រាជធានីភ្នំពេញ ៖ បន្ទាប់ពីលេចធ្លោក្រោយពីប្ដូរឈ្មោះថ្មីថា «ធា នុរាជ» កីឡាករដែលមានឈ្មោះដើមថា សូយ ភារម្យ រូបនេះ ត្រូវគេដាក់ឲ្យឡើងប្រកួតជាមួយកីឡាករថៃជាលើកទី១នៅលើសង្វៀនទូរទស្សន៍អាស៊ីអាគ្នេយ៍នៅវេលាព្រឹកខានស្អែក ។
រាជធានីភ្នំពេញ ៖ បន្ទាប់ពីលេចធ្លោក្រោយពីប្ដូរឈ្មោះថ្មីថា «ធា នុរាជ» កីឡាករដែលមានឈ្មោះដើមថា សូយ ភារម្យ រូបនេះ ត្រូវគេដាក់ឲ្យឡើងប្រកួតជាមួយកីឡាករថៃជាលើកទី១នៅលើសង្វៀនទូរទស្សន៍អាស៊ីអាគ្នេយ៍នៅវេលាព្រឹកខានស្អែក ។ ការប្រកួតដែលមានការចាប់អារម្មណ៍ភាគច្រើនពីសំណាក់អ្នកស្នេហាការប្រដាល់នេះ នឹងបើកឆាកប្រយុទ្ធចាប់ពីម៉ោង៨ព្រឹកតទៅ នៅក្នុងព្រឹត្តិការណ៍ស្រាបៀរ Expert ដែលត្រូវធ្វើឡើងរៀងរាល់២សប្ដាហ៍ម្ដង ។
កីឡាករថៃដែលត្រូវគេឲ្យប្រកួតជាមួយធា នុរាជ នោះគឺមានឈ្មោះថា Rithy Chhai មកពីទីក្រុងបាងកក ។ អ្នកទាំងពីរស្ថិតក្នុងប្រភេទទម្ងន់៦៥គីឡូក្រាម ហើយការប៉ះគ្នាពេលនេះ មានការតាមឃ្លាំមើលច្រើនគួរសម។ ចាប់តាំងពីរឿងអាស្រូវបានបញ្ចប់ នេះជាលើកទី១ហើយដែលកីឡាករសូយ ភារម្យ ត្រូវបានគេផ្ដល់ឱកាសឲ្យឡើងប្រកួតអន្តរជាតិនៅលើសង្វៀនទូរទស្សន៍អាស៊ីអាគ្នេយ៍ បន្ទាប់ពីបានប្ដូរឈ្មោះថា ធា នុរាជ ។ មុនបោះជំហានមកដល់ការប្រកួតនៅព្រឹកខានស្អែកនេះ ភាគីកម្ពុជាធ្លាប់បានបង្ហាញខ្លួននៅលើសង្វៀនជាមួយកីឡាករថៃKao Phong Chai Phum រួចម្ដងហើយតែចាញ់ពិន្ទុកីឡាករថៃដោយលទ្ធផលប្រផិតប្រផើយ ។
ជំនួបពីរនាក់នេះនៅលើសង្វៀនទូរទស្សន៍អាស៊ីអាគ្នេយ៍ គេចាត់ទុកថាថ្មោងថ្មីដូចគ្នា ដោយសារតែកីឡាករ Rithy Chhai ក៏មិនធ្លាប់មកប្រកួតនៅក្នុងប្រទេសកម្ពុជាដូចគ្នា។ មន្ត្រីអ្នកដឹកនាំកីឡាករថៃឲ្យមកប្រកួតបានអះអាងថា កីឡាករដែលមកប្រកួតជាមួយធា នុរាជ គឺជាកីឡាករល្អម្នាក់ ដោយសារតែគេមិនហ៊ានដាក់កីឡាករខ្សោយនាំឲ្យអតីតជើងខ្លាំង សូយ ភារម្យ កាច់បំបាក់ស៊ីផុយសម្រាប់ការប៉ះគ្នា ។ កីឡាករ Rithy Chhai មានកំណត់ត្រាធ្លាប់ប្រកួត៥៥ដង ឈ្នះ៥០ដង និងចាញ់៥ដង ហើយក៏មានការអះអាងថាគេជាជើងខ្លាំងពូកែកែង ម៉ាត់ ទាត់ និងមានបច្ចេកទេសប្រកួតខ្ពស់ ។
