កម្លាំងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌដង្កោ រាជធានីភ្នំពេញ សហការជាមួយកម្លាំងនគរបាលនៃអធិការដ្ឋានស្រុកខ្សាច់កណ្តាល ខេត្តកណ្ដាល បានធ្វើការឃាត់ខ្លួនអតីតអ្នកបើកបររថយន្តសណ្តាប់ធ្នាប់សាលាខណ្ឌដង្កោម្នាក់ តាម
រាជធានីភ្នំពេញ ៖ កម្លាំងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌដង្កោ រាជធានីភ្នំពេញ សហការជាមួយកម្លាំងនគរបាលនៃអធិការដ្ឋានស្រុកខ្សាច់កណ្តាល ខេត្តកណ្ដាល បានធ្វើការឃាត់ខ្លួនអតីតអ្នកបើកបររថយន្តសណ្តាប់ធ្នាប់សាលាខណ្ឌដង្កោម្នាក់ តាមដីកាបញ្ជាឲ្យចូលខ្លួនរបស់សាលាដំបូងរាជធានីភ្នំពេញ ។ ដែលបានចោទប្រកាន់ពីបទ ក្លែងបន្លំឯកសារសាធារណៈ, ប្រើប្រាស់ដោយខុសច្បាប់នូវសម្លៀកបំពាក់ជាអាទិ៍សម្រាប់អាជ្ញាធរសាធារណៈ (បន្លំខ្លួនធ្វើជានគរបាលជាតិ)ព្រមទាំងរំលោ.ភលើទំនុកចិត្ត ដោយបានធ្វើសកម្មភាពឆបោកប្រាក់ពីអ្នកដទៃរាប់ពាន់ដុល្លារ។
ការឃាត់ខ្លួនខាងលើ បានធ្វើឡើងកាលពីវេលាម៉ោង១២និង៣០នាទី ថ្ងៃទី១៦ ខែកក្កដា ឆ្នាំ២០២១ នៅក្នុងភូមិវិហារសួរ ឃុំវិហារសួរ ស្រុកខ្សាច់កណ្តាល ខេត្តកណ្តាល។
ជនសង្ស័យខាងលើមានឈ្មោះ នាង ណុយ ហៅម៉ាប់ ភេទប្រុស អាយុ៣៩ឆ្នាំ មានទីលំនៅភូមិខ្វិត សង្កាត់សាក់សំពៅ ខណ្ឌដង្កោ រាជធានីភ្នំពេញ ។ ដោយឡែកជនរងគ្រោះដែលត្រូវចាញ់បោកជនសង្ស័យរូបនេះមាន២នាក់ គឺទី១- ឈ្មោះ អៀ សៅរី ភេទស្រី អាយុ២៩ឆ្នាំ មានទីលំនៅភូមិបាកាន ឃុំត្រពាំងជង ស្រុកបាកាន ខេត្តពោធិ៍សាត់ បានចាញ់បោកអស់ប្រាក់ចំនួន៤,០០០,០០០រៀល (បួនលានរៀល) ជាថ្នូរនឹងការរត់ការដោះលែងប្ដី ។ ទី២- ឈ្មោះ សំ សម្បត្តិ ភេទស្រី អាយុ៤៧ឆ្នាំ មានទីលំនៅផ្ទះលេខ២៧P ផ្លូវលេខ៤ បុរីលឹមឈាងហាក់ ក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ចាញ់បោកជនសង្ស័យរឿងរត់ការផ្ទេរកម្មសិទ្ធិដី និងផ្ទះសម្បែងអស់ចំនួន២,៤០០ដុល្លារ។
បើតាមនគរបាលខណ្ឌដដង្កោ បានប្រាប់ឲ្យដឹងថា ការដែលធ្វើឲ្យជនរងគ្រោះជឿជាក់ រហូតលង់ខ្លួនចាញ់បោកជនសង្ស័យបែបនេះ ក៏ព្រោះតែជននេះបានបន្លំខ្លួនជាមន្ត្រីនគរបាល ដោយស្លៀកពាក់ឯកសណ្ឋាននគរបាលជាតិ និងពាក់ស័ក្ដិ៣ថែមទៀតផង។ ហើយកាលពីថ្ងៃទី០៨ ខែមិថុនា ឆ្នាំ២០២១ វេលាម៉ោង១៤និង៤០នាទី ស្ត្រីរងគ្រោះឈ្មោះ អៀ សៅរី បានជិះរថយន្តឈ្នួលពីផ្ទះនៅឯខេត្តពោធិ៍សាត់ មកសួរសុខទុក្ខឈ្មោះ សុង វិច្ឆិកា ភេទប្រុស អាយុ២៩ឆ្នាំ ត្រូវជាប្តីដែលត្រូវបានកម្លាំងនគរបាលនៃអធិការដ្ឋានខណ្ឌដង្កោ ឃាត់ខ្លួនពីបទលួច ។
