រាជធានីភ្នំពេញ ៖ ផ្អែកលើមតិមួយចំនួនលើកឡើងពាក់ព័ន្ធនឹងតួនាទីរបស់ក្រសួងពាណិជ្ជកម្ម លើថ្លៃទំនិញលើទីផ្សារ និងទំនិញនាំចេញ-ចូល ជាពិសេសបញ្ហាថ្លៃសាច់ជ្រូកនាំចូលធៀបនឹងថ្លៃលើទីផ្សារក្នុងស្រុក និងថ្លៃនៅប្រទេសជិតខាងប្រទេសកម្ពុជា ដោយក្រសួងបានបំភ្លឺនៅចំណុចសំខាន់ ៦ ចំណុច…
រាជធានីភ្នំពេញ ៖ ផ្អែកលើមតិមួយចំនួនលើកឡើងពាក់ព័ន្ធនឹងតួនាទីរបស់ក្រសួងពាណិជ្ជកម្ម លើថ្លៃទំនិញលើទីផ្សារ និងទំនិញនាំចេញ-ចូល ជាពិសេសបញ្ហាថ្លៃសាច់ជ្រូកនាំចូលធៀបនឹងថ្លៃលើទីផ្សារក្នុងស្រុក និងថ្លៃនៅប្រទេសជិតខាងប្រទេសកម្ពុជា ដោយក្រសួងបានបំភ្លឺនៅចំណុចសំខាន់ ៦ ចំណុច ជូនដល់សាធារណជន ។ យោងតាមសេចកក្តីប្រកាសព័ត៌មានកាលពីថ្ងៃទី ២០ ខែកក្កដា ឆ្នាំ ២០២១ ក្រសួងពាណិជ្ជកម្ម លើកឡើងថា មិត្តសាធារណៈមួយចំនួនមិនបានឆ្លុះបញ្ចាំងពីតួនាទី និងភារកិច្ចរបស់ក្រសួងពាណិជ្ជកម្ម ដែលកំណត់ដោយរដ្ឋធម្មនុញ្ញ និងលិខិតបទដ្ឋានគតិយុត្តជាធរមាន ក្រសួងពាណិជ្ជកម្ម សូមបំភ្លឺជូនសាធារណជន និងប្រជាពលរដ្ឋ ៖
១)- រដ្ឋធម្មនុញ្ញនៃព្រះរាជាណាចក្រកម្ពុជា បានកំណត់ឱ្យរដ្ឋអនុវត្តប្រព័ន្ធសេដ្ឋកិច្ចទីផ្សារ ដែលកំណត់ក្នុងច្បាប់ ហើយត្រូវយកចិត្តទុកដាក់ជួយដោះស្រាយមធ្យោបាយផលិតកម្ម ការពារថ្លៃផលិតផលជូនកសិករ សិប្បករ និងជួយរកទីផ្សារលក់ផលិតផល ។ ផ្អែកតាមគោលការណ៍គ្រឹះនេះ ក្រសួងពាណិជ្ជកម្ម បានចរចារបើកច្រកទីផ្សារក្រៅប្រទេស ដោយមិនចាំបាច់បង់ពន្ធបានជួយសម្រួលដល់យន្តការទីផ្សារឱ្យមានការនាំចេញ នាំចូលនូវមធ្យោបាយផលិតកម្ម និងទំនិញនានាដោយសេរី និងគ្មានដាក់វិធានការរំខានណាមួយដែលគ្មានកំណត់ក្នុងច្បាប់នោះឡើយ ។
ជាទូទៅការអនុវត្តយន្តការផ្សារសេរីនេះ ក៏មានចែងក្នុងកិច្ចព្រមព្រៀងពាណិជ្ជកម្មសេរី ក្រោមក្របខណ្ឌ័អង្គការពាណិជ្ជកម្មពិភពលោក និងអាស៊ានផងដែរ ។ ករណីប្រទេសណាមួយដាក់វិធានការរិតត្បិតលើការនាំចូលណាមួយ ប្រទេសនោះត្រូវកំណត់នៅក្នុងលិខិតបទដ្ឋានច្បាប់ក្នុងស្រុក ហើយជូនដំណឹងអំពីវិធានការនោះដោយមានតម្លាភាព និងកំណត់នីតិវិធី ច្បាស់លាស់ ។
២)- ដោយឡែក ការនាំចូលសាច់ជ្រូក និងជ្រូករស់ គឺត្រូវស្ថិតក្រោមការធ្វើនិយ័តកម្មស្របតាមច្បាប់ និងអនុក្រឹត្យ លេខ ១៧ អនក្រ បក ចុះថ្ងៃទី ២៦ ខែកុម្ភៈ ឆ្នាំ ២០២០ ស្តីពីការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ដែលតម្រូវឱ្យសុំអាជ្ញាប័ណ្ណអនុញ្ញាត ការនាំចូលជ្រូក ពីអង្គភាពជំនាញនៃក្រសួងកសិកម្ម រុក្ខាប្រមាញ់ និងនេសាទ ដែលកិច្ចការនេះមិនស្ថិតក្រោមសមត្ថកិច្ចរបស់ក្រសួងពាណិជ្ជកម្ម ឡើយ ។ ការធ្វើតុល្យភាពនៃសេចក្តីត្រូវការក្នុងស្រុកជាមួយនឹងផលិតផលក្នុងស្រុក ព្រមទាំងការអនុញ្ញាត ឱ្យនាំចូលក្នុងបរិមាណណាមួយ គឺជាសិទ្ធិសម្រេចរបស់ក្រសួងកសិកម្ម រុក្ខាប្រមាញ់ និងនេសាទ ដូចមានកំណត់ក្នុងអនុក្រឹត្យលេខ ១៧ អនក្រ.បក ។
