រាជធានីភ្នំពេញ ៖ ធៀបនឹងវត្តមានរបស់គូអន្តរជាតិនៅវេលាព្រឹកខានស្អែក ការប្រកួតអន្តរជាតិនៅលើសង្វៀនទូរទស្សន៍អាស៊ីអាគ្នេយ៍នៅវេលាយប់ខានស្អែករឹតតែមានការរំពឹងខ្ពស់ទៅទៀតថា នឹងកក្រើកអ្នកទស្សនានៅគ្រប់ទិសទី
រាជធានីភ្នំពេញ ៖ ធៀបនឹងវត្តមានរបស់គូអន្តរជាតិនៅវេលាព្រឹកខានស្អែក ការប្រកួតអន្តរជាតិនៅលើសង្វៀនទូរទស្សន៍អាស៊ីអាគ្នេយ៍នៅវេលាយប់ខានស្អែករឹតតែមានការរំពឹងខ្ពស់ទៅទៀតថា នឹងកក្រើកអ្នកទស្សនានៅគ្រប់ទិសទី បន្ទាប់ពីមានការប្រកាសថា កីឡាករល្បីឈ្មោះពីររូបគឺជើងខ្លាំងវ័យក្មេងទើបឡើងកូដគង់ ហូវ និងរឿង សោភ័ណ្ឌ ត្រូវគេឱ្យប៉ះប្រកួតជាមួយកីឡាករថៃនៅក្នុងព្រឹត្តិការណ៍«កំពូលអ្នកប្រដាល់ប្លេកខេត» ។ នេះជាការប៉ះប្រកួតដែលមានការចាប់អារម្មណ៍ខ្លាំង ជាពិសេសចំពោះគូប្រកួតរវាងគង់ ហូវ និងកីឡាករថៃ ដោយសារតែកីឡាករកម្ពុជារូបនេះ គឺជាគ្រាប់ពេជ្រថ្មីដ៏ទាក់ទាញនៅក្នុងពិភពប្រដាល់ ។
ទោះជាទើបឡើងកូដ ប៉ុន្តែអ្នកស្នេហាវិស័យប្រដាល់យ៉ាងហោចច្រើនជាងពាក់កណ្ដាល បានកត់សម្គាល់ពីស្នាដៃ និងលទ្ធភាពធ្វើបានរបស់កីឡាករវ័យក្មេងគង់ ហូវ នៅលើសង្វៀន ។ ការប្រកាសឲ្យគេឡើងប្រកួតនៅក្នុងព្រឹត្តិការណ៍របស់ក្រុមហ៊ុនស្រាបៀរប្លេកខេតយប់ខានស្អែក បានក្លាយជាការចោទសួរ និងតាមដានយ៉ាងផុលផុស ថាគេនឹងមានសំណាងដូចគ្នានឹងអ្វីដែលធ្លាប់រំលេចឡើងកន្លងមក ឬអាចស៊យក្រោមដៃគូប្រកួតមកពីខាងក្រៅ ។ ការប្រកួតដែលធ្វើឡើងចាប់ពីម៉ោង៨យប់នៅថ្ងៃអាទិត្យស្អែកនេះ គេត្រូវប៉ះប្រកួតជាមួយកីឡាករល្បីឈ្មោះគួរសម ដែលមានអ្នកទទួលស្គាល់កម្រិតប្រកួតរួចទៅហើយ គឺកីឡាករផា យ៉ាណន់ ។
អ្នកទាំងពីរប្រកួតគ្នាក្នុងប្រភេទទម្ងន់៥៧គីឡូក្រាម ហើយក៏ជាការប្រកួតបើកឆាកដើម្បីពង្រីកប្រជាប្រិយភាពរបស់ភាគីកម្ពុជា បន្ទាប់ពីគេបានឈានឡើងក្នុងតំណែងជួរមុខជាបណ្ដើរនៅលើសង្វៀនក្នុងស្រុកនោះផងដែរ ។ កីឡាករគង់ ហូវ ទាំងវ័យក្មេង និងកម្លាំងស៊ុហ្វពេញខ្លួន គេថែមទាំងមានបច្ចេកទេស និងមានទឹកចិត្តតស៊ូចំពោះគូប្រកួតទៀតផង ។ លោកតឹក ឡៃ ជាគ្រូបង្វឹកហាក់មានជំនឿចិត្តចំពោះកូនសិស្សរបស់ខ្លួនយ៉ាងខ្លាំង ដោយសារតែលោកបានអះអាងថា កីឡាករគង់ ហូវ កំពុងពោរពេញដោយទឹកចិត្តចង់ប្រយុទ្ធ ហើយមានការប្រឹងប្រែងហ្វឹកហាត់ខុសពីកីឡាករល្បីឈ្មោះមួយចំនួន ដែលមើលស្រាលការប្រកួត ហើយចំណាយពេលតែ២ថ្ងៃ ឬ៣ថ្ងៃ ចូលក្លិបមុនឡើងសង្វៀន។ លោកតឹក ឡៃ មានជំនឿថា កូនសិស្សរបស់ខ្លួន បើទោះជាថ្មីមិនសូវមានបទពិសោធន៍ប៉ះប្រកួតជាមួយកីឡាករបរទេស ប៉ុន្តែលោកថាការប៉ះគ្នាជាមួយកីឡាករមកពីថៃ ផា យ៉ាណន់ សម្រាប់យប់ស្អែក ពិតជាធ្វើឲ្យសង្វៀន Black Cat កក្រើក និងទទួលស្គាល់ស្នាដៃកូនសិស្សលោកមិនខាន ។
ទោះមិនទាន់រំពឹងថាឈ្នះ១០០ភាគរយនៅឡើយក៏កូនសិស្សលោកដែលមានការត្រៀមទុកក្នុងការហ្វឹកហាត់ប្រកួតដោយការតាំងចិត្តតាំងពីចម្ងាយនោះពិតជាអាចកំដរកីឡាករថៃដោយអស់ពីសមត្ថភាពបាន ។
កីឡាករគង់ ហូវ ទើបតែមានប្រវត្តិឡើងប្រកួតបាន៥១លើក ឈ្នះ៤១លើក និងចាញ់១០លើកប៉ុណ្ណោះ ប៉ុន្តែជាការកត់សម្គាល់គឺកម្រិតប្រកួតប៉ុន្មានលើកចុងក្រោយរបស់កីឡាកររូបនេះ ល្អរស់វើក និងមានជ័យជម្នះស្ទើរគ្រប់លើក ដែលសូម្បីតែគូប្រកួតដែលជាកីឡាករខ្លាំងរបស់គេក៏ភ្ញាក់ផ្អើល ។ អ្នកទស្សនាបានហៅសន្ទុះឈានឡើងរបស់កីឡាកររូបនេះថាឡើងកូដ ដោយសារតែគេអាចកែទម្រង់ប្រកួតបានកាន់តែល្អ មិនខុសពីក្របីឡើងក ឬហៅថាកីឡាករដែលពេញដោយឆន្ទៈ និងកម្លាំងប្រយុទ្ធមិនរាថយនោះ ។ សម្រាប់កីឡាករថៃវិញ ក៏មានតួលេខឡើងរេញមិនលើសពីគេប៉ុន្មានដែរ ប៉ុន្តែគេជាកីឡាករដែលស្ថិតនៅក្នុងបរិយាកាសដែលមានការបំប៉ន និងមានគ្រឹះប្រយុទ្ធរឹងមាំជាងកម្ពុជា ។
ដូច្នេះបើទោះជាមានបទពិសោធន៍ទើបតែបាន៥៩លើក ឈ្នះ៤៧លើក ចាញ់១១លើក និងស្មើ១លើក ក៏ស្ថានភាពថែបំប៉នសុខភាព និងការហ្វឹកហាត់របស់កីឡាករថៃល្អជាងកីឡាករកម្ពុជានោះដែរ ។ ការប្រកួតសម្រាប់យប់ស្អែកបើគង់ ហូវ បរាជ័យនឹងក្លាយជាបទពិសោធន៍ ប៉ុន្តែបើឈ្នះដូចគ្នានឹងអ្វីដែលគេសម្រេចបានជាមួយកីឡាករក្នុងស្រុកនាំឲ្យមានការកត់សម្គាល់ នោះគឺក្រេឌីតរបស់កីឡាករវ័យក្មេងរូបនេះ នឹងបោះជំហានដាច់ឆ្ងាយ ហើយក្រេឌីតឡើងប៉ះកីឡាករអន្តរជាតិ ក៏ស្ថិតនៅក្នុងកណ្ដាប់ដៃរបស់គេរកពេលសម្រាកលែងបាន មិនចាញ់កីឡាករល្បីឈ្មោះចាស់វស្សានោះដែរ។
