រាជធានីភ្នំពេញ៖ ហាងលក់មីហឹរមួយកន្លែងត្រូវបានអគ្គិភ័យឆាបឆេះទាំងព្រឹក បណ្ដាលឲ្យមនុស្សចំនួន៤នាក់រងរបួស និងត្រូវបានបញ្ជូនតាមម៉ូតូកង់បីទៅកាន់មន្ទីរពេទ្យដើម្បីព្យាបាល ចំណែកឯមូលហេតុនៃការឆាបឆេះនោះត្រូវបានអ្នកដឹងហេតុការណ៍អះអាងថា បណ្ដាលមកពីធ្លាយទុយោធុងហ្គាស ហើយភ្លាមៗនោះអ្នកនៅក្នុងហាងបាននាំគ្នាពន្លត់ដែរតែអត់ឈ្នះឡើយព្រមទាំងរលាករងរបួសទៀត រហូតដល់មានការអន្តរាគមន៍ពីសំណាក់រថយន្តពន្លត់អគ្គិភ័យទើបរលត់ទៅវិញ។
ហេតុការណ៍នេះ បានកើតឡើងកាលពីវេលាម៉ោង១០និង៤៥នាទីព្រឹកថ្ងៃទី២១ ខែកក្កដា ឆ្នាំ២០២១ នៅក្នុងហាងមីហឹរយីហោ«មីហឹរ៧យ៉ាង»ដែលមានទីតាំងស្ថិតនៅតាមផ្លូវបេតុងព្រៃស ក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឲ្យដឹងថា ជនរងគ្រោះទាំង៤នាក់នោះពុំទាន់ត្រូវបានស្គាល់អ្តសញ្ញាណនោះទេ ហើយនៅវេលាព្រឹកកើតហេតុខាងលើក៏ពុំទាន់មានភ្ញៀវចូលទីបរិភោគមីហឹរនៅឡើយដែរ ។ ខណៈនោះជនរងគ្រោះទាំងអស់បានស្ថិតនៅក្នុងហាងខាងលើជាមួយគ្នា និងបានបើកចង្ក្រានហ្គាស ដើម្បីចម្អិនម្ហូបអាហារ ស្រាប់តែធ្លាយទុយោធុងហ្គាសបង្កឲ្យមានការឆាបឆេះយ៉ាងសន្ធោរសន្ធៅតែម្ដង។
ប្រភពដដែលបានបន្តថា ពេលនោះបានធ្វើឲ្យម្នាក់ភ័យស្លន់ស្លោរហើយបាននាំគ្នាពន្លត់ភ្លើងតែមិនបានរលត់ឡើយហើយថែមទាំងត្រូវភ្លើងឆេះបណ្ដាលឲ្យរលាករងបួសថែមទៀត ពេលនោះបានបង្កឲ្យមានការភ្ញាក់ផ្អើលដល់អ្នកជិតខាងម្យ៉ាងអ្វីដែលរឹតតែភ័យខ្លាចថែមទៀតនោះគឺហាងមីហឹរនេះស្ថិតនៅជិតស្ថានីយ៍ប្រេងឥន្ធនៈ ។
ភ្លាមៗនោះ អាជ្ញាធរនិងសមត្ថកិច្ចខណ្ឌដង្កោបានចុះទៅកាន់ទីនោះរួចបានផ្ដល់ដំណឹងទៅកាន់រថយន្តពន្លត់អគ្គិភ័យឲ្យជួយអន្តរាគមន៍បាញ់ទឹកពន្លត់ទើបរលត់ទៅវិញទាំងស្រុក។ ចំណែកឯជនរងគ្រោះដែលបានរងរបួសដោយសារតែរលាកភ្លើងនោះត្រូវបានបញ្ជូនតាមម៉ូតូកង់បីទៅកាន់មន្ទីរពេទ្យដើម្បីព្យាបាលរបួសភ្លាមៗផងដែរ ៕
ចែករំលែកព័តមាននេះ