ក្រុងប៉ោយប៉ែត ៖ អាជ្ញាធរ និងសមត្ថកិច្ចចម្រុះសៀមប្រមាណ៤០នាក់ប្រដាប់ដោយអាវុធ M16 ចំនួន១០ដើម និងមានទាំងអ្នកកាសែតផង បានចូលមកបង្គោលឡាក់ព្រំដែនលេខ៣៦ ជាលើកទី២ កាលពីវេលាម៉ោង២និង២៥នាទី រសៀលថ្ងៃទី២៨ មីនា ជាឯកតោភាគី និងមិនបានផ្តល់សេចក្តីជូនដំណឹងជាមុនមកភាគីកម្ពុជាទេ ។ ភាគីសៀមនេះបានចូលមកជាលើកទី១ រហូតដល់ទៅ២ដង កាលពីថ្ងៃទី២៣ មីនា កន្លងមក ។
បង្គោលឡាក់ព្រំដែនលេខ៣៦ ដែលស្ថិតនៅក្នុងភូមិបន្ទាយមានឫទ្ធិ ឃុំគោករមៀត ស្រុកថ្មពួក ខេត្តបន្ទាយមានជ័យនេះ គឺឈមនឹងភូមិចាប់សាន់ ឃុំថាត់ថៃ ស្រុកតាប់ប្យា ខេត្តស្រះកែវរបស់ថៃ ។ បើតាមប្រភពព័ត៌មានបានឱ្យដឹងថា កម្លាំងចម្រុះដែលចូលមកនេះមានប៉ូលិសការពារព្រំដែនកងរយលេខ១២៦ ចំនួន១០នាក់ ប្រដាប់ដោយអាវុធ M16 ចំនួន១០ដើម ទាហានឈុតប៉ារ៉ា៦នាក់ តែមិនមានអាវុធទេ អភិបាលស្រុកតាប់ប្យា កម្លាំងឈុតខ្មៅមកពីក្រុងបាងកក និងប៉ូលិសអន្តោប្រវេសន៍ ។ កម្លាំងចម្រុះរបស់សៀមនេះ បានមកពិនិត្យប្រមាណ១៥នាទីគឺនៅម៉ោង២និង៤០នាទីរសៀលថ្ងៃដដែលក៏ត្រឡប់ទៅវិញ ។
លោកប្រាក់ សាំ នាយប៉ុស្តិ៍ព្រំដែនច្រកតំបន់បឹងត្រកួនបានប្រាប់តាមទូរស័ព្ទនៅល្ងាចថ្ងៃទី២៩ មីនា ថា ពិតជាមានការចូលមកពិនិត្យបង្គោលព្រំដែនលេខ៣៦ ពីសំណាក់អាជ្ញាធរ និងសមត្ថកិច្ចសៀមមែន ។ លោកបន្តថា ការចូលមករបស់ភាគីសៀមនេះគ្មានជូនដំណឹងទេ គឺគេមកពិនិត្យជាឯកតោភាគីតែម្តង ។ លោកបន្តទៀតថា ភាគីសៀមពិបាកយកពាក្យសម្តីធ្វើជាការណាស់ ដោយលោកប្រាប់ថា រាល់ការជួបគ្នានាពេលប្រជុំរាល់លើកគឺភាគីទាំង២ តែងតែនិយាយថា បើមានអ្វីត្រូវប្រាប់គ្នាជាមុន ហើយភាគីកម្ពុជាយើងបានប្រាប់ដែរថា បើចុះមកមើលបង្គោលឡាក់លេខ៣៦ គឺត្រូវប្រាប់ជាមុន បើមិនបាន៣ថ្ងៃមុនក៏មួយថ្ងៃមុនដែរ ។ ប៉ុន្តែទីបំផុតសៀមនៅតែមិនផ្តល់ដំណឹងដដែល ហើយចំពោះការពិនិត្យបង្គោលឡាក់នោះមួយដងជា២ដង មិនដឹងថា ខាងភាគីសៀមមានបំណងអ្វីទេ ។
- សភាថៃលើកពេលប្រជុំស្តីពីការអនុម័តលើកំណត់ហេតុរបស់ JBC ទៅថ្ងៃទី៥ មេសា
យោងតាមកាសែតឌឹណេស្សិនរបស់ថៃជាភាសាអង់គ្លេសនៅថ្ងៃទី២៩ មីនា ផ្សាយឱ្យដឹងថា កិច្ចប្រជុំរួមគ្នារវាងសភា និងព្រឹទ្ធសភាថៃ ដើម្បីពិភាក្សា និងពិចារណាពីការផ្តល់ការអនុម័តលើកំណត់ហេតុរបាយការណ៍ចំនួន៣របស់គណៈកម្មាធិការព្រំដែនចម្រុះ JBC ដែលគ្រោងធ្វើនៅថ្ងៃទី២៩ មីនា ត្រូវបានពន្យារពេលរហូតដល់ថ្ងៃ ទី៥ មេសា ខាងមុខ ដោយសារសមាជិកសភា និងព្រឹទ្ធសភាដែលចូលរួមមិនគ្រប់កូរ៉ុម។