ប្រភពដដែលបានបន្តទៀតថា លុះពេលមកដល់ភ្នំពេញ ក្រោយពីចុះពីរថយន្ត នាងបានហៅកង់បី១គ្រឿងធ្វើដំណើរទៅកាន់អធិការដ្ឋាននគរបាលខណ្ឌដង្កោ ខណៈពេលនោះត្រូវបានបុរសដែលជាអ្នករត់កង់បីមិនស្គាល់ឈ្មោះដែលមានលេខទូរស័ព្ទ០៩៦ ៩៩ ៩៦ ២៥៥ បានសួរនាំនាងដឹងរឿង ហើយបុរសរូបនោះក៏បាននិយាយប្រាប់ជនរងគ្រោះថា «បើចង់ជួយប្តីឲ្យចេញមានសេរីភាពវិញ ខ្ញុំស្គាល់នគរបាលម្នាក់អាចជួយឲ្យរួចបាន គាត់នោះឈ្មោះ នាង ណុយ ហៅម៉ាប់» ។ បន្ទាប់មកបុរសអ្នករត់កង់បីខាងលើ ក៏បានឲ្យលេខទូរស័ព្ទ ០៩៧ ៧៧ ៥១ ៦៦៩របស់ជនសង្ស័យទៅស្ត្រីរងគ្រោះដើម្បីទាក់ទងគ្នា។
ប្រភពដដែលបានប្រាប់ឲ្យដឹងបន្តទៀតថា ក្រោយមកស្ត្រីរងគ្រោះក៏បានទាក់ទងតាមលេខទូរស័ព្ទដែលអ្នករត់កង់បីឲ្យនោះ ហើយក៏បានជួបជនសង្ស័យឈ្មោះ នាង ណុយ ហៅម៉ាប់ នៅតាមផ្លូវលេខ២១៧ មុខសាលាខណ្ឌដង្កោ ជាប់នឹងរបងអធិការដ្ឋាននគរបាលខណ្ឌដង្កោនោះតែម្ដង។ ក្រោយពីបានជួបគ្នាហើយ ជនសង្ស័យបានប្រាប់ស្ត្រីរងគ្រោះថា ខ្លួនគឺជាមន្ត្រីនគរបាលនៅផ្នែកនគរបាលយុត្តិធម៌ នៃអធិការដ្ឋាននគរបាលខណ្ឌដង្កោ មានឋានន្តរសក្តិ អនុសេនីយ៍ឯក រួចបានបង្ហាញកាតសម្គាល់ខ្លួន ជានគរបាលជាតិឲ្យជនរងគ្រោះមើលទៀតផង។ បន្ទាប់មកទៀតក៏បាននិយាយគ្នាពីតម្លៃរត់ការដោះលែងប្ដី ដោយជនសង្ស័យទាមទារសេវារត់ការចំនួន៣,០០០ដុល្លារ ព្រមទាំងធានាថា រត់ការបាន ប៉ុន្តែជនរងគ្រោះបានសុំចុះថ្លៃ ទើបក្រោយមកត្រូវរ៉ូវគ្នាត្រឹម១,៧០០ដុល្លារវិញ។
ប្រភពដដែលបានបញ្ជាក់បន្ថែមទៀតថា ក្រោយពេលឯកភាពគ្នាហើយ ជនរងគ្រោះក៏បានប្រគល់លុយចំនួន២,៤០០,០០០រៀលឲ្យទៅជនសង្ស័យសិន លុះជាង១ខែក្រោយមក គឺនៅថ្ងៃទី២៥ ខែឧសភា ឆ្នាំ២០២១ ជនរងគ្រោះឈ្មោះ អៀ សៅរី ក៏បានផ្ញើលុយតាមវីងចំនួន១,២០០,០០០រៀល (មួយលានពីរសែនរៀល)ទៀត ទៅឲ្យទៅជនសង្ស័យជាលើកទី២ទៀត។ ប៉ុន្តែខណៈពេលនោះ ប្ដីជនរងគ្រោះត្រូវជាប់ឃុំនៅពន្ធនាគារព្រៃ.សទៅហើយ ដោយសារតែចង់ឲ្យប្ដីបានរួចពីទោសទណ្ឌ ទោះជាអត់លុយ ក៏ស្ត្រីខាងលើបានដើរខ្ចីបុលគេរកលុយដែរ ហើយបន្ទាប់មកនៅថ្ងៃទី២៦ ខែឧសភា ឆ្នាំ២០២១ នាងរកលុយបានចំនួន៤០០,០០០រៀល(បួនសែនរៀន) និងបានផ្ញើលុយតាមវីងទៅឲ្យជនសង្ស័យទៀត ហើយជននេះបានធានាថានឹងជួយដោះលែងប្ដីនាងឲ្យបាន។
