រាជធានីភ្នំពេញ ៖ តំណាងអយ្យការអមសាលាដំបូងរាជធានីភ្នំពេ ញ កាលពីព្រឹកថ្ងៃទី១៨ ខែកក្កដា ឆ្នាំ២០២១ បានបើកការសាកសួរលើបុរស ២នាក់ ដែលជាប់ពាក់ព័ន្ធករណីកាន់កាប់អាវុធ ដោយខុសច្បាប់ ពោលគឺផ្ទុះ ១គ្រាប់ នៅកន្លែងផឹកស៊ី។
បុរស ២នាក់នោះ ម្នាក់ ឈ្មោះ កែម គន្ធប័ននឺ អាយុ ៣១ឆ្នាំ មុខរបរលក់ដូរ ស្នាក់នៅផ្ទះលេខ១៦៨ ផ្លូវលេខ១៣៨ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ និងម្នាក់ ឈ្មោះ គីម សម្បត្តិ ហៅ សម្បត្តិ រ៉ាឆៃ ហៅ ពៅ អាយុ ៣៦ឆ្នាំ មុខរបរ ជាងឈើ ស្នាក់នៅផ្ទះលេខ៣៣៤ ផ្លូវលំ សង្កាត់និរោធ ខណ្ឌច្បារអំពៅ រាជធានីភ្នំពេញ។
សំណុំរឿងនេះ បានស្ថិតនៅលោក ឆាយ ហុង ព្រះរាជអាជ្ញារង នៃអយ្យការអមសាលាដំបូង បើកការសាកសួរ លុះពេលសាកសួរហើយ ផុតម៉ោងរដ្ឋបាល ក៏បានផ្ញើទៅសមត្តកិច្ចវិញ ដោយមិនទាន់បានសម្រេចចោទប្រកាន់ យ៉ាងណានោះ នៅឡើយទេ តម្រូវឲ្យព្រឹកថ្ងៃទី១៩ ខែកក្កដា នាំបុរស ២នាក់នោះ មកសួរម្តងទៀត។
សូមរម្លឹកថា កាលពីវេលាម៉ោង ៣រសៀលថ្ងៃទី១៥ ខែកក្កដា ឆ្នាំ២០២១ កម្លាំងសមត្តកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានសហការជាមួយប៉ុស្តិ៍នគរបាលរដ្ឋបាលអូរឡាំពិក បានត្រួតពិនិត្យបន្ទប់លេខ១១៤ សណ្ឋាគារសេវិនដេ ផ្លូវលេខ១៦៣ ភូមិ៣ សង្កាត់អូរឡាំពិក ខណ្ឌបឹងកេងកង ដោយបានឃាត់ខ្លួនបុរស ២នាក់ ដូចមានឈ្មោះខាងលើនេះ និងដកហូតវត្ថុតាងអាវុធខ្លី ១ដើម ពាក់ព័ន្ធបទល្មើសកាន់កាប់ និងប្រើប្រាស់អាវុធ ដោយគ្មានការអនុញ្ញាត ដែលធ្វេសប្រហែស ឲ្យជនដទៃ យកទៅប្រើប្រាស់ដោយខុសច្បាប់ ផ្ទុះ ១គ្រាប់ នៅកន្លែងផឹកស៊ី កាលពីវេលាម៉ោង ១០ នឹង៣០ នាទីយប់ថ្ងៃទី១៤ ខែកក្កដា ចំណុចផ្ទះមិនចាំលេខ ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ អាវុធខ្លី ដែលជាវត្ថុតាង ដែលសមត្តកិច្ចដកហូតនោះ ម៉ាក K៥៩ ពណ៌ខ្មៅ លាយទឹកមាស គ្មានលេខ និងបង់មួយមានគ្រាប់ចំនួន ៤គ្រាប់ ចាប់យកពីឈ្មោះ កែម គន្ធប័ននឺ។
ប្រភពព័ត៌មានឲ្យដឹងថា វេលាម៉ោងខាងលើ មានជន ៣នាក់ មានឈ្មោះ កែម គន្ធប័ននឺ ឈ្មោះ គីម សម្បត្តិ ហៅ សម្បត្តិ រ៉ាឆៃ ហៅ ពៅ និងឈ្មោះ ភុង វង្សសុភាបណ្ឌិត ហៅ សី ភេទប្រុស អាយុប្រហែល ៣៣ឆ្នាំ បាននាំគ្នាទៅផឹកស្រាបៀ អស់ចំនួន ១កេះ និងនាំគ្នាប្រើប្រាស់គ្រឿងញៀន ប្រភេទម៉ាទឹកកក នៅចំណុចកើតហេតុខាងលើ។ បន្ទាប់មក បុរសទាំង ៣នាក់ ក៏ស្រវឹងស្រាបៀរនោះ និងបានប្រើប្រាស់គ្រឿងញៀនផែមទៀតផង ពេលនោះ ឈ្មោះ កែម គន្ធប័ននឺ បានយកអាវុធខ្លីរបស់ខ្លូនម៉ាក K៥៩ ដែលមានគ្រាប់ចំនួន ៥គ្រាប់ មកអាម៉េលេង ហើយក៏ទុកចោល នៅលើតុ ខណៈឈ្មោះ គីម សម្បត្តិ ហៅ សម្បត្តិ រ៉ាឆៃ ហៅ ពៅ បានឃើញអាវុធនោះ នៅលើតុ ក៏យកមកអាម៉េ រួចបាញ់ឡើងលើ ចំនួន ១គ្រាប់ បង្កឲ្យមានការភ្ញាក់ផ្អើល ដល់សមត្ថកិច្ច និងប្រជាពលរដ្ឋ រួចពួកគេក៏នាំគ្នាជិះម៉ូតូគេចចេញទៅបាត់អស់។
អង្គហេតុដូចបានរៀបរាប់ខាងលើនេះហើយ ទើបសមត្តកិច្ចនគរបាលព្រហ្មទណ្ឌកម្រិតស្រាល រាជធានីភ្នំពេញ សហការជាមួយនគរបាលមូលដ្ឋាន ឃាត់ខ្លួនបុរស ២នាក់ ម្នាក់ជាម្ចាស់អាវុធ និងម្នាក់ជាអ្នករពឹសដៃ យកកាំភ្លើងខ្លី បាញ់មេឃ នឹងកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញ៕ ឃឹម ប៊ុនណាក់
ចែករំលែកព័តមាននេះ