រាជធានីភ្នំពេញ ៖ ថ្វីដ្បិត តែមានជំងឺលើសជាតិអាស៊ីត ខ្លាញ់រុំបេះដូង សម្ពាធសរសៃបេះដូង និងលើសជាតិស្ករ ស្របពេលដែលខ្លួនក៏មានជំងឺកូវីដ-១៩ ទៀតនោះ ប៉ុន្តែអតីតអ្នកប្រដាល់ អធិរាជកែងឆេះជង្គង់ហោះ អេ ភូថង បានអះអាងតាមរយៈក្រុមគ្រួសារថា លោកបានធូរស្បើយហើយ ក្រោយសម្រាកព្យាបាលជំងឺកូវីដ-១៩ ប្រមាណមួយអាទិត្យ នៅមជ្ឈមណ្ឌលព្យាបាលជំងឺកូវីដ-១៩ ពហុកីឡដ្ឋានជាតិអូឡាំពិក ។
លោកស្រី សាំង សុម៉ាលី ភរិយារបស់លោក អេ ភូថង ថែមទាំងបានបញ្ជាក់ប្រាប់បណ្ដាញសារព័ត៌មានក្នុងស្រុកថា លោក អេ ភូថង កាន់តែមានសុខភាពល្អ ព្រោះព្យាយាមហាត់ប្រាណ និងសម្រាកទៀងទាត់ តាមវេជ្ជបញ្ជា ។
លោកស្រី សាំង សុម៉ាលី បន្តថា ប្តីបានចូលព្យាបាលជំងឺកូវីដ-១៩ កាលពីថ្ងៃទី១១ ខែកក្កដា កន្លងទៅ ស្របពេលដែលជំងឺចាស់រើឡើងផង ពេលមានអាការធ្វើទុក ហើយក្រុមគ្រួសារបានបញ្ជូនទៅមន្ទីរពេទ្យ ក៏ពិនិត្យឃើញថា ពិតជាមានជាតិអាស៊ីតឡើងខ្លាំង ខ្លាញ់រុំបេះដូងខ្លាំង និងសម្ពាធសរសៃឈាមបេះដូងថែមទៀត ព្រោះលោកធាត់ខ្លាំង ។ បន្ទាប់មក ក្រុមគ្រូពេទ្យ ក៏បានធ្វើតេស្ដសំណាក ដើម្បីរៀបចំឲ្យលោកសម្រាកព្យាបាលជំងឺ បែរជាទទួលបានលទ្ធផល វិជ្ជមានកូវីដ-១៩ ទៅវិញ ទើបសម្រេចបញ្ជូនលោកយកទៅព្យាបាល នៅស្ដាតអូឡាំពិក តែម្ដង ។ ដោយឡែកលោកស្រី និង កូនៗ គឺធ្វើតេស្តច្រើនដង គឺអវិជ្ជមាន រហូត ។
លោកស្រី សាំង សុម៉ាលី បានបន្ថែមថា នៅពេលសម្រាកព្យាបាល ថ្ងៃទី១ នៅមជ្ឈមណ្ឌលជំងឺកូវីដ-១៩ នៅពហុកីឡដ្ឋានជាតិអូឡាំពិក លោក អេ ភូថង ក៏មានអាការរៀងធ្ងន់បន្ដិចដែរ ព្រោះជំងឺប្រចាំការ តែដោយមានការយកចិត្តទុកដាក់មើលថែ និងព្យាបាលពីសំណាក់ក្រុមគ្រួពេទ្យជួរមុខ នៅថ្ងៃបន្ដបន្ទាប់ រហូតដល់ថ្ងៃទី១៦ ខែកក្កដានេះ អាការរបស់ប្តី គឺបានធូរស្រាលច្រើនហើយ ។
ម្យ៉ាងវិញទៀត លោក អេ ភូថង និងក្រុមគ្រួសារ ដែលគ្រប់អាយុចាក់វ៉ាក់ ក៏បានចាក់វ៉ាក់សាំងការពារជំងឺកូវីដ-១៩ រួចហើយដែរ ។ អ្នកស្រីថា លោកមិនបានប្រាស្រ័យទាក់ទាងជាមួយសិស្សគុន ឬកូនៗនោះទេ លើកលែងតែភរិយារបស់លោក ប៉ុន្ដែអ្នកស្រី សាំង សុម៉ាលី បានធ្វើតេស្ដជាច្រើនលើក សុទ្ធតែទទួលបានលទ្ធផល អវិជ្ជមាន ពុំបានឆ្លងពីស្វាមីអ្នកស្រីនោះទេ ៕
ចែករំលែកព័តមាននេះ