ស្វាយរៀង រកឃើញអ្នកវិជ្ជមានកូវីដ១៩ថ្មី ១២៤នាក់ថែមទៀត ជាសះស្បើយ ២៦១នាក់ និងស្លា.ប់ថ្មី ៤នាក់
- ស្វាយរៀង
ខេត្តស្វាយរៀង៖ នៅថ្ងៃទី១៦ ខែកក្កដា ឆ្នាំ២០២១ រដ្ឋបាលខេត្តស្វាយរៀង បានប្រកាសនូវអត្តសញ្ញាណអ្នកវិជ្ជមានកូវីដ១៩ថ្មី ចំនួន ១២៤នាក់ (ស្រ្តី ៦២នាក់)។…
ខេត្តស្វាយរៀង៖ នៅថ្ងៃទី១៦ ខែកក្កដា ឆ្នាំ២០២១ រដ្ឋបាលខេត្តស្វាយរៀង បានប្រកាសនូវអត្តសញ្ញាណអ្នកវិជ្ជមានកូវីដ១៩ថ្មី ចំនួន ១២៤នាក់ (ស្រ្តី ៦២នាក់)។…
ខេត្តស្វាយរៀង៖ នៅថ្ងៃទី១៦ ខែកក្កដា ឆ្នាំ២០២១ រដ្ឋបាលខេត្តស្វាយរៀង បានប្រកាសនូវអត្តសញ្ញាណអ្នកវិជ្ជមានកូវីដ១៩ថ្មី ចំនួន ១២៤នាក់ (ស្រ្តី ៦២នាក់)។ ក្នុងនោះ មានកម្មករ-កម្មការិនីរោងចក្រ ចំនួន ៣២នាក់ ករណីឆ្លងលើអ្នកប៉ះពាល់ផ្ទាល់ជាមួយអ្នកកូវីដ១៩ ចំនួន ៥០នាក់ និងឆ្លងលើអ្នកមានការសង្ស័យ ៣៩នាក់។
ចំពោះអ្នកវិជ្ជមានកូវីដ១៩ ចំនួន ១២៤នាក់នេះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យស្រុកស្វាយជ្រំ ចំនួន ៤៣នាក់ បញ្ជូនទៅមន្ទីរពេទ្យបង្អែកសាមគ្គីរំដួល ២៩នាក់ និងបញ្ជូនទៅមជ្ឈមណ្ឌលព្យាបាលកូវីដ១៩ ក្រុងបាវិត ចំនួន ៥០នាក់។
រដ្ឋបាលខេត្តស្វាយរៀង ក៏បានប្រកាសថា កាលពីថ្ងៃទី១៥ ខែកក្កដា មានករណីស្លាប់ថ្មី ៤នាក់រួមមាន៖ ស្ត្រីឈ្មោះ សរ សារិ អាយុ ៥៧ឆ្នាំ បានទទួលមរណភាព នៅគេហដ្ឋាននៅភូមិថ្មី ឃុំសំបួរ ស្រុកស្វាយទាប។ ស្ត្រីនេះ មានជំងឺ ព្យាបាលនៅផ្ទះអស់រយៈ ១០ថ្ងៃ ដោយមានជំងឺក្អក ពិបាកដកដង្ហើម ក៏បញ្ជូនទៅព្យាបាលនៅមន្ទីរពេទ្យ នៅថ្ងៃទី១០កក្កដា ហើយបានស្លាប់ នៅថ្ងៃទី១៤ ខែកក្កដា ឆ្នាំ២០២១ វេលាម៉ោង ១០យប់។ ក្រុមការងារចុះទៅយកសំណាកពិនិត្យ ធ្វើតេស្តរហ័ស ឃើញវិជ្ជមានកូវីដ១៩។ ស្ត្រីម្នាក់ទៀត ឈ្មោះ នុត សាឌី អាយុ ៣៤ឆ្នាំ ជាកម្មការិនីរោងចក្រ អេលីត មានទីលំនៅភូមិឬស្សីលៀប ឃុំសំយ៉ោង ស្រុកកំពង់រោទិ៍ មានជំងឺក្អកខ្លាំង បញ្ជូនទៅព្យាបាលនៅមន្ទីរពេទ្យ កាលពីព្រឹកថ្ងៃទី១៤កក្កដា ហើយបានស្លាប់ នៅថ្ងៃទី១៤កក្កដា ឆ្នាំ២០២១ វេលាម៉ោង ៣ និង១០នាទីរសៀល។ ក្រុមការងារ បានចុះទៅយកសំណាកធ្វើតេស្តរហ័ស ឃើញវិជ្ជមានកូវីដ១៩។ រីឯស្រ្តី ឈ្មោះ ម៉ៅ លាង អាយុ ៧៤ឆ្នាំ បានទទួលមរណភាពនៅគេហដ្ឋាន ក្នុងភូមិព្រៃតាញ៉យ ឃុំក្រោលគោ ស្រុកស្វាយជ្រំ។ ស្ត្រីរូបនេះ មានជំងឺ នៅថ្ងៃទី២៣ ខែមិថុនា ឆ្នាំ២០២១ ដោយជំងឺរ៉ាំរ៉ៃ ហើយបានស្លាប់ នៅថ្ងៃទី១៤ ខែកក្កដា ឆ្នាំ២០២១ នៅវេលាម៉ោង ៤ និង ១០នាទីទៀបភ្លឺ។ ក្រុមការងារ យកសំណាក ធ្វើតេស្តរហ័ស វិជ្ជមានកូវីដ១៩។ ស្រ្តីឈ្មោះ ចាន់ សាមុត អាយុ ៣៨ឆ្នាំ មានទីលំនៅភូមិច្រកម្ទេស សង្កាត់ច្រកម្ទេស ក្រុងបាវិត នៅថ្ងៃទី១២ ខែកក្កដា ឆ្នាំ២០២១ យកសំណាកធ្វើតេស្តរហ័ស វិជ្ជមានកូវីដ១៩ បញ្ជូនទៅព្យាបាលនៅមន្ទីរពេទ្យស្រុកស្វាយជ្រំ។ នៅថ្ងៃទី១៣ ខែកក្កដា ឆ្លងទន្លេ តាមធម្មជាតិ សម្រាលបានទារកម្នាក់ ដោយសុខភាពខ្សោយខ្លាំង នៅព្យាបាលនៅមន្ទីរពេទ្យខេត្ត ហើយបានស្លាប់បាត់បង់ជីវិត នៅថ្ងៃទី១៤ ខែកក្កដា ឆ្នាំ២០២១ វេលាម៉ោង ២ និង២០នាទីរសៀល។
កាលពីថ្ងៃទី១៥ ខែកក្កដា ឆ្នាំ២០២១ នៅខេត្តស្វាយរៀង មានអ្នកសះស្បើយថ្មី ចំនួន ២៦១នាក់ (ស្រ្តី ១៣៥នាក់)។
គិតត្រឹមថ្ងៃទី១៥ ខែកក្កដា ឆ្នាំ២០២១ ខេត្តស្វាយរៀង មានអ្នកវិជ្ជមានកូវីដ១៩ សរុប ៣៧៣៧នាក់ (ស្ត្រី ២០៦៧នាក់) ជាសះស្បើយសរុប ២៨៦៧នាក់ (ស្ត្រី ១៦២២នាក់) កំពុងសម្រាកព្យាបាល ចំនួន ៨៧០នាក់ (ស្ត្រី ៤៣៦នាក់)។ ករណីស្លាប់កើនឡើងដល់ ៥៧នាក់ (ស្ត្រី ៣៥នាក់)។
រដ្ឋបាលខេត្តស្វាយរៀង សូមអំពាវនាវដល់បងប្អូនប្រជាពលរដ្ឋ កម្មករកម្មការិនី ដែលពាក់ព័ន្ធជាមួយអ្នកជំងឺកូវីដ-១៩ ចូរមានការប្រុងប្រយ័ត្ន ដើម្បីទប់ស្កាត់ការឆ្លងរីករាលដាលកូវីដ១៩ ទៅសហគមន៍។ បងប្អូនប្រជាពលរដ្ឋ ដែលពាក់ព័ន្ធជាមួយអ្នកជំងឺកូវីដ-១៩ ខាងលើ សូមបងប្អូន ដែលពាក់ព័ន្ធទាំងផ្ទាល់ និងប្រយោល សូមធ្វើចត្តាឡីស័ក តាមដានសុខភាព អនុវត្តតាមវិធានការណែនាំរបស់ក្រសួងសុខាភិបាល និងវិធានការ ៣ការពារ ៣កុំ របស់សម្ដេចតេជោហ៊ុនសែន។
ប្រសិនបើមានរោគសញ្ញា ដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមមេត្តាប្រញាប់ ទៅធ្វើតេស្តរកមេរោគកូវីដ១៩ ដែលមានទីតាំងនៅជិតផ្ទះ ឬផ្ដល់ព័ត៌មានទៅអាជ្ញាធរមូលដ្ឋាន ឬទៅយកវត្ថុវិភាគសំណាកនៅប៉ុស្ដិ៍យកសំណាក ដែលនៅជិតផ្ទះ ឬទំនាក់ទំនងមកក្រុមការងារស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ-១៩ ខេត្ត 044 712 522 ឬ 097 503 4567 ដើម្បីមានវិធានការបន្ត។
សម្រាប់អ្នក ដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃ ដែលអ្នកបានប៉ះពាល់ ឬទៅទីកន្លែងនោះ៕ វ៉ាន់ ប៊ុនធឿន
ចែករំលែកព័តមាននេះ