រាជធានីភ្នំពេញ ៖ ក្រុមអាជីវករលក់មាសប្តូរប្រាក់នៅផ្សារស្ទឹងមានជ័យប្រមាណ៣០នាក់ ក្នុងចំណោមអាជីវករប្រកបរបរលក់មាសក្នុងផ្សារទាំងអស់៦៤នាក់ ស្មើនឹង៦៤តូប បានលើកគ្នាមកតវ៉ាដល់សាលាខណ្ឌមានជ័យនាព្រឹកថ្ងៃទី១៤ មីនា ដើម្បីទាមទារសុំឱ្យលោកអភិបាលខណ្ឌមានជ័យជួយមានវិធានការចំពោះមន្ត្រីនគរបាលព្រហ្មទណ្ឌក្រសួងមហាផ្ទៃ ក៏ដូចជានគរបាលក្រុងភ្នំពេញ និងនគរបាលនៃអង្គភាពផ្សេងៗទៀត ដែលកន្លងមកតែងតែចាប់ពួកគាត់ជាអាជីវករលក់មាសទៅគំរាមកំហែងឃុំខ្លួនរឿងបញ្ហាទទួលផលចោរកម្ម។
ក្រុមអាជីវករបានលើកឡើងថា កន្លងមកមានអាជីវករខ្លះធ្លាប់ត្រូវសមត្ថកិច្ចនគរបាលព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ ចាប់ខ្លួនទៅគំរាមកំហែងដាក់គុកទារប្រាក់ឆៅៗរាប់ពាន់ដុល្លារ ដោយចោទថា ពាក់ព័ន្ធនឹងបញ្ហាទទួលទិញគ្រឿងអលង្ការពីចោរ។ បញ្ហានេះក្រុមអាជីវករលើកឡើងថា គាត់រកស៊ីលក់ដូរមាសធ្វើម្តេចនឹងដឹងថាបុគ្គលណាជាចោរប្លន់ ឆក់ លួចយកមាសប្រាក់គ្រប់ប្រភេទមកលក់ឱ្យពួកគាត់។ បើមានអតិថិជនយកគ្រឿងអលង្ការមកលក់ គឺគាត់ទាំងអស់គ្នាច្បាស់ជាទិញ ហើយមិនដឹងថា បុគ្គលនោះជាសមាសភាពអ្វីទេ។ ដូច្នេះបើមានបញ្ហានេះកើតឡើងគួរតែច្បាប់ ឬមន្ត្រីមានសមត្ថកិច្ចថ្នាក់មូលដ្ឋានជួយរកយុត្តិធម៌ជូនពួកគាត់ផង កុំឱ្យយកលេសលើច្បាប់ទទួលផលចោរកម្ម ហើយចាប់មនុស្សទៅជំរិតទារប្រាក់ឆៅៗដូចកន្លងមក គឺអយុត្តិធម៌ពេក សម្រាប់អាជីវកររកស៊ីស្របច្បាប់។
ក្រុមអាជីវករខ្លះទៀតលើកឡើងថា ពេលជួបបញ្ហាពាក់ព័ន្ធនឹងបទល្មើសទទួលផលចោរកម្មម្តងៗ ក្រុមអាជីវករតែងតែទទួលរងការខាតបង់ទាំងដើមទាំងចុង ដោយទទួលរងការផាកពិន័យយ៉ាងចាស់ដៃពីសំណាក់សមត្ថកិច្ច អ្នកអនុវត្តច្បាប់ និងតុលាការផងដែរ។ ទាក់ទិនទៅនឹងរឿងរ៉ាវចោទប្រកាន់ឡើងពីសំណាក់ក្រុមអាជីវករទៅលើសមត្ថកិច្ចនគរបាលដែលធ្លាប់ពាក់ព័ន្ធជាមួយការចាប់ខ្លួនក្រុមអាជីវករនោះ នៅព្រឹកថ្ងៃដដែល លោកគួច ចំរើន អភិបាលខណ្ឌមានជ័យ បានជួបជាមួយក្រុមអាជីវករ ហើយពន្យល់អំពីនីតិវិធីច្បាប់ខ្លះដល់ពួកគាត់ឱ្យយល់អំពីបទល្មើស «ទទួលផលចោរកម្ម» ដែលច្បាប់បានចែង ហើយតុលាការកំពុងប្រតិបត្តិរាល់ថ្ងៃនេះ។
