រាជធានីភ្នំពេញ ៖ នៅទីបំផុតការប្រកួតបើកឆាករបស់កីឡាករ៤រូបនៅក្នុងព្រឹត្តិការណ៍ដណ្ដើមជើងឯករបស់ក្រុមហ៊ុនស៊ីម៉ង់ត៍អូដ្ឋវគ្គ២ សម្រាប់ពូលB កីឡាករវ័យក្មេងម៉ន ចាន់ដារ៉ា ពិតជាធ្វើឱ្យអ្នកស្នេហាកីឡាប្រដាល់មិនខកចិត្តមែន
រាជធានីភ្នំពេញ ៖ នៅទីបំផុតការប្រកួតបើកឆាករបស់កីឡាករ៤រូបនៅក្នុងព្រឹត្តិការណ៍ដណ្ដើមជើងឯករបស់ក្រុមហ៊ុនស៊ីម៉ង់ត៍អូដ្ឋវគ្គ២ សម្រាប់ពូលB កីឡាករវ័យក្មេងម៉ន ចាន់ដារ៉ា ពិតជាធ្វើឱ្យអ្នកស្នេហាកីឡាប្រដាល់មិនខកចិត្តមែន បន្ទាប់ពីបានបំបាក់កីឡាករក្នុងពូលគឺ រឿង សារ័ត្ន ហើយដណ្ដើមបាន៣ពិន្ទុនាំមុខមុន ។ នេះជាការប្រកួតនៅក្នុងព្រឹត្តិការណ៍«កំពូលអធិរាជស៊ីម៉ង់ត៍អូដ្ឋវគ្គ២» នៅក្នុងប្រភេទទម្ងន់៦០គីឡូក្រាម ដែលបានធ្វើឡើងនៅលើសង្វៀនទូរទស្សន៍ប៉ុស្ដិ៍លេខ៥ នៅTV5 Arena ជ្រោយចង្វា កាលពីល្ងាចថ្ងៃសៅរ៍ទី១៩ ធ្នូ។
ការប្រកួតដណ្ដើមតំណែងជើងឯកនេះ មានកីឡាករសរុប៨រូប ដោយកីឡាករកម្ពុជា៦រូប កីឡាករថៃ២រូប។ អ្នកទាំង៨តម្រូវឲ្យចែកជា២ពូល ដោយ៤នាក់ស្ថិតក្នុងពូលA និង៤នាក់ទៀតស្ថិតនៅក្នុងពូលB ដែលទើបនឹងរកឃើញលទ្ធផលនេះ ។ ក្រុមហ៊ុនស៊ីម៉ង់ត៍អូដ្ឋរបស់ជីបម៉ុងគ្រុប បានសម្រេចបោះទុនឱ្យកីឡាករទាំង៨ប្រកួតគ្នាសន្សំពិន្ទុចុះឡើងៗក្នុងរដូវកាលលើកទី២ ពេញរយៈពេល៣ខែរហូតរកឃើញកីឡាករជើងខ្លាំង២នាក់ចុងក្រោយប្រចាំពូលេឡើងប្រកួតខ្វែង ឆ្ពោះទៅក្ដាប់តំណែងជើងឯកជាលើកទី២ បន្ទាប់ពីលើកទី១ គឺកីឡាករថៃជាអ្នកគ្រងតំណែង ។
ការប្រកួតនឹងបញ្ចប់នៅមុនចូលឆ្នាំខ្មែរឆ្នាំ២០១៦ ដោយចំណាត់ថ្នាក់លេខ១ទទួលបានពានធំជើងឯកមួយ និងទឹកប្រាក់២.៥០០ដុល្លារ ព្រមជាមួយនឹងឱកាសចេញប្រកួតអន្តរជាតិនៅក្នុងប្រទេសថៃ ។ ចំណាត់ថ្នាក់លេខ២ ក្រុមហ៊ុនផ្ដល់ឱ្យពានតូចមួយ និងប្រាក់១.០០០ដុល្លារ ។ លេខ៣ផ្ដល់ឱ្យពានតូចមួយដូចគ្នា ព្រមជាមួយទឹកប្រាក់៥០០ដុល្លារ និងលេខ៤ទទួលបានពានតូចជាមួយទឹកប្រាក់៣០០ដុល្លារ ។
