រាជធានីភ្នំពេញ ៖ វត្តបុទុមវតី ដែលមានទីតាំងតាមបណ្តោយវិថីឧកញ៉ា ស៊ូ ស្រ៊ុន ស្ថិតក្នុងភូមិ៣ សង្កាត់ចតុមុខ ខណ្ឌដូនពេញ ត្រូវបានបិទខ្ទប់ការចេញ-ចូលជាបណ្តោះអាសន្នរយៈពេល១៤ថ្ងៃ។ ក្រោយពីក្រុមគ្រូពេទ្យ TYDA បានយកសំណាកលើកទី១ ចំនួនសរុប៤០២អង្គនាក់ ( ព្រះសង្ឃចំនួន ១៧៧អង្គ, និស្សិតចំនួន២១៥នាក់, យាជីតាជីចំនួន០៧នាក់, ជាងសំណង់ចំនួន០៤នាក់ ) ហើយរកឃើញអ្នកវិជ្ជមានកូវីដ១៩ ចំនួន២០អង្គ/នាក់ ក្នុងនោះរកឃើញរួមមាន ព្រះសង្ឃចំនួន១០អង្គ និងសិស្ស និស្សិតចំនួន១០នាក់ ។
លោក សុខ ពេញវុធ អភិបាលខណ្ឌដូនពេញ បានបញ្ជាក់ថា នៅរសៀលថ្ងៃច័ន្ទ ទី១៩ ខែកក្កដា ឆ្នាំ២០២១ វេលាម៉ោង១រសៀល រហូតដល់ម៉ោង៦និង៣០នាទីល្ងាច ក្រុមគ្រូពេទ្យ TYDA បានសហការជាមួយគណៈបញ្ជាការឯកភាពខណ្ឌដូនពេញ យកសំណាកលើកទី១ នៅវត្តបុទុមវតី ជាលទ្ធផលរកឃើញអ្នកវិជ្ជមានចំនួន២០អង្គ/នាក់ ក្នុងនោះមានព្រះសង្ឃចំនួន១០អង្គ និងសិស្ស និស្សិតចំនួន១០នាក់ ហើយក៏ត្រូវបានក្រុមគ្រូពេទ្យបញ្ជូនទៅសម្រាកព្យាបាលនៅមណ្ឌលព្យាបាលទួលពង្រ ។
លោកអភិបាលខណ្ឌដូនពេញ បញ្ជាក់បន្តថា ហើយនៅរសៀលថ្ងៃដដែលនោះ ដោយមានការសហការជាមួយនឹងសាលាសង្កាត់ចតុមុខ និងប៉ុស្តិ៍រដ្ឋបាលចតុមុខ បានបិទវត្តជាបណ្តោះអាសន្នរយៈពេល ១៤ថ្ងៃ ដោយគិតចាប់ពីថ្ងៃទី១៩ នេះទៅ ដោយមិនអោយមានអ្នកណាម្នាក់ចេញ ឬចូលវត្តនោះឡើយ និងម្យ៉ាងទៀត ដើម្បីតម្រូវអោយព្រះសង្ឃ តាអាចារ្យ តាជី យាយជី ដែលនៅសេសសល់បន្តធ្វើចត្តាឡីស័កជាបន្តទៅទៀតផងដែរ។
គួរបញ្ជាក់ផងដែរថា កាលពីរសៀលថ្ងៃទី១៨ ខែកក្កដា ឆ្នាំ២០២១ ក្រុមគ្រូពេទ្យស្ម័គ្រចិត្ត TYDA បានសហការជាមួយនឹងអាជ្ញាធរមូលដ្ឋាន ខណ្ឌចំការមន បានចុះធ្វើសំណាករកវីរុសកូវីដ១៩ ទៅលើព្រះសង្ឃ តាអាចារ្យ តាជី យាយជី និងសិស្សនិស្សិតស្នាក់នៅក្នុងវត្តទួលទំពូង សរុបចំនួន១១៦អង្គ/នាក់ជាលទ្ធផលរកឃើញអ្នកវជ្ជមានកូវីដ១៩ ចំនួន៤៣អង្គ/នាក់ ក្នុងនោះព្រះសង្ឃចំនួន២០អង្គ។
ដោយឡែកកាលពីថ្ងៃទី១៥ ខែកក្កដា កន្លងមកនេះ វត្តវ៉ារិន្ទ ហៅវត្តព្រែកលៀប ស្ថិតនៅសង្កាត់ព្រែកលៀប ខណ្ឌជ្រោយចង្វា ត្រូវបិទខ្ទប់បណ្តោះអាសន្នរយ:ពេល១៤ថ្ងៃ ក្រោយពីក្រុមគ្រូពេទ្យយកសំណាកចំនួន១០៤អង្គ/នាក់ ក្នុងនោះមានព្រះសង្ឃចំនួន៨៥នាក់ រកឃើញវិជ្ជមានកូវីដ១៩ ចំនួន២០អង្គ ៕
ចែករំលែកព័តមាននេះ