រាជធានីភ្នំពេញ ៖ ប៉ូ វ៉ាន់សក្តិ អ្នកប្រដាល់ជើងចាស់មកពីក្លិបគីសែមានរិទ្ធ និងយស់ សំអាល់ មកពីក្លិបឃ្លាំងមឿងកីឡា ដែលបានបាត់មុខអស់រយៈពេលជាច្រើនឆ្នាំមកហើយនោះ នៅថ្ងៃសៅរ៍ ទី១៩ ធ្នូ ខាបស្អែកនេះ បានណាត់ជួបគ្នានៅលើសង្វៀនស៊ីធីអិន សាកកណ្តាប់ដៃគ្នាដើម្បីរំលឹកវិជ្ជាគុនឡើងវិញ ។
ការលេចមុខនៅលើសង្វៀនរបស់កីឡាករទាំង២លើកនេះ ធ្វើឱ្យអ្នកតាមដានការប្រកួតភាគច្រើនចាប់អារម្មណ៍យ៉ាងខ្លាំង ដោយសារកន្លងមកអ្នកទាំង២សុទ្ធតែជាអ្នកប្រដាល់ជើងខ្លាំងនិងល្បីឈ្មោះដូចគ្នានិងមិនធ្លាប់ប៉ះគ្នាទៀតផង ។
ប៉ូ វ៉ាន់សក្តិ និងយស់ សំអាល់ រហូតមកទល់នឹងពេលនេះ មិនដឹងជាមានអ្វីប្រែប្រួលនោះទេ ប៉ុន្តែពីមុនមក ប៉ូ វ៉ាន់សក្តិ គឺជាអ្នកប្រដាល់ដែលមានផ្លែល្អគួរសម ជាពិសេសផ្លែកែងនិងជង្គង់របស់គេតែម្តង ពេលវាយចេញម្តងៗធ្វើឱ្យគូប្រកួតញាក់សាច់គ្រប់គ្នា ។ ទោះបីចិត្តកីឡាកររូបនេះរាងតូចបន្តិចមែន ប៉ុន្តែគាត់ល្អកម្ពស់ដែលអាចមានប្រៀបជាងគូប្រកួត ។
ចំណែក យស់ សំអាល់ វិញ បើទោះជាចាញ់ប្រៀបខាងកម្ពស់គូប្រកួតបន្តិចមែន តែកុំមើលស្រាលឱ្យសោះ ចិត្តរបស់គេសឿងខ្លាំងណាស់ និងមានស្បែកមុខក្រាស់ទៀតផង ។ កីឡាកររូបនេះមិនសូវពូកែប្រើស្នៀតកែង និងជង្គង់ទេ ប៉ុន្តែស្នៀតកណ្តាប់ដៃរបស់គេអាចវាយចេញបានរហ័ស និងមានទម្ងន់ធ្ងន់ទៀតផង ។ យស់ សំអាល់ ទោះបីមានចរិតឆាប់ឆេវឆាវបន្តិចមែន ប៉ុន្តែកម្រមាននរណាផ្តួលគេឱ្យសន្លប់ណាស់ ។ សម្រាប់ការប្រកួតលើកនេះអត់មានអ្នកណាហ៊ានទាយទុកថាគេនៅខ្លាំងដូចមុនទៀតឬក៏អត់នោះទេ ដូច្នេះបើចង់ដឹងថា អ្នកណាខ្លាំងជាងអ្នកណានោះ មានតែរង់ចាំអ៊ុតមើលការប្រកួតជាក់ស្តែងប៉ុណ្ណោះ ។
នៅលើសង្វៀនដដែលកីឡាករកង មករា មកពីក្លិបឃ្លាំងមឿងកីឡា ប្រកួតជាមួយកីឡាករផន ផល្លា មកពីក្លិបតាព្រហ្មមានជ័យបង្ក្រាបគ្រឿងញៀន ។ កីឡាករ ចាន់ រតនៈ មកពីក្លិបកងពលធំអន្តរាគមន៍លេខ៨ ភ្នំទ្រព្យ ប្រកួតជាមួយកីឡាករ សេន កុសល មកពីក្លិបមោងឫស្សីមរតកគុនខ្មែរ ខេត្តបាត់ដំបង ។ កីឡាករថៃ សក្តិសារៈ មកពីក្លិបកងទ័ពជើងទឹក ប្រកួតជាមួយកីឡាករ ឈាន រស្មី មកពីក្លិបខេត្តរតនៈគិរី និងកីឡាករ ផាន់ ជីវ័ន្ត មកពីក្លិបគជសារកីឡា ប្រកួតជាមួយកីឡាករ អ៊ុក ស៊ីម៉េង មកពីក្លិបសាលវ័ន្តកីឡា ៕
ចែករំលែកព័តមាននេះ