ប្រភពដដែលនេះបានប្រាប់បន្តទៀតថា ប៉ុន្តែអ្វីដែលជាការពិត គឺខុសពីការរំពឹងទុកទាំងស្រុង ដោយរហូតដល់ថ្ងៃទី០១ ខែមិថុនា ឆ្នាំ២០២១ ទាក់ទងគ្នាលែងបាន ដោយសារជនសង្ស័យបិទទូរស័ព្ទ និងគេចខ្លួនបាត់ស្រមោល ទើបធ្វើឱ្យជនរងគ្រោះរាយការណ៍ប្រាប់កម្លាំងនគរបាលខណ្ឌដង្កោ ព្រមទាំងដាក់ពាក្យបណ្តឹងសុំឲ្យជួយអន្តរាគមន៍។
ពេលនោះលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ ក៏បានដឹកនាំកម្លាំងធ្វើការស្រាវជ្រាវ ប៉ុន្តែពុំទាន់ចាប់ខ្លួនជននេះបាននៅឡើយ ស្រាប់តែនៅថ្ងៃទី២០ ខែមិថុនា ឆ្នាំ២០២១ មានស្ត្រីម្នាក់ទៀតឈ្មោះ សំ សម្បត្តិ បានទៅដាក់ពាក្យបណ្ដឹងចោទប្រកាន់ជនសង្ស័យឈ្មោះនាង ណុយ ហៅម៉ាប់ នេះថា បានរំលោ.ភលើទំនុកចិត្ត បោកយកលុយចំនួន២,៤០០ដុល្លារអាមេរិក រឿងរត់ការផ្ទេរកម្មសិទ្ធិដី និងផ្ទះសម្បែងមិនបានសម្រេច ហើយបិទទូរស័ព្ទទាក់ទងលែងបាន ព្រមទាំងយកទាំងឯកសារដីធ្លីបាត់ ឈប់បម្រើការងារជាសណ្ដាប់សាលាខណ្ឌដង្កោទៀតផង។
ប្រភពដដែលបានឲ្យដឹងទៀតថា បន្ទាប់មកនគរបាលក៏បានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ទើបលោកស្រី សុង ឆវ័ន្ត ព្រះរាជអាជ្ញារង នៃអយ្យការអមសាលាដំបូងរាជធនីភ្នំពេញ ចេញដីកាបញ្ជាឲ្យចូលខ្លួនលេខ១៨៥ អ.យ.ថ ចុះថ្ងៃទី០៧ ខែកក្កដា ឆ្នាំ២០២១ ឲ្យជនសង្ស័យឈ្មោះ នាង ណុយ ហៅម៉ាប់ ឲ្យបានមុនថ្ងៃទី២៩ ខែកក្កដា ឆ្នាំ២០២១។
ប៉ុន្តែជនសង្ស័យរូបនេះ មិនព្រមចូលខ្លួន រហូតដល់ថ្ងៃទី១៦ ខែកក្កដា ឆ្នាំ២០២១ លោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោ ក៏បានដឹកនាំកម្លាំងចុះតាមរកចាប់ខ្លួនជននោះ ដោយសហការជាមួយនគរបាលនៃអធិការដ្ឋានស្រុកខ្សាច់កណ្ដាល ហើយរហូតដល់វេលាម៉ោង១២និង៣០នាទី ថ្ងៃត្រង់ថ្ងៃដដែល ទើបរកឃើញ និងឃាត់ខ្លួនជនសង្ស័យឈ្មោះ នាង ណុយ ហៅម៉ាប់ បាននៅត្រង់ចំណុចភូមិវិហារសួគ៌ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល បន្ទាប់មកក៏បាននាំខ្លួនយកទៅធ្វើការសាកសួរនៅអធិការដ្ឋាននគរបាលខណ្ឌដង្កោ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