គ្រោះថ្នាក់ចរាចរណ៍ប៉ះគ្នាបន្តិចបន្តួចដែលបង្កឡើងរវាងរថយន្ត និងម៉ូតូ ហើយនិយាយមិនត្រូវរ៉ូវគ្នា រហូតឈានដល់សមត្ថកិច្ចចរាចរណ៍ចុះមកជួយសម្របសម្រួលផងដែរ បង្កឱ្យមានការភ្ញាក់ផ្អើលកាលពីវេលាម៉ោង
រាជធានីភ្នំពេញ ៖ គ្រោះថ្នាក់ចរាចរណ៍ប៉ះគ្នាបន្តិចបន្តួចដែលបង្កឡើងរវាងរថយន្ត និងម៉ូតូ ហើយនិយាយមិនត្រូវរ៉ូវគ្នា រហូតឈានដល់សមត្ថកិច្ចចរាចរណ៍ចុះមកជួយសម្របសម្រួលផងដែរ បង្កឱ្យមានការភ្ញាក់ផ្អើលកាលពីវេលាម៉ោង៦និង៣០នាទីយប់ ថ្ងៃទី១៧ ខែកក្កដា ឆ្នាំ២០២១ នៅតាមបណ្តោយផ្លូវ R៥ ស្ថិតនៅក្នុងសង្កាត់ស្រះចក ខណ្ឌដូនពេញ ។
បើតាមប្រភពព័ត៌មានពីភាគីខាងម្ចាស់ម៉ូតូបានប្រាប់ឲ្យដឹងថា នៅមុនពេលកើតហេតុ ខ្លួនបានជិះម៉ូតូមួយគ្រឿងម៉ាកហុងដាឌ្រីម ពណ៌ក្រហម ពាក់ស្លាកលេខ កំពង់ធំ 1L-5821 ធ្វើដំណើរតាមបណ្តោយផ្លូវ R8 ពីត្បូងទៅជើង ក្នុងគោលបំណងបត់ឆ្វេងទៅកាន់ផ្លូវ R៥ ខណៈមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿងម៉ាកឡិចស៊ីស RX300 ពណ៌ស្ករ ពាក់ស្លាកលេខ ភ្នំពេញ 2BI-6586 បើកបរដោយបុរសម្នាក់ ធ្វើដំណើរតាមបណ្តោយផ្លូវ R8 ពីជើងទៅត្បូង ក្នុងគោលបំណងបត់ស្តាំ ហើយរថយន្តនោះក៏ជិះមកកៀរម៉ូតូគាត់ បណ្តាលឲ្យដួលម៉ូតូរបួសក្បាល និងធ្វើឱ្យបែកអំពូលភ្លើងរបស់ក្រុមហ៊ុនឯកជន សម្រាប់ដាក់បំភ្លឺសួនថែមទៀតផង។
ដោយឡែកតាមប្រភពព័ត៌មានពីម្ចាស់រថយន្តវិញ បានប្រាប់ឲ្យដឹងដែរថា ខ្លួនធ្វើដំណើរតាមបណ្តោយផ្លូវ R8 ក្នុងទិសដៅពីជើងទៅត្បូង គោលបំណងបត់ស្តាំ ទៅកាន់ផ្លូវ R5 ខណៈបត់បានជិត១០ម៉ែត្រ ក៏ស្រាប់តែមានម៉ូតូមួយគ្រឿងខាងលើ ជិះវ៉ាខាងស្តាំរថយន្តរបស់គាត់ បណ្តាលឲ្យប៉ះចំកញ្ចក់ស្តាំរថយន្ត រួចមនុស្សក៏បានដួលទៅលើសួន ប៉ុន្តែខ្លួនមិនបានទៅណាទេ គឺឈប់រថយន្តដើម្បីធ្វើការដោះស្រាយ។
ក្រោយពេលកើតហេតុ ប៉ូលិសចរាចរណ៍បានចុះមកទីតាំងកើតហេតុ និងធ្វើការវាស់វែង ព្រមទាំងជួយសម្របសម្រួលទៅភាគីទាំងសងខាង ព្រោះជារឿងតូចតាច ប៉ុន្តែម្ចាស់ម៉ូតូមិនព្រម ដោយចង់ឲ្យម្ចាស់រថយន្តជួយសងថ្លៃអំពូលភ្លើងបំភ្លឺសួនច្បារនៅក្នុងបឹងកក់ និងជួសជុលម៉ូតូរបស់ខ្លួនផងដែរ ចំណែកឯរបួសក្បាល គឺស្ម័គ្រចិត្តចេញថ្លៃព្យាបាលខ្លួនឯង។
ក្នុងពេលនោះផងដែរ សមត្ថកិច្ចក៏បានសួរបញ្ជាក់ថា តើពេលភាគីខាងម៉ូតូជិះមានបានចុចទូរស័ព្ទដែរឬទេ0x017d7 ទើបពេលកំពុងបើកបរនោះ បានជាមើលមិនឃើញរថយន្តនៅខាងមុខខ្លួនអញ្ចឹង ព្រោះខាងរថយន្តពុំមានស្នាមកៀរនោះទេ ក្រោយមកទើបភាគីម្ចាស់ម៉ូតូបានសារភាពថា ខ្លួនជាអ្នកខុស និងដោះស្រាយគ្នាបញ្ចប់រឿងផងដែរ។
គួរបញ្ជាក់ផងដែរថា បុគ្គលិកក្រុមហ៊ុនឯកជន ដែលមើលការខុសត្រូវនៅក្នុងតំបន់បឹងកក់ បានទាមទារថ្លៃអំពូលភ្លើងបំភ្លឺសួន ក្នុងតម្លៃ៥០ដុល្លារ តែភាគីខាងម៉ូតូបានអោយតែ៤០ដុល្លារនោះទេ ដើម្បីបញ្ចប់រឿង ព្រោះខ្លួនជាអ្នកប៉ះ មិនមែនរថយន្តប៉ះនោះទេ៕
ចែករំលែកព័តមាននេះ