាក់, ស្រុកកំពង់លែង ១នាក់, ស្រុកជលគីរី ៨នាក់, ស្រុកទឹកផុស១៧នាក់ និងស្រុករលាប្អៀរ៨នាក់ ។
អ្នកវិជ្ជមានកូវីដ១៩ទាំងនោះបានយកទៅដាក់ឲ្យសម្រាកព្យាបាលនៅមន្ទីរពេទ្យខេត្តកំពង់ឆ្នាំង ,មណ្ឌលព្យាបាលសាលាបឋមសិក្សាគំរូក្រុង, មណ្ឌលព្យាបាលវិទ្យាល័យតេជោហ៊ុនសែនទឹកហូត, មណ្ឌលព្យាបាលវិទ្យាល័យហ៊ុនសែនកំពង់ត្រឡាច, មណ្ឌលព្យាបាលវិទ្យាល័យហ៊ុនសែនបរិបូណ៍, និងមណ្ឌលព្យាបាលវិទ្យាល័យហ៊ុនសែនកំពង់លែង ។
ជាមួយគ្នានេះ រដ្ឋបាលសាលាខេត្ត ក៏បានក៍បានបញ្ជាក់ពីចំនួនអ្នកជាសះស្បើយថ្មីចំនួន៤០នាក់(ស្រី១៨នាក់)ផងដែរ ដែលបានអនុញ្ញាតឲ្យចេញពីមណ្ឌលព្យា បាលទៅធ្វើចត្តាឡីស័កនៅលំនៅដ្ឋាន១៤ថ្ងៃ ។ ចំពោះអ្នកពាក់ព័ន្ឋនិងអ្នកវិជ្ជមាន៤៦នាក់ ដែលរកឃើញម្សិលមិញ រដ្ឋបាលសាលាខេត្តកំពង់ឆ្នាំង បាន អំពាវនាវឱ្យបងប្អូន ទៅយកសំណាក នៅមន្ទីរសុខាភិបាល ឬមណ្ឌលសុខភាពដែលនៅជិតបំផុត ដើម្បីរួមគ្នាទុបស្កាត់ការរីករាលដាលជំងឺកូវីត១៩៕
ចែករំលែកព័តមាននេះ