កីឡាករម៉ន ចាន់ដារ៉ា មកពីក្លិបការិយាល័យទី៥កងទ័ពជើងគោក គឺជាគូដណ្ដើមជើងឯក ដែលមានការចាប់អារម្មណ៍ជាងគេសម្រាប់ពូលB ដែលទើបបញ្ចប់កាលពីថ្ងៃម្សិលម្ង៉ៃ បន្ទាប់ពីបានប្រើកណ្ដាប់ដៃ និងកែង វាយបំបាក់កីឡាកររឿង សារ័ត្ន មកពីក្លិបកងពលតូចឆត្រយោង៩១១ ឱ្យចាញ់ពិន្ទុដោយជោគជ័យ។ អ្នកទាំងពីរបានប្រកួតគ្នាយ៉ាងស្វិតស្វាញដោយស្ទើរពិបាកបែងចែកដឹងថា អ្នកណាមានប្រៀបជាងអ្នកណា មុនពេលមានការប្រកាសថាអ្នកណាឈ្នះអ្នកណាចាញ់ដោយសារតែកីឡាករទាំងពីរមានសមត្ថភាពប្រហាក់ប្រហែលគ្នា។ បើកុំតែម៉ន ចាន់ដារ៉ា មានឱកាសវ័ធត្រូវពេញទំហឹង និងចំសៀតផ្កាទៅលើគូប្រកួត គឺប្រហែលជាការប្រកួតនោះ មិនមែនដណ្ដើមបានជ័យជម្នះ និងទទួលបាន៣ពិន្ទុនាំមុខនោះទេ ។
អ្នកទស្សនាគ្រប់គ្នាសុទ្ធតែមើលឃើញថា បើកីឡាករម៉ន ចាន់ដារ៉ា គេចមិនទាន់នោះប្រាកដជាជួបលទ្ធផលអាក្រក់មិនខុសគ្នានោះឡើយ ដោយសារតែកីឡាករបង្គោលខៀវ ក៏ខ្លាំងហើយមានបច្ចេកទេសវាយញាក់សាច់ដែរ។ អញ្ចឹងហើយទើបការប្រកួតទាំងមូល មានអ្នកស្រែកហ៊ោកញ្ជ្រៀវកងរំពង ដោយសារតែក្នុងថ្ងៃប្រកួតបើកឆាកសម្រាប់ពូលBក៏មានអ្នកទស្សនាកកកុញណែនណាន់តាន់តាប់នៅក្នុងសង្វៀនទូរទស្សន៍ប៉ុស្ដិ៍លេខ៥ ដែលស្ថិតនៅជ្រោយចង្វានោះផង ។ កីឡាករម៉ន ចាន់ដារ៉ា លោតកញ្ឆេងលើរេញយ៉ាងខ្លាំង បន្ទាប់ពីបានប្រកាសថាឈ្នះគូប្រកួត ហើយដណ្ដើមបាន៣ពិន្ទុនាំមុខមុន សម្រាប់ការប្រកួតសន្សំពិន្ទុថ្ងៃទី១សម្រាប់ពូលB ។
កីឡាករ សុខ សុវណ្ណ មកពីក្លិបកងពលធំអន្តរាគមន៍លេខ២ នៃសមាគមកីឡាប្រដាល់ក្រសួងការពារជាតិ ក៏បានផ្ដួលកីឡាករថៃក្នុងពូលBដូចគ្នា គឺកីឡាករ Yorth Sing ក្នុងទឹកទី៥ទទួលបាន៣ពិន្ទុផងដែរ សម្រាប់ការប្រកួតកាលពីម្សិលមិញ ។ ទាំងកីឡាករម៉ន ចាន់ដារ៉ា និងកីឡាករសុខ សុវណ្ណ ត្រូវការឈ្នះឱ្យបានម្នាក់២ប្រកួត ទើបអាចបន្តឱកាសទៅកាន់វគ្គខ្វែង ដើម្បីប្រកួតយកពាន និងប្រាក់លានរបស់ក្រុមហ៊ុនស៊ីម៉ង់ត៍អូដ្ឋនៅវគ្គចុងបញ្ចប់សម្រាប់រដូវកាលទី២នេះ ៕
ចែករំលែកព័តមាននេះ