កាសែតថៃដដែលបានឱ្យដឹងទៀតថា ដំបូងកិច្ចប្រជុំចាប់ផ្តើមដំណើរការតាមការគ្រោងទុក ប៉ុន្តែត្រូវបញ្ឈប់វិញ ក្រោយពីសមាជិកសភាគណបក្សភឿថៃ លោក Sunail Jullapong-sathorn ស្នើសុំពិនិត្យមើលកូរ៉ុម ។ មានតែសមាជិកសភា និងព្រឹទ្ធសភាចំនួន២៦២រូបប៉ុណ្ណោះ មានវត្តមាននៅក្នុងវិមានរដ្ឋសភាដោយខ្វះ១៥រូបទៀតទើបគ្រប់កូរ៉ុម ។ នេះជាលើកទី២ ហើយមិនបានប៉ុន្មានថ្ងៃផងដែលសភាថៃពន្យារពេលកិច្ចប្រជុំរបស់ខ្លួនទាក់ទងទៅនឹងការផ្តល់ការអនុម័តលើកំណត់ហេតុរបាយការណ៍ចំនួន៣របស់ JBC ដែលលើកទី១ គ្រោងធ្វើកាលពីថ្ងៃទី២៥ មីនា កន្លងមក ។
ដោយឡែក មុនពេលឈានដល់ការសម្រេចពន្យារពេលកិច្ចប្រជុំនោះ សមាជិកសភា និងព្រឹទ្ធសភា ដែលមានវត្តមាននៅក្នុងវិមានរដ្ឋសភាត្រូវបែកចែកជា២ក្រុមមានមតិយោបល់ផ្សេងគ្នា ក្នុងនោះមួយក្រុមមិនចង់ឱ្យសភាបោះឆ្នោតផ្តល់ការអនុម័តលើកំណត់ហេតុទាំង៣របស់ JBC ដោយលើកហេតុផលថា តុលាការធម្មនុញ្ញមិនទាន់សម្រេចថា តើកំណត់ហេតុទាំងនេះត្រូវបានចាត់ទុកថា ជាកិច្ចព្រមព្រៀងមួយដែលតម្រូវឱ្យមានការអនុម័តពីសភា ឬក៏អត់។ ក្រោយមកក្រុមនេះបានដាក់ញត្តិមួយជូនទៅតុលាការធម្មនុញ្ញដោយសមាជិកសភាមួយរូបរបស់គណបក្សប្រជាធិបតេយ្យកំពុងកាន់ អំណាច ហើយតុលាការធម្មនុញ្ញាក៏ព្រមទទួល យក រួចនឹងពិចារណាលើញត្តិនេះនៅថ្ងៃទី៣០ មីនា ។
ចំណែកមួយក្រុមទៀតចង់ឱ្យសភាពិចារណាមើល តែការអង្កេតដែលដាក់ដោយគណៈកម្មាធិការដឹកនាំដោយសមាជិកសភាគណបក្សប្រជាធិបតេយ្យ លោក Charoeun Khanthawong បានហើយមិនចាំបាច់ពិចារណាពីកំណត់ហេតុរបស់ JBC ទេ ។ ជាមួយគ្នានេះ ទាក់ទិននឹងការចូលរួមរបស់ភាគីថៃក្នុងកិច្ចប្រជុំ JBC និងកិច្ចប្រជុំ GBC ដែលគ្រោងរៀបចំឡើងនៅទីក្រុងបូហ្គ័រ ប្រទេសឥណ្ឌូណេស៊ីចាប់ពីថ្ងៃ៧ដល់ថ្ងៃទី៨ មេសា ខាងមុខ កាសែតបាងកកប៉ុស្តិ៍នៅថ្ងៃទី២៩ មីនា ផ្សាយឱ្យដឹងថា រដ្ឋមន្ត្រីក្រសួងការពារប្រទេសថៃលោកប្រាវីត វង្ស សុវុន អះអាងថា រូបលោកនឹងចូលរួមកិច្ចប្រជុំគណៈកម្មាធិការព្រំដែនទូទៅ GBC ដែលនឹងរៀបចំឡើងនៅក្នុងប្រទេសឥណ្ឌូណេស៊ីក្នុងលក្ខខណ្ឌប្រទេសឥណ្ឌូណេស៊ីជាផ្ទះមិនជាប់ពាក់ព័ន្ធជាម្ចាស់មួយកិច្ចប្រជុំនេះ ។
កាលពីប៉ុន្មានថ្ងៃកន្លងមកនេះ លោកឧត្តមសេនីយ៍ ប្រាវីត ថ្លែងថា រូបលោកនឹងមិនទៅចូលរួមកិច្ចប្រជុំ GBC នៅប្រទេសឥណ្ឌូណេស៊ី ទេ ដោយលោកលើកហេតុផលថា ជំលោះរវាងប្រទែសថៃ និងប្រទេសកម្ពុជាអាចដោះស្រាយដោយទ្វេភាគីមិនបាច់មានការជាប់ពាក់ព័ន្ធពីប្រទេសទី៣នោះទេ ប៉ុន្តែកាលពីថ្ងៃទី២៨ មីនាកន្លងមក លោកប្រាវីត ថ្លែងថា ចំពោះទីកន្លែងសម្រាប់កិច្ចប្រជុំ GBC គ្មានបញ្ហានោះទេធ្វើម៉េចកុំឱ្យប្រទេសជាម្ចាស់ផ្ទះចូលរួម៕
(អារុណ+សុខលី)
ចែករំលែកព័តមាននេះ