រាជធានីភ្នំពេញ ៖ គិតមកដល់ពេលនេះ ប្រជាពលរដ្ឋកម្ពុជាដែលបានចាក់វ៉ាក់សាំងការពារជំងឺកូវីដ-១៩ ដូសទី១ បានចំនួន ជិត៦លាននាក់ហើយ ខណៈដែលអ្នកចាក់វ៉ាក់សាំងដូសទី២ បានចំនួនជាង៤លាននាក់។ ហើយការងារនេះ រាជរដ្ឋាភិបាលបានជំរុញការចាក់ឲ្យបានរួចរាល់សម្រាប់មនុស្ស១០លាននាក់ ក្នុងរង្វង់ខែតុលា ឬខែវិច្ឆិកា ឆ្នាំ២០២១ខាងមុខនេះ មានន័យថានឹងអាចបញ្ចប់មុនផែនការមេរហូតដល់៧ទៅ៨ខែ។
នេះបើតាមការបង្ហាញឱ្យដឹងក្នុងប្រជុំតាមរយៈការបញ្ជូនរូបភាព និងសំឡេង (Video Conference) ក្រោមអធិបតីភាព លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ១៩ (គ.ប.ក) ដោយមានការចូលពីលោក ឃួង ស្រេង អភិបាលនៃគណៈអភិបាលរាជធានីភ្នំពេញនាល្ងាចថ្ងៃទី១៩ ខែកក្កដា ឆ្នាំ២០២១នេះ នៅសាលារាជធានីភ្នំពេញ។ ក្នុងកិច្ចប្រជុំនោះ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា បានបញ្ជាក់ឲ្យដឹងថា៖
ប្រជាពលរដ្ឋដែលបានចាក់វ៉ាក់សាំងការពារជំងឺកូវីដ-១៩ ដូសទី១ មានចំនួន ៥.៩១២.៥៤៥នាក់ (ស្រី ២.៩៤៥.៦៨២នាក់ ស្មើនឹង ៤៩,៨២%) ប្រជាពលរដ្ឋដែលបានចាក់វ៉ាក់សាំងទាំង ២ដូស មានចំនួន ៤.១៣១.០៥៧នាក់ ស្មើនឹង ៦៩,៨៧%នៃចំនួនអ្នកបានចាក់ដូសទី១ (ស្រី៖ ១.៤០២.៣១០នាក់ ស្មើនឹង ៤៨.៣១%) លោកស្រីបន្តថា អង្គការ WHO និង UNICEF មានចំណាប់អារម្មណ៍ខ្ពស់លើការងារចាក់វ៉ាក់សាំង តាមរយៈការចូលរួមចុះពិនិត្យដល់ទីតាំងចាក់វ៉ាក់សាំងផ្ទាល់ ដែលបានជួយផ្សាយនូវព័ត៌មាន ដល់អន្តរជាតិ អំពីការយកចិត្តទុកដាក់ប្រកបដោយភាពវៃឆ្លាត និងគតិបណ្ឌិតរបស់សម្តេចតេជោនាយករដ្ឋមន្ត្រី លើការផ្តល់លទ្ធភាពក្នុងការទទួលបាន វ៉ាក់សាំងដោយស្មើភាពគ្នា និងមានសន្ទុះលឿន ជូនដល់ប្រជាជនកម្ពុជា និងជនបរទេស ដែលកំពុងបំពេញបេសកម្ម និងរស់នៅស្របច្បាប់នៅកម្ពុជា។
ចំពោះការសម្រេចពីប្រមុខរាជរដ្ឋាភិបាល និងសំណូមពរ លោកស្រី បានលើកឡើងទៀតថា ដោយសារមានវ៉ាក់សាំងនៅសល់ក្នុងស្តុកចំនួន ៨០១, ២០១ដូស នៅឃ្លាំងឱសថកណ្ដាល យោងតាមការណែនាំរបស់ សម្ដេចតេជោនាយករដ្ឋមន្ដ្រី នាព្រឹកថ្ងៃទី១៩ ខែកក្កដា ឆ្នាំ២០២១នេះ ត្រូវដឹកវ៉ាក់សាំងនេះក្នុងចំនួន ៦០០,០០០ដួស ដើម្បីបញ្ជូនទៅតាមទីតាំងដែលមានតម្រូវការវ៉ាក់សាំងជាបន្តទៀត។ រីឯវ៉ាក់សាំងនៅសល់ចំនួន ៧៥៨,៨០២ ដូស នៅខាងកងទ័ព គ.វ.ក-១៩ គោរពស្នើសុំឱ្យធ្វើការបង្វែរមក គ.វ.ក-១៩ វិញ ឬក៏ធ្វើផែនការចាក់ជាមួយ គ.វ.ក-១៩ ឱ្យបានច្បាស់លាស់ ដើម្បីឱ្យមានសុង្កតភាពជាមួយផែនការចាក់វ៉ាក់សាំង ជូនប្រជាពលរដ្ឋដែលមានអាយុពី ១៨ឆ្នាំឡើងទៅឱ្យគ្រប់គោលដៅចំនួន ១០លាននាក់។ លោកស្រីបន្តការចាក់ជូនប្រជាជនដែលនៅសេសសល់ប្រមាណជា ៧៣២,៤១១នាក់ទៀត ដែលត្រូវប្រើវ៉ាក់សាំងប្រហែលជា លើសពី១លានដូសបន្ថែមទៀត (ថ្មីៗនេះ សម្ដេចតេជោ បានអនុញ្ញាតឱ្យទិញសម្រាប់ត្រៀមប្រើប្រាស់វ៉ាក់សាំងចំនួន ១លានដូសបន្ថែម)។
យោងសាររបស់សម្តេចតេជោខាងលើដែរ នឹងប្រើប្រាស់កម្លាំងក្រុមគ្រូពេទ្យរដ្ឋ បើកយុទ្ធនាការចាក់វ៉ាក់សាំងដល់កុមារ និងយុវវ័យដែលមានអាយុ ១២ឆ្នាំ ដល់១៨ឆ្នាំ ប្រមាណជាជិត ២លាននាក់ ដែលនឹងត្រូវការវ៉ាក់សាំងប្រមាណជាជិត៤លានដូសផងដែរ៕ ដោយ ៖ ចន ណារិទ្ធ
ចែករំលែកព័តមាននេះ