លោកញាណ សុធី អ្នករៀបចំការប្រកួតបានអះអាងថា កីឡាករធា នុរាជ មានការទទួលស្គាល់យូរមកហើយថាជាជើងខ្លាំង ប៉ុន្តែកីឡាករថៃក៏មិនមែនធម្មតានោះដែរ ។ នេះបើយោងតាមអ្វីដែលលោកធ្លាប់មើលការប្រកួតរបស់គេច្រើនលើកច្រើនសាមុនសម្រេចឲ្យក្រុមអ្នកដឹកនាំយកកីឡាកររូបនេះមកប្រកួតនៅក្នុងប្រទេសកម្ពុជានៅព្រឹកស្អែក ។ លោកថា ធា នុរាជ នៅខ្លាំងកម្លាំងស៊ុហ្វ ល្អស្នៀតទាត់ និងពូកែជង្គង់ ប៉ុន្តែលោកមិនទាន់ដឹងថាលទ្ធផលចុងក្រោយ តើកីឡាករកម្ពុជា ឬកីឡាករថៃជាអ្នកក្ដោបក្ដាប់ជ័យជម្នះនោះទេ ។
យ៉ាងណាក៏ដោយលោកថា កីឡាករកម្ពុជាទាំងបទពិសោធន៍ ទាំងកម្រិតក្នុងការប្រកួត គឺល្អជាងថៃដាច់ ជាពិសេសក្នុងពេលគេនៅប្រើឈ្មោះថា សូយ ភារម្យ គឺមានអ្នកស្នេហាការប្រដាល់តិចណាស់មិនស្គាល់កម្រិតប្រកួតរបស់គេ ។ លោកថា ធា នុរាជ ធ្លាប់ប្រកួត៧៥លើក ឈ្នះ៥២លើក ចាញ់១៨លើក និងស្មើ៥លើក ដោយតួលេខនេះនៅមិនទាន់រាប់បញ្ចូលការប្រកួតមុនពេលកេរ្តិ៍ឈ្មោះរបស់គេស្ទុះឡើងខ្លាំង ក្នុងពេលមិនទាន់ប្រើឈ្មោះធា នុរាជ នោះផង ។
អ្នកស្នេហាការប្រដាល់ភាគច្រើនបានផ្ដោតការចាប់អារម្មណ៍ចំពោះគូនេះ ដោយសារតែ Rithy Chhai គឺជាកីឡាករថ្មី ហើយភាគីកម្ពុជា ក៏ជាជើងខ្លាំងដែលទើបមានឱកាសបង្ហាញសមត្ថភាពនៅលើសង្វៀនទូរទស្សន៍អាស៊ីអាគ្នេយ៍ ។ ជំនួបរបស់គូនេះ គេចង់ឲ្យកីឡាករធា នុរាជ ទទួលជ័យជម្នះច្រើនជាង ដើម្បីឲ្យគេបានបង្កើនក្រឌីតបន្ទាប់ពីការចូលប្រកួតរបស់គេនៅក្នុងព្រឹត្តិការណ៍ដណ្ដើមពានច្រើនវគ្គរួចមកហើយ គឺមិនដែលឈ្នះពាន ។ កីឡាករធា នុរាជ ក៏មានបំណងបែបនេះដែរដោយសារក្រេឌីត និងមុខមាត់ដែលបានពីការឈ្នះនៅលើសង្វៀន គឺជាទីផ្សាររកលុយរបស់គេប្រជែងនឹងកីឡាកររួមអាជីព ។ អតីតអ្នកធ្លាប់គាំទ្រកីឡាករសូយ ភារម្យ បើទោះជាធ្លាប់រិះគន់ពាក់ព័ន្ធនឹងរឿងអាស្រូវរបស់គេ ក៏នៅតែចង់ឲ្យកីឡាកររូបនេះទទួលបានជ័យជម្នះលើកីឡាករ Rithy Chhai សម្រាប់ព្រឹកខានស្អែកផងដែរ ដើម្បីឲ្យការបង្ហាញមុខរបស់គេជាលើកដំបូងទទួលបានភាពលេចធ្លោដូចកីឡាករថៃដែរ ។
