រាជធានីភ្នំពេញ ៖ ជនសង្ស័យ២នាក់ បានធ្វើសកម្មភាពឆក់ទូរស័ព្ទ១គ្រឿងម៉ាក IPhone-6 ពីដៃក្មេងស្រី អាយុ៥ឆ្នាំម្នាក់ដែលកំពុងអង្គុយចុចលេងនៅមុខផ្ទះលុះឆក់បានសម្រេចក៏បានជិះម៉ូតូគេចខ្លួន ដោយសុវត្ថិភាព ដោយពុំដឹងថា ទូរស័ព្ទដៃនោះជាប់កម្មវិធីអាយខ្លោតឡើយ…
រាជធានីភ្នំពេញ ៖ ជនសង្ស័យ២នាក់ បានធ្វើសកម្មភាពឆក់ទូរស័ព្ទ១គ្រឿងម៉ាក IPhone-6 ពីដៃក្មេងស្រី អាយុ៥ឆ្នាំម្នាក់ដែលកំពុងអង្គុយចុចលេងនៅមុខផ្ទះលុះឆក់បានសម្រេចក៏បានជិះម៉ូតូគេចខ្លួន ដោយសុវត្ថិភាព ដោយពុំដឹងថា ទូរស័ព្ទដៃនោះជាប់កម្មវិធីអាយខ្លោតឡើយ ។
បន្ទាប់មកជនសង្ស័យម្នាក់ក្នុងចំណោមគ្នា២នាក់នោះបានយកទូរស័ព្ទដែលឆក់បាននេះទៅលក់ ហើយនៅខណៈពេលកំពុងតែឈរលក់ កម្លាំងនគរបាលប៉ុស្តិ៍សំរោងក្រោមទៅដល់ឃាត់ខ្លួនបាននាំយកទៅសាកសួររួចទើបបន្តទៅឃាត់ខ្លួនបក្សពួកម្នាក់ទៀត ដល់ផ្ទះ ។
ហេតុការណ៍នោះបានកើតឡើង កាលពីវេលាម៉ោង៧យប់ ថ្ងៃទី១៩ ខែកក្កដា ឆ្នាំ២០២១ នៅចំណុចមុខផ្ទះលេខ៦២ ផ្លូវលេខ២៨ បុរីឈូលវ៉ា២ ភូមិតិក្ខបញ្ញា សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យខាងលើនោះទី១,ឈ្មោះតូ ម៉ា ហៅម៉ា អាយុ២០ឆ្នាំ ស្នាក់នៅផ្ទះជួលក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។ ទី២,ឈ្មោះហឿន ថុនា អាយុ១៧ឆ្នាំ ស្នាក់នៅបន្ទប់ជួល ភូមិកាកាប១ សង្កាត់កាកាបទី២ ខណ្ឌពោធិ៍សែនជ័យ ។
ចំណែកក្មេងស្រីដែលកាន់ទូរស័ព្ទលេងនោះ អាយុ៥ឆ្នាំ មានឪពុកដែលជាម្ចាស់ទូរស័ព្ទឈ្មោះ ពង ចាន់ថន អាយុ៣៧ឆ្នាំ មុខរបរជាមន្ត្រីរាជការ មានទីលំនៅផ្ទះកើតហេតុខាងលើ ។
នគរបាលបានឲ្យដឹងថា នៅមុនពេលកើតហេតុជនសង្ស័យឈ្មោះតូ ម៉ា ហៅម៉ា បានបបួលជនសង្ស័យឈ្មោះ ហឿន ថុនា ចេញធ្វើសកម្មភាពឆក់ លុះឯកភាពគ្នាហើយ ក៏បានជិះម៉ូតូ១គ្រឿងឌុបគ្នាចេញពីកន្លែងលេងបាល់ទះស្ថិតនៅក្នុងភូមិព្រៃសាលា សង្កាត់កសកាបទី២ ចូលទៅកាន់បុរីឈូកវ៉ា២ ។
ពេលនោះបានក្រឡេកឃើញក្មេងស្រីរងគ្រោះកំពុងអង្គុយចុចទូរស័ព្ទលេងនៅមុខផ្ទះ ហើយជនសង្ស័យទាំង២នាក់ ជិះម៉ូតូទៅជិតរួចធ្វើសកម្មភាពឆក់យកទូរស័ព្ទបានសម្រេចហើយនាំគ្នាជិះម៉ូតូគេចខ្លួនបាត់អស់ ។
ប្រភពដដែលបានបន្តទៀតថា ក្រោយពេលកើតហេតុឪពុកក្មេងស្រីរងគ្រោះបានទៅដាក់ពាក្យប្ដឹងសុំអន្តរាគមន៍ពីកម្លាំងនគរបាលប៉ុស្តិ៍សំរោង ដោយប្រាប់ថា ទូរស័ព្ទរបស់ខ្លួនមានភ្ជាប់កម្មវិធីអាយខ្លោត ហើយនគរបាលក៏បានធ្វើការស្រាវជ្រាវតាមនោះ ។
ចំណែកជនសង្ស័យឈ្មោះ តូ ម៉ា ហៅម៉ា បន្ទាប់ពីលួចបានក៏បានយកទូរស័ព្ទនោះទៅលក់នៅកន្លែងលក់ និងទិញទូរស័ព្ទមួយនៅក្នុងភូមិព្រៃទា សង្កាត់ចោមចៅទី៣ ក្រោយពីការស្រាវជ្រាវទៅតាមកម្មវិធីអាយខ្លោតចង្អុលបង្ហាញទិសទើបកម្លាំងនគរបាលតាមទៅចាប់ខ្លួនជនសង្សយ័រូបនោះដល់កន្លែងលក់ទូរស័ព្ទនោះតែម្ដង ។
បន្ទាប់មកបាននាំទៅសាកសួរនៅប៉ុស្តិ៍សំរោងក្រោមទើបដឹងពីកន្លែងលាក់ខ្លួនរបស់បក្សពួកឈ្មោះ ហឿន ថុនា ម្នាក់ទៀតហើយបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