រាជធានីភ្នំពេញ ៖ កម្លាំងល្បាតនៃអធិកាដ្ឋានខណ្ឌចំការមន ល្បាតពួនស្ទាក់ក្នុងមូលដ្ឋានប្រទះឃើញជនសង្ស័យចំនួន២នាក់ជិះម៉ូតូ ដើរធ្វើសកម្មភាព ទាក់សុនខ (ឆ្កែ) របស់ប្រជាពលរដ្ឋបានធ្វើការប្រដេញតាមឃាត់ក៏ត្រូវក្រុមជនសង្ស័យជិះម៉ូតូរត់គេចខ្លួន ដល់សំបុកខ្លួនរស់នៅ
ហើយផ្តួលម៉ូតូចោល រត់គេចខ្លួន ចូលទន្លេបាត់ស្រមោល បន្សល់ទុកឆ្កែមួយការ៉ុងធំចំនួន៦ក្បាល និងម៉ូតូ១គ្រឿងត្រូវបានសមត្ថកិច្ចដកហូតនាំយកមករក្សាទុកនៅអធិកាដ្ឋានខណ្ឌចំការមន កាលពីវេលាម៉ោង២ និង៣០នាទី រំលងអធ្រាត្រ ថ្ងៃទី២០ ខែកក្កដា នេះ នៅច្រកចូលភូមិសាមគ្គី ផ្លូវជាតិ៥ សង្កាត់ ឫស្សីកែវ ខណ្ឌឫស្សីកែវ ។
ប្រភពពីកម្លាំងល្បាតនៃអធិកាដ្ឋានខណ្ឌចំការមន បានប្រាប់ឲ្យដឹងថា មុនពេលកើតហេតុកម្លាំងសមត្ថកិច្ចកំពុងល្បាតពួនស្ទាក់ក្នុងមូលដ្ឋានដល់ចំនុចផ្លូវបំបែកជា៥ ក្នុងសង្កាត់ទួលទំពូង២ ក៏ប្រទះឃើញជនសង្ស័យចំនួន២នាក់ ជិះម៉ូតូមួយគ្រឿងម៉ាកហុងដា វ៉េវ ពណ៌ខ្មៅ ពាក់ស្លាកលេខ កំពង់ចាម 1J-3431 ដឹកឆ្កែមួយការ៉ុងធំ នៅពីមុខម៉ូតូ ហើយនៅបន្តធ្វើសកម្មភាព ទាក់សុនខ ប្រជាពលរដ្ឋមួយក្បាលទៀតនៅម្តុំផ្លូវបំបែកជា៥ ។
តែត្រូវសមត្ថកិច្ចឃើញទាន់ក៏ប្រដេញឃាត់ខ្លួនធ្វើឲ្យជនសង្ស័យភ័យស្លន់ស្លោបន្ថែមល្បឿនម៉ូតូបើករត់គេចខ្លួនលឿនដូចហោះបើករត់ដល់ផ្លូវជាតិលេខ៥ ដល់ច្រកចូលភូមិសាមគ្គី ជនសង្ស័យទាំងពីរនាក់ក៏បត់ចូលក្នុងប្លុកខ្លួនរស់នៅដល់ច្រាំងទន្លេក៏ផ្តួលម៉ូតូចោល រត់ចូលទឹកទន្លេបាត់ស្រមោលនៅសល់តែម៉ូតូ និងសុនខ មួយការ៉ុងធំ ត្រូវបានសមត្ថកិច្ចនាំរក្សាទុកនៅអធិកាដ្ឋានខណ្ឌចំការមន ចាត់ការតាមនិតិវិធី ៕
ចែករំលែកព័តមាននេះ