៣)- ក្រសួងពាណិជ្ជកម្ម ដែលជាសេនាធិការឱ្យរាជរដ្ឋាភិបាល មិនដែលបានអនុវត្ត ឬដាក់ចេញនូវយន្តការ និងវិធានការណាមួយសម្រាប់គ្រប់គ្រងតម្លៃទំនិញ នាំចូល ឬទំនិញដែលធ្វើចរចារក្នុងទីផ្សារកម្ពុជានោះឡើយ តែបរិមាណផ្គត់ផ្គង់ និងតម្រូវការនៅលើទីផ្សារទេ ដែលជាកត្តាកំណត់តម្លៃទំនិញ ។ លើកលែងតែក្នុងករណីមានរបាយការណ៍ស៊ើបអង្កេតដែលអាចបញ្ជាក់ថា មានមុខទំនិញនាំចូលជាក់លាក់ណាមួយត្រូវបានលក់បង្ខូចថ្លៃ (លក់ទាបជាថ្លៃដើមផលិត) ឬមានការធ្វើឧបត្ថម្ភធនដោយប្រទេសនាំចេញ ឬទំនិញនាំចូលនោះត្រូវបាននាំចូលដោយមានការកើនឡើងដោយគំហុកនោះ ក្រសួងពាណិជ្ជកម្ម នឹងធ្វើការស៊ើបអង្កេត និងឈានទៅអនុវត្តវិធានការនានារួមទាំង ការកំហិតបរិមាណ និងដំឡើងពន្ធនាំចូលផងដែរ ដូចមានចែងក្នុងច្បាប់ជាធរមាន សំដៅការពារ និងដោះស្រាយផលប៉ះពាល់ជាអវិជ្ជមានមកលើកសិករ ឬឧស្សាហកម្ម កម្ពុជា ។
៤) -សូមបញ្ជាក់ថា ពាក់ពន្ធ័នឹងការបោះផ្សារនូវសេចក្តីជូនដំណឹងស្តីពីថ្លៃលក់រាយប្រេង ឥន្ធនៈ នៅតាមបណ្តាស្ថានីយ៍នានា ដែលក្រសួង ពាណិជ្ជកម្ម បាននិងអនុវត្តកន្លងមក មិនមែនជាការកំណត់ថ្លៃលក់រាយនៃប្រេងឥន្ធនៈនៅកម្ពុជានោះទេ តែនេះ គឺជាយន្តការមួយ ដែលជួយផ្សព្វផ្សាយដោយតម្លាភាពនូវការឡើងចុះ នៃថ្លៃប្រេងឥន្ធនៈ ដែលមានការប្រែប្រួល រត់តាមការប្រែប្រួលថ្លៃនៃប្រេងឥន្ធនៈនៅក្នុងទីផ្សារអន្តរជាតិ ដោយក្រសួងពាណិជ្ជកម្មគ្រាន់តែយកកត្តានានា ទាក់ទងនឹងថ្លៃ មកគណនាតាមរូបមន្តទូទៅ ហើយបញ្ចេញឱ្យសាធារណជនជ្រាអំពីថ្លៃប្រេងឥន្ធនៈ ដែលក្រុមហ៊នប្រេងក្នុងស្រុកកំពុងប្រកបអាជីវកមម នៅកម្ពុជាតែប៉ុណ្ណោះ ។
៥)- ចំពោះការធ្វើសន្ទស្សន៍ថ្លៃទំនិញចរចារក្នុងទីផ្សារកម្ពុជាជាប្រចាំ ក្រសួងពាណិជ្ជកម្មមានភារកិច្ចសហការជាមួយអាជ្ញាធរថ្នាក់ក្រោមជាតិ ត្រឹមតែស្រង់សន្ទស្សន៍ថ្លៃទំនិញទូទៅ ដើម្បីប្រើប្រាស់ជាស្ថិតិសម្រាប់ការងារស្រាវជ្រាវ ការវិភាគ និងតាមដានអត្រាអតិផរណា សំដៅដាក់ចេញវិធានការណាមួយដែលអាចជួយសម្រួលដល់លំហូរទំនិញនៅក្នុងស្រុក និងនាំចេញ នាំចូលតាមយន្តការទីផ្សារសេរីប៉ុណ្ណោះ ។
និង ៦-ពាក់ព័ន្ធនឹងសំណូមពរ ឱ្យមានយន្តការសម្រាប់ស្រង់ និងសម្របសម្រួលលើបរិមាណនិងថ្លៃលក់មុខទំនិញយុទ្ធសាស្ត្រណាមួយនៅលើទីផ្សារ នោះក្រសួងពាណិជ្ជកម្ម នឹងសហការជាមួយក្រសួង ស្ថាប័នពាក់ពន្ធ័ដើម្បីសុំឱ្យមានកិច្ចប្រជុំពិភាក្សាក្រោមក្របខណ្ឌ័គណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុ មុននឹងគោរពស្នើសុំអនុសាសន៍ណែនាំដ៏ខ្ពង់ខ្ពស់ពីប្រមុខរាជរដ្ឋាភិបាលលើបញ្ហានេះ ៕
ចែករំលែកព័តមាននេះ