ខេត្តស្វាយរៀង៖ នៅថ្ងៃទី១៩ ខែកក្កដា ឆ្នាំ២០២១ រដ្ឋបាលខេត្តស្វាយរៀង បានប្រកាសនូវអត្តសញ្ញាណអ្នកវិជ្ជមានកូវីដ១៩ ថ្មី ចំនួន ៨៣នាក់ (ស្ត្រី ៤០នាក់)។ ក្នុងនោះ មានកម្មករ-កម្មការិនីរោងចក្រ ចំនួន ២០នាក់ ករណីឆ្លងលើអ្នកប៉ះពាល់ផ្ទាល់ជាមួយអ្នកកូវីដ១៩ ចំនួន ០៨នាក់ លើអ្នកមានការសង្ស័យ ១៩នាក់ និងអាជីវករផ្សារកំពង់ត្រាច ៣៤នាក់។
ចំពោះអ្នកវិជ្ជមានកូវីដ១៩ ចំនួន ៨៣នាក់ ត្រូវបានបញ្ជូនទៅសម្រាកព្យាបាល នៅមន្ទីពេទ្យស្រុកស្វាយជ្រំ ចំនួន ១៦នាក់ បញ្ជូនទៅមន្ទីរពេទ្យបង្អែកសាមគ្គីរំដួល ៣នាក់ និងបញ្ជូនទៅមជ្ឈមណ្ឌលព្យាបាលកូវីដ១៩ ក្រុងបាវិត ចំនួន ៦៤នាក់។
ករណីស្លាប់ថ្មី ម្នាក់ គឺជាបុរសឈ្មោះ ស្វាយ ឈាន អាយុ ៦៥ឆ្នាំ ជាប្រជាពលរដ្ឋនៅភូមិទទា សង្កាត់សង្កាត់ចេក ក្រុងស្វាយរៀង។ នៅថ្ងៃទី៨ ខែកក្កដា ឆ្នាំ២០២១ ដោយមានការសង្ស័យមានជំងឺកូវីដ១៩ ក្រុមការងារស្រាវជ្រាវ តាមដានពេលធ្វើចត្តាឡីស័ក នៅផ្ទះ បានយកសំណាកធ្វើតេស្តរហ័ស ក៏ឃើញវិជ្ជមានកូវីដ១៩ ហើយបញ្ជូនទៅសម្រាកព្យាបាល នៅមន្ទីរពេទ្យស្រុកស្វាយជ្រំ ជាច្រើនថ្ងៃ។ ដោយស្ថានភាពជំងឺវិវត្តកាន់តែធ្ងន់ធ្ងរ សម្ពាធឈាមចុះខ្សោយ បុរសអ្នកជំងឺបានស្លាប់បាត់បង់ជីវិត នៅថ្ងៃទី១៨ ខែកក្កដា ឆ្នាំ២០២១ វេលាម៉ោង ៣រសៀល ដោយសារកូវីដ១៩។
គិតត្រឹមថ្ងៃទី១៨ ខែកក្កដា ឆ្នាំ២០២១ នៅខេត្តស្វាយរៀង មានអ្នកវិជ្ជមានកូវីដ១៩ សរុប ៣៩៦៥នាក់ (ស្រី ២១៨៥នាក់) ជាសះស្បើយសរុប ៣១៥៣នាក់ (ស្រី ១៧៨៥នាក់) កំពុងសម្រាកព្យាបាល ចំនួន ៧៤៧នាក់ (ស្រី ៣៥៧នាក់)។ ករណីស្លាប់ កើនឡើងដល់ ៦៣នាក់ (ស្រី ៤២នាក់)៕
ចែករំលែកព័តមាននេះ