រាជធានីភ្នំពេញ ៖ នៅក្នុងឆមាសទី១ដើមឆ្នាំ២០២១នេះ កម្ពុជាបាននាំចេញកៅស៊ូសរុបមានជាង១០២ពាន់តោន គិតជាទំហំសាច់ប្រាក់ជាង១៥៧លានដុលា្លរអាមេរិក កើនឡើងប្រមាណជា៨៧លានដុល្លារមេរិកឬស្មើប្រមាណ១២៣% បើប្រៀបធៀបនិងរយៈពេលដូចគ្នា និងឆ្នាំ២០២០។
យោងតាមរបាយការណ៍បូកសរុបការងារ គយ និងរដ្ឋាករប្រចាំឆមាសទី១ ឆ្នាំ២០២១ ថ្មីៗគូសបញ្ជាក់ថា«កម្ពុជាបាននាំចេញកៅស៊ូមានចំនួន ១០២.៨ ពាន់តោន មានតម្លៃ ១៥៧.៦ លានដុល្លារអាមេរិក កើនឡើងប្រមាណ ៤៥.៦ ពាន់តោន (៧៩.៧%) ឬប្រមាណ ៨៧ លានដុល្លារអាមេរិក (១២៣.២%) »។
ការនាំចេញកៅស៊ូមានកំណើនខ្ពស់នេះ ត្រូវបានអ្នកវិនិយោគក្នុងស្រុកលើដំណាំកៅស៊ូមើលឃើញថា ការដាំដុះកៅស៊ូលក្ខណៈគ្រួសារ ក្រុមហ៊ុនមានការកើនឡើង។
លោក ឧកញ៉ា លឹម ហេង អ្នកវិនិយោគលើដំណាំកៅស៊ូក្នុងស្រុកមួយបានបានឱ្យដឹងនៅថ្ងៃទី ១៦កក្កដានេះថា ការនាំចេញកៅស៊ូកើនឡើងនេះ ដោយសារផ្ទៃដីដាំកៅស៊ូលក្ខណៈគ្រួសារនិងក្រុមហ៊ុនសម្រុកដាំច្រើនណាស់ ទាំងដីសម្បទានសេដ្ឋកិច្ច។ដូច្នេះការនាំចេញកៅស៊ូកើនឡើងខ្ពស់នេះ វាជាសញ្ញាមួយបង្ហាញថាកៅស៊ូចាប់ផ្តើមចៀរជ័របានច្រើនហើយវានឹងកើនងឡើងជារៀងរាល់ឆ្នាំពីឥលូវទៅរយៈពេល៥ឆ្នាំខាងមុខ។
តាមលោកឧកញ៉ា លឹម ហេង តម្លៃជ័រកៅស៊ូនៅក្នុងខែកន្លងមកនេះវាលើងចុះអត់ទៀង ប៉ុន្តែអាចទទួលយកបាននៅបរិបទកូវីដ១៩ ហើយនេះជារឿងល្អសម្រាប់កៅស៊ូគ្រូសារក៏ដូចជាកៅស៊ូក្រុមហ៊ុន ស្របពេលដែលរាជរដ្ឋាភិបាលបានទាក់ទាញអ្នកវិនិយោគ ឱ្យមកបណ្តាក់ទុន បង្កើតរោងចក្រផលិតសំបកកង់យានយន្តនៅស្រុកខ្មែរ ហើយបើមានរោងចក្រកែច្នៃកៅស៊ូក្នុងពីរទៅបីថែមទៀត អាចទទួលយកជ័រដែលផលិតបាននៅក្នុងស្រុកអាចឈានដល់១០០%។
លោកឧកញ៉ា លើកឡើងថាបើជំងឺកូវីដ១៩ បន្តអូសបន្លាយរយៈពេលវែងថែមទៀត វាអាចប៉ះពាល់ដល់តម្លៃជ័រកៅស៊ូហើយ ព្រោះការប្រើប្រាស់កៅស៊ូកង់ឡានវានឹងថយចុះ ។ដូច្នេះតម្រូវការកៅស៊ូនៅលើទីផ្សារក៏ថយចុះដែរ។កាលណាមានបិទខ្ពស់នៅតាមបណ្តាប្រទេសជាច្រើនវានិងធ្វើឱ្យការដឹកជញ្ជូនកៅស៊ូថយចុះ ហើយការប្រើប្រាស់កង់រថយន្តក៏ថយចុះទៅតាមនោះដែរ។
យោងតាមរបាយការណ៍របស់ឯកឧត្តម វេងសាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទកន្លងមកបង្ហាញថា កម្ពុជាមានផ្ទៃដីកៅស៊ូសរុបមានចំនួន ៤០៤. ១៦០ ហិកតា ដែលក្នុងនោះផ្ទៃដីចៀរជ័រមានចំនួន ២៩២. ៥០០ ហិកតា ស្មើនឹង៧២% និងផ្ទៃដីថែទាំមានចំនួន ១១១. ៦៦០ ហិកតា ស្មើនឹង ២៨%។
របាយការណ៍ដដែលគូសបញ្ជាក់ថា« ផលិតផលជ័រកៅស៊ូសរុបរយៈពេល៦ខែ ឆ្នាំ២០២១ សម្រេចបានចំនួន ១៣៣. ៣៦៧ តោន បានកើនឡើងចំនួន ៧. ២៧៨តោន ស្មើនឹង៥,៧៧% ធៀបនឹងរយៈពេលដូចគ្នាឆ្នាំ២០២០»៕
ចែករំលែកព័តមាននេះ