រាជធានីភ្នំពេញ ៖ ការប្រកួតកីឡាប៉េតង់ជ្រើសរើសជើងឯកអាស៊ី លើកទី១៩ ឆ្នាំ២០១៥ ដែលកម្ពុជាទទួលធ្វើជាម្ចាស់ផ្ទះនោះបានបើកដំណើរការជាផ្លូវការហើយកាលពីព្រឹកថ្ងៃទី១៧ធ្នូ នៅពហុកីឡដ្ឋានជាតិ ក្រោមអធិបតីភាពលោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានសហព័ន្ធកីឡាប៊ូល និងប៉េតង់កម្ពុជា ។
លោក ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា បានថ្លែងឱ្យដឹងថា ការប្រកួតកីឡាប៉េតង់ជ្រើសរើសជើងឯកអាស៊ី លើកទី១៩ នឹងប្រព្រឹត្តទៅរយៈពេល៣ថ្ងៃ គឺចាប់ពីថ្ងៃទី១៧រហូតដល់ថ្ងៃទី១៩ ធ្នូ ដែលមានអត្តពលិកមកពីបណ្ដាប្រទេសចំនួន១២ចូលរួម និងមានកិច្ចសហការជាមួយផ្នែកបច្ចេកទេសពីសហព័ន្ធកីឡាប៉េតង់អាស៊ីផងដែរ ។ ចំណែកប្រតិភូកីឡាដែលបានមកចូលរួមសរុបទាំងអស់មានចំនួន១៩០នាក់ ហើយវិញ្ញាសាដែលដាក់ឱ្យប្រកួតមានចំនួន៦ក្នុងនោះវិញ្ញាសាប្រកួតវាយយកពិន្ទុមាន៣មានផ្នែកបុរស ផ្នែកនារី និងផ្នែកយុជន និងវិញ្ញាសា៣នាក់ទល់នឹង៣នាក់ មាន៣ មានផ្នែកបុរស ផ្នែកយុវជន និងផ្នែកនារី ។លោកបានឱ្យដឹងទៀតថា ប្រតិភូកីឡាទាំង១៩០នាក់នេះ ការហូបចុក និងស្នាក់នៅគឺខាងក្រសួងជាអ្នករ៉ាប់រងទាំងស្រុង ។
លោករដ្ឋលេខាធិការក្រសួងអប់រំយុវជននិងកីឡាដដែល បានឱ្យដឹងទៀតថា ផ្អែកលើគោលនយោបាយជាតិស្ដីពីការអភិវឌ្ឍវិស័យអប់រំកាយនិងកីឡា និងផែនការយុទ្ធសាស្ត្រឆ្ពោះទៅឆ្នាំ២០២៣ ដែលកម្ពុជាធ្វើជាម្ចាស់ផ្ទះប្រកួតកីឡាស៊ីហ្គេមលើកទី៣២នោះ ក្រសួងអប់រំយុជននិងកីឡាបានធ្វើវិមជ្ឈការការងារទៅឱ្យសហព័ន្ធកីឡាជាតិ ក្នុងការរៀបចំការប្រកួតNational Championship,Sea Championship និងAsian Championship ។ ជាក់ស្ដែង ឆ្នាំ២០១៥នេះសហព័ន្ធកីឡាប៊ូល និងប៉េតង់កម្ពុជា បានរៀបចំការប្រកួត SEAPA លើកទី២កាលពីថ្ងៃទី២ដល់ថ្ងៃទី៥ មេសា ប្រកបដោយជោគជ័យ ។
លោកឧបនាយករដ្ឋមន្ត្រី សុខ អាន បានថ្លែងនូវការកោតសរសើរយ៉ាងខ្លាំងដល់ក្រសួងអប់រំយុវជន និងកីឡា ដែលបានរៀបចំកម្មវិធីប្រកួតមានភាពអធិកអធមក្រៃលែង។ មិនតែប៉ុណ្ណោះ លោកបានកោតសរសើរដល់មន្ត្រីសហព័ន្ធកីឡាប៊ូលនិងប៉េតង់កម្ពុជាដែលបានចូលរួមរៀបចំឱ្យមានព្រឹត្តិការណ៍នៃការប្រកួតនានាយ៉ាងច្រើននាពេលកន្លងមក ថែមទាំងបានបញ្ជូនកីឡាករ-កីឡាការិនីទៅចូលរួមប្រកួតនៅក្នុងព្រឹត្តិការណ៍ពិភពលោកទទួលបានមេដាយមាស មកជូនជាតិទៀតផង។ ជាក់ស្ដែង កីឡាការិនី កែ ឡេង ថ្មីៗនេះដណ្ដើមបានមេដាយមាសលើវិញ្ញាសាវាយយកពិន្ទុ និងអាចរក្សាបានតំណែងជាម្ចាស់ជើងឯកពិភពលោកឆ្នាំ២០១៣ទៀតផង ។ លទ្ធផលទាំងនេះបានមកដោយសារតែការខិតខំប្រឹងប្រែងហ្វឹកហាត់បានល្អ ។ លោកបញ្ជាក់ថា កីឡាមិនត្រឹមតែនាំមកនូវសុខុមាលភាព កម្លាំងមាំមួនប៉ុណ្ណោះទេ ថែមទាំងនាំមកនូវសាមគ្គីភាព មិត្តភាព និងកិច្ចសហប្រតិបត្តិការល្អជាមួយគ្នាទៀតផង ៕
ចែករំលែកព័តមាននេះ