រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពលួចម៉ូតូហុងដាឌ្រីមមួយគ្រឿងរបស់អាជីវករលក់ត្រី បានសម្រេចពីខណ្ឌព្រែកព្នៅ ហើយជនសង្ស័យរួបនេះព្យាយាមជិះគេចខ្លួនឆ្លងកាត់អស់ចំនួន៤ខណ្ឌ រហូតក៏ត្រូវបានកម្លាំងសមត្ថកិច្ចដែលកំពុងជិះល្បាតជួយស្ទាក់ចាប់បាន បង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីយប់ ថ្ងៃទី២០ ខែកក្កដា ឆ្នាំ២០២១ ត្រង់ចំណុចក្បែរស្តុបទួលពង្រ តាមបណ្ដោយផ្លូវវេងស្រេង ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ។
ជនសង្ស័យដែលត្រូវសមត្ថកិច្ចឃាត់ខ្លួនបានខាងលើនេះ មានឈ្មោះ សុខ លីម ភេទប្រុស អាយុ២៣ឆ្នាំ មុខរបរ និងស្នាក់នៅមិនពិតប្រាកដ។
បើតាមសម្តីពីបុរសម្នាក់ឈ្មោះ លី ហេង អាយុ៣១ឆ្នាំ មុខរបរអាជីវករលក់ត្រី ស្នាក់នៅក្បែរផ្សារព្រែកព្នៅ ក្នុងសង្កាត់ព្រែកព្នៅ ខណ្ឌព្រែកព្នៅ បានរៀបរាប់ប្រាប់ឲ្យដឹងថា គាត់គឺជាកូនប្រុសបង្កើតរបស់ជនរងគ្រោះដែលជាម្ចាស់ម៉ូតូម៉ាក ហុងដាឌ្រីម ស៊េរីឆ្នាំ២០០៩ ពណ៌ខ្មៅ ពាក់ស្លាកលេខ ភ្នំពេញ1K-347។ ហើយម៉ូតូនេះ គឺឪពុករបស់គាត់ទុកសម្រាប់ដឹកត្រីយកទៅលក់នៅឯផ្សារជារៀងរាល់ថ្ងៃ។
បុរសខាងលើបន្តថា នៅមុនពេលកើតហេតុ ឪពុករបស់គាត់បានយកម៉ូតូទៅចតទុកចោលនៅខាងមុខ ផ្ទះដែលពួកគាត់ស្នាក់នៅ រួចឪពុករបស់គាត់ក៏បានចេញទៅលក់ត្រីនៅឯផ្សារដូចសព្វដងជាធម្មតា។ លុះរហូតដល់វេលាកើតហេតុខាងលើ គាត់ក៏បានទទួលដំណឹងថា ម៉ូតូរបស់គាត់ត្រូវបានចោរលួចបាត់ទៅហើយ ទើបគាត់ប្រញាប់ប្រញាល់ជិះម៉ូតូតាមរក។
បុរសរូបនេះបន្តថា ខណៈពេលដែលគាត់ជិះម៉ូតូតាមបណ្ដោយផ្លូវជាតិលេខ៥ ទៅដល់ខាងមុខផ្សារព្រែកព្នៅ ក៏ស្រាប់តែប្រទះឃើញម៉ូតូរបស់ឪពុកគាត់ដែលត្រូវជនសង្ស័យនោះកំពុងតែជិះ។ ភ្លាមៗនោះ គាត់បានស្រែកឆោឡោធ្វើឲ្យជនសង្ស័យភ័យស្លន់ស្លោ ក៏បន្ថែមល្បឿនជិះគេចខ្លួនចូលទៅខណ្ឌសែនសុខ តាមបណ្ដោយផ្លូវហាណូយ និងឆ្លងចូលទៅខណ្ឌមានជ័យ តាមបណ្ដោយផ្លូវវេងស្រេង ។
ប្រភពដដែលបន្តថា រហូតដល់ចំណុចទល់មុខធនាគារវឌ្ឍនៈ តាមបណ្ដោយផ្លូវវេងស្រេង ក្នុងសង្កាត់ស្ទឹងមានជ័យទី៣ ខណ្ឌមានជ័យ ក៏បានជួបជាមួយនឹងកងអន្តរាគមន៍នៃអធិការដ្ឋាននគរបាលខណ្ឌមានជ័យ កំពុងតែធ្វើការជិះល្បាត ក៏ត្រូវបានកម្លាំងសមត្ថកិច្ចដែលកំពុងជិះល្បាតជួយជិះដេញតាម និងធ្វើការចាប់ឃាត់ខ្លួនជនសង្ស័យបាននៅត្រង់ចំណុចកើតហេតុតែម្តង។ រួចក៏បានរាយការណ៍ជូនសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលចោមចៅទី១ ដើម្បីឲ្យចុះមកជួយធ្វើការអន្តរាគមន៍ផងដែរ។
ក្រោយពេលកើតហេតុ ជនសង្ស័យ រួមទាំងវត្ថុតាងត្រូវបានសមត្ថកិច្ចប៉ុស្តិ៍នគរបាលរដ្ឋបាលចោមចៅទី១ ប្រគល់បន្តទៅឲ្យសមត្ថកិច្ចប៉ុស្តិ៍នគរបាលរដ្ឋបាលព្រែកព្នៅ ដើម្បីនាំខ្លួនយកទៅធ្វើការសាកសួរនិងកសាងសំណុំរឿង រង់ចាំចាត់ការទៅតាមនីតិវិធី៕
ចែករំលែកព័តមាននេះ