មួយគូអន្តរជាតិទៀត គឺរឿង សោភ័ណ្ឌ ត្រូវគេឲ្យប៉ះប្រកួតជាមួយកីឡាករមកពីសហព័ន្ធថៃឈ្មោះឌី ប៊េនចុង ក្នុងប្រភេទទម្ងន់៦៩គីឡូក្រាម ។ ការប៉ះគ្នាលើកដំបូងរបស់គូនេះ ក៏មានអ្នកចាំឃ្លាំមើលមិនតិចដែរ ដោយសារតែកីឡាករថៃ ឌី ប៊េនចុង គឺជាកីឡាករថ្មីមិនធ្លាប់មកប្រកួតនៅកម្ពុជា ហើយមានការបញ្ជាក់ថា កីឡាករមិនថាខាងកម្ពុជា និងថៃ លុះត្រាតែមានក្រេឌីតខ្ពស់ ទើបអាចមានមុខឡើងប្រកួតនៅលើសង្វៀនអន្តរជាតិរបស់ក្រុមហ៊ុនស្រាបៀរBlack Cat នេះបាន ។ មានការបញ្ជាក់ច្រើនដងមកហើយថា ក្រុមហ៊ុនស្រាបបៀរប្លេកខេត បានចំណាយទុនខ្ពស់ជាមួយកម្មវិធីប្រដាល់អន្តរជាតិផ្សេងៗ ក្នុងការបញ្ជូនកីឡាករថៃល្អៗឲ្យមកប្រកួតនៅលើសង្វៀនរបស់ខ្លួន ដោយបានទាំងឃ្លាំមើលវត្តមានកីឡាករកម្ពុជាដែលត្រូវកំណត់ឲ្យឡើងរេញនោះយ៉ាងម៉ត់ចត់នោះផង ។ អ៊ីចឹងហើយ ទើបគេកត់សម្គាល់ថា កីឡាករកម្ពុជាបើទោះជាល្អប៉ុនណា ក៏ពិបាកទទួលជ័យជម្នះនៅលើសង្វៀនរបស់ស្រាបៀរប្លេកខេតនេះដែរ ដោយសារតែវត្តមានរបស់កីឡាករថៃភាគច្រើនជាកីឡាករលំដាប់ជួរមុខ។
មន្ត្រីទូរទស្សន៍អាស៊ីអាគ្នេយ៍ បានបញ្ជាក់ច្រើនលើកមកហើយថា ព្រឹត្តិការណ៍ប្រដាល់អន្តរជាតិ «កំពូលអ្នកប្រដាល់ប្លេកខេត» គឺពិបាកស្វែងរកកីឡាករកម្ពុជាល្អៗឲ្យមកប្រកួតជាមួយថៃ ដោយសារតែក្រុមហ៊ុនបានចុះកុងត្រាជាមួយអ្នកដឹកនាំកីឡាករថៃ ឲ្យយកតែកីឡាករដែលមានសមត្ថភាពឲ្យមកប្រកួតដាច់ខាត ដើម្បីឲ្យការប្រដាល់ពេលយប់ទទួលបានការចាប់អារម្មណ៍ខ្ពស់ ។ ព្រឹត្តិការណ៍នេះរមែងធ្វើឲ្យកីឡាករកម្ពុជាដែលមានអំនួត ហើយមើលស្រាលការហ្វឹកហាត់បរាជ័យ ។
ជាក់ស្ដែងកីឡាករ ឌី ប៊េនចុង មានការប្រកួត១០២ដង ឈ្នះ៨២ដង ចាញ់១៦ដង និងស្មើ៤ដងរួចមកហើយ ដែលតួលេខនេះបង្ហាញយ៉ាងច្បាស់ថា ទាំងបទពិសោធន៍ និងសមត្ថភាពរបស់គេគឺមិនធម្មតា។ បើទោះជារឿង សោភ័ណ្ឌ ធ្លាប់ប្រកួតបានដល់១៣៩ដង ឈ្នះ១២៦ដង ចាញ់១១ដង និងស្មើ២ដង ប៉ុន្តែគេមិនទាន់ដឹងនៅឡើយទេថានឹងមានលទ្ធផលបែបណា0x017d7 យ៉ាងណាក៏ដោយ គេជឿថាបើកីឡាករថៃ មិនវ៉ៃឲ្យឈ្នះដាច់ទេ លទ្ធផលស្មើនឹងអាចកើតឡើង ដោយសារការកត់សម្គាល់ បើត្រឹមកីឡាករថៃឈ្នះពិន្ទុតិចតួច គឺគេច្រើនឲ្យស្មើ ដើម្បីកុំឲ្យរឿង សោភ័ណ្ឌ បាក់មុខ ហើយអន់ចិត្ត ៕
ចែករំលែកព័តមាននេះ