ប្រទេសឡាវ ៖ យោងតាមសារព័ត៌មាន Reuters ឱ្យដឹងថា ប្រទេសឡាវបាននាំចេញអង្ករជាផ្លូវការលើកដំបូងរបស់ខ្លួនយ៉ាងច្រើនទៅកាន់ទីផ្សារចិនកាលពីសប្តាហ៍មុននេះ និងកំពុងដាក់ផែនការបង្កើនការនាំចេញ
ប្រទេសឡាវ ៖ យោងតាមសារព័ត៌មាន Reuters ឱ្យដឹងថា ប្រទេសឡាវបាននាំចេញអង្ករជាផ្លូវការលើកដំបូងរបស់ខ្លួនយ៉ាងច្រើនទៅកាន់ទីផ្សារចិនកាលពីសប្តាហ៍មុននេះ និងកំពុងដាក់ផែនការបង្កើនការនាំចេញឲ្យបានជាង១ម៉ឺនតោនក្នុងមួយឆ្នាំ ។ កាលពីពេលថ្មីៗនេះ ខេត្ត Savannkhet របស់ឡាវទទួលបានការបញ្ជាទិញអង្ករប្រមាណជា៨ពាន់តោនពីសំណាក់ប្រទេសចិន ។
អភិបាលខេត្តសាមីបានប្រាប់អ្នកសារព័ត៌មានថា ៖ « ខ្លួនកំពុងដាក់ទិសដៅបង្កើនផលិតកម្មដើម្បីសម្រេចបានតាមតម្រូវការនាំចេញ ។ លោកកត់សម្គាល់ថា កូតានាំចេញបច្ចុប្បន្នទៅកាន់ប្រទេសចិន គឺមានត្រឹមតែ៨ពាន់តោនប៉ុណ្ណោះ ប៉ុន្តែពួកគេកំពុងស្វែងរកការធ្វើឲ្យប្រសើរឡើងនូវកូតានេះ ដោយផ្អែកតាមការទិញរបស់ជនជាតិចិនមានកម្រិតខ្ពស់ជាងមុន។ តាមគោលការណ៍នេះ ឡាវកំពុងតែដាក់ផែនការបង្កើនផលិតកម្មអង្ករដែលមានគុណភាពក្នុងអំឡុងពេលពីរបីឆ្នាំខាងមុខទៀត » ។
គោលការណ៍នាំចេញអង្ករបច្ចុប្បន្ននេះ កំពុងដំណើរការទៅតាមរយៈគម្រោងកិច្ចសហប្រតិបត្តិការរវាងរដ្ឋាភិបាលឡាវ និងចិន ដែលបានចុះហត្ថលេខាដោយរដ្ឋាភិបាលចិន និងអាជ្ញាធរមានសមត្ថកិច្ចនៃខេត្ត Savannkhet របស់ឡាវ ដើម្បីជំរុញកិច្ចសហប្រតិបត្តិការទ្វេភាគីលើវិស័យកសិកម្ម ។
សូមបញ្ជាក់ថា ប្រទេសឡាវបានលក់ស្រូវក្រៅផ្លូវការទៅឲ្យបណ្តាប្រទេសជិតខាងចន្លោះពី៣០ម៉ឺន ទៅ៤០ម៉ឺនតោន តាមរយៈច្រកព្រំដែនជារៀងរាល់ឆ្នាំ ។
ចំណែកអង្គការកសិកម្ម និងស្បៀងអាហាររបស់ UN បានប៉ាន់ប្រមាណថា ផលិតកម្មស្រូវរបស់ឡាវនឹងកើនឡើងប្រហែលជា៣% ពីមួយឆ្នាំទៅមួយឆ្នាំ ឬស្ថិតក្នុងរង្វង់៣,៤លានតោន ។ ដោយឡែក ក្រសួងកសិកម្មសហរដ្ឋអាមេរិកវាយតម្លៃថា ឡាវនឹងផលិតស្រូវបានក្នុងរង្វង់២,៩៧៦លានតោន ក្នុងនោះស្រូវកិនជាអង្កររួចមាន១,៨៧៥លានតោននៅលើផ្ទៃដីទំហំ៩៥៨.០០០ហិកតាក្នុងឆ្នាំ២០១៥ ៕
ចែករំលែកព័តមាននេះ