នៅលើសង្វៀននោះដែរ កីឡាករ សរ រាជសីហ៍ មកពីក្លិបមោងឫស្សីមរតកគុនខ្មែរខេត្តបាត់ដំបង ក៏ត្រូវគេឲ្យឡើងប្រកួតជាមួយកីឡាករថៃឈ្មោះ Phach Aroun ក្នុងនាមជាគូអន្តរជាតិផងដែរ ។ អ្នកទាំងពីរប្រកួតគ្នាក្នុងប្រភេទទម្ងន់៦៩គីឡូក្រាម ហើយក៏ជាការប្រកួតដែលមានការចាប់អារម្មណ៍មិនអន់ដែរ ដោយសារតែកីឡាករថៃគឺជាជើងខ្លាំងម្នាក់។ នាពេលកន្លងមកកីឡាករ Phach Aroun មានប្រវត្តិវាយផ្ដួលពុទ្ធ ឆាយរិទ្ធី មកពីក្លិបពុទ្ធសេរីវង្សកីឡាដោយពិន្ទុ ខណៈដែលកីឡាករសរ រាជសីហ៍ ឯណេះវិញ គឺមានកំណត់ត្រាវាយឈ្នះកីឡាករថៃ Bowie Sor.P raserth Sri ក្នុងទឹកទី៣ និងធ្លាប់ចាញ់កីឡាករថៃ Kam Lai Phat ក្នុងទឹកទី២វិញ។ កណ្ដាប់ដៃ កែង និងជើងទាត់របស់អ្នកទាំងពីរ ត្រូវគេកត់សម្គាល់ថាមានភាពរស់រវើកមិនខុសគ្នានោះទេ បើទោះជាភាគីថៃ នៅត្រង់ចំណុចនេះ ហាក់ស្ទើរបច្ចេកទេសបន្តិច ។ កីឡាកររូបនេះធ្លាប់ឡើងប្រកួត៦៧ដង ឈ្នះ៥៥ដង ចាញ់៩ដង និងស្មើ៣ដង ក្នុងពេលភាគីថៃធ្លាប់ប្រកួត៨៥លើក ឈ្នះ៧២លើកចាញ់១២លើក និងស្មើ១លើក។
នៅថ្ងៃស្អែកដែរ ប៉ុន្តែស្ថិតនៅវេលាម៉ោង៥ល្ងាច ក៏មានការប្រកួតជុំទី២សម្រាប់ព្រឹត្តិការណ៍ «អធិរាជស៊ីម៉ងត៍អូដ្ឋ»ប្រភេទទម្ងន់៦០គីឡូក្រាមផងដែរនៅសង្វៀនទូរទស្សន៍ប៉ុស្ដិ៍លេខ៥ ជ្រោយចង្វា ។ ការប្រដាល់នេះ ក៏មានការចាប់អារម្មណ៍មិនអន់ផងដែរ ដោយសារក្នុងសប្ដាហ៍នេះមានការប្រកួតសន្សំពិន្ទុរបស់ពូលB។ កីឡាករសុខ សុវណ្ណ មកពីសមាគមកីឡាប្រដាល់ក្រសួងការពារជាតិខេត្តសៀមរាប នឹងឡើងប្រកួតដណ្ដើមពិន្ទុជាមួយកីឡាករថៃ Yort Sing ដើម្បីបោះជំហានទៅកាន់វគ្គខ្វែង។ កីឡាកររឿង សារ័ត្ន មកពីក្លិបកងពលតូចទ័ពឆត្រយោង៩១១ និង ម៉ន ចាន់ដារ៉ា មកពីក្លិបការិយាល័យទី៥ កងទ័ពជើងគោក ក៏ត្រូវប្រកួតនៅក្នុងពូល B ដូចគ្នា ដើម្បីប្រជែងគ្នាយក៣ពិន្ទុផងដែរ ៕
ចែករំលែកព័តមាននេះ