ខេត្តព្រះសីហនុ ៖ ត្រីផ្សោតសមុទ្រមួយក្បាលបានងាប់អណ្តែតមកទើរនៅតាមឆ្នេរពយជំទាវម៉ៅ ស្ថិតក្នុងស្រុកព្រៃនប់ ខេត្តព្រះសីហនុ កាលពីយប់រំលងអធ្រាត្រឈានចូលថ្ងៃទី១៩ខែកក្កដា ឆ្នាំ២០២១ ពិតជាធ្វើឱ្យមានការសោកស្តាយដែលជាប្រភេទសត្វកម្រនេះ ។
មន្ត្រីជំនាញជលផលខេត្តព្រះសីហនុបានឲ្យដឹងថា តាមការពិនិត្យលើត្រីផ្សោតនេះ គឺមានទម្ងន់ប្រហែលជិត១០០គីឡូក្រាម ត្រីនេះមានបណ្តោយ២,២៤ម. ទទឹង០,៦០ម ជាប្រភេទផ្សោតឃ្លៀច (Indo-Pacific humpoback dolphin) ឈ្មោល។
ប្រភពខាងលើបានបញ្ជាក់ទៀតថា ផ្សោតប្រភេទនេះ មាននៅតំបន់កោះព្រីង , ឆ្នេរខែមខាងមុខឆ្នេររាម ,ប្រជុំកោះរ៉ុង ជាប្រភេទសត្វកម្រដែលត្រូវការពារដោយអនុក្រឹត្យលេខ១២៣ អ.ន.ក្រ។ យោងតាមការសន្និដ្ឋាន ពីមន្ត្រីជំនាញជលផលថា ត្រីផ្សោតឃ្លៀចនេះ បានងាប់ដោយសារជាប់ឧបករណ៍នេសាទ(មង)រួចវាខំប្រឹងរើបំរះថមថយកម្លាំងធ្វើឲ្យមានស្នាមរបួសពេញខ្លួន ។ ក្រោយពិនិត្យ ខ្មោចត្រីផ្សោតត្រូវបានមន្ត្រីជលផលយកទៅកប់នៅកន្លែងដែលមិនមានប៉ះពាល់ដល់បរិស្ថាន។
ចែករំលែកព័តមាននេះ