លោកគួច ចំរើន បានលើកឡើងថា បើបងប្អូនអាជីវករជួបនូវវិវាទកើតទុកមិនសុខចិត្តលើការអនុវត្តនីតិវិធីច្បាប់អ្វីមួយ បងប្អូនមានសិទ្ធិពឹងពាក់មេធាវីពិគ្រោះបញ្ហាសេវាផ្លូវច្បាប់ ព្រោះមេធាវីចេះច្បាប់ជាងបងប្អូនទាំងអស់គ្នា។ ម្យ៉ាងទៀតមេធាវីមានសិទ្ធិការពារផ្លូវច្បាប់ជូនបងប្អូនគ្រប់បទល្មើសទាំងអស់ មិនថាតែបទល្មើសរដ្ឋប្បវេណី ឬបទល្មើសព្រហ្មទណ្ឌឡើយ។ ឆ្លៀតឱកាសនៃការជួបជុំគ្នាខាងលើនេះដែរ លោកគួច ចំរើន ក៏បានពន្យល់ដល់បងប្អូនអាជីវករទាំងអស់ត្រូវធ្វើយ៉ាងណាទិញលក់គ្រឿងអលង្ការគ្រប់ប្រភេទចាំបាច់ត្រូវមានវិក្កយបត្រទិញលក់ឱ្យបានត្រឹមត្រូវ។ លើសពីនេះទៅទៀតបងប្អូនអាជីវករទិញលក់គ្រឿងអលង្ការទាមទារឱ្យមានសាវតារជាតិ ឬសាក្សីអ្នកទិញលក់ឱ្យបានត្រឹមត្រូវ ទើបពេលមានបញ្ហាពាក់ព័ន្ធបទល្មើសកើតឡើងបងប្អូនមានឯកសារខ្លះគ្រាន់ធ្វើជាភស្តុតាងបង្ហាញដល់ភ្នាក់ងារមានសមត្ថកិច្ច ចៀសវាងមានបញ្ហាកើតឡើងបងប្អូនមានតែដៃទទេ។ ដូច្នេះក្រៅពីនេះគ្មានមធ្យោបាយណាជួយដោះស្រាយបងប្អូនបានឡើយ។
ក្រុមមន្ត្រីខ្លះនិយាយថា បងប្អូនអាជីវកររកស៊ីទទួលទានមុខរបរទិញលក់គ្រឿងអលង្ការតែងតែពុំសូវបានគិតពីបញ្ហាផ្លូវច្បាប់ឡើយ គឺឱ្យតែមានអតិថិជនយកមាស ឬប្លាទីនទៅលក់គឺទិញភ្លាមៗ ឆៅៗមិនបានគិតពីផលវិបាកផ្លូវច្បាប់ដែលអាចនឹងកើតមានឡើង។ ថ្វីដ្បិតតែមាសប្រាក់យកដុតរំលាយបានមែន ប៉ុន្តែពាក់ព័ន្ធនឹងបទល្មើសដែលច្បាប់បានចែងសម្រាប់អនុវត្តក្នុងសង្គម ពុំអាចរលត់បានឡើយ លើកលែងតែផុតអាជ្ញាយុកាលច្បាប់ប៉ុណ្ណោះ។
ទាក់ទិននឹងការចោទប្រកាន់លើក្រុមសមត្ថកិច្ចនគរបាលដែលពាក់ព័ន្ធជាមួយក្រុមអាជីវករខាងលើនេះ ពុំមានមន្ត្រីពាក់ព័ន្ធណាមួយចេញមុខបំភ្លឺ ឬបកស្រាយពីការចោទប្រកាន់របស់ក្រុមអាជីវករឡើយ។ ក្រុមអ្នកច្បាប់ខ្លះនិយាយថា បញ្ហាខាងលើនេះវាពិតជាធ្លាប់កើតមានប្រាកដមែន ទៅលើមន្ត្រីខិលខូចដែលអនុវត្តច្បាប់ហួសស្ថានទម្ងន់ទោសនៃច្បាប់។ បងប្អូនអាជីវករវិញក៏ល្មមយល់អំពីផ្លូវច្បាប់ខ្លះៗហើយ ពាក់ព័ន្ធនឹងមុខរបររបស់ខ្លួន៕
ចែករំលែកព័តមាននេះ