រាជធានីភ្នំពេញ ៖ ការប្រកួតកីឡាប៉េតង់ ជ្រើសរើសជើងឯកអាស៊ីលើកទី១៩ដែលកម្ពុជាទទួលធ្វើជាម្ចាស់ផ្ទះនោះ បានចាប់ផ្ដើមជាផ្លូវការហើយកាលពីថ្ងៃព្រហស្បតិ៍ទី១៧ ធ្នូ ដែលការប្រកួតនេះមានរយៈពេល៣ថ្ងៃចាប់ពីថ្ងៃទី១៧
រាជធានីភ្នំពេញ ៖ ការប្រកួតកីឡាប៉េតង់ ជ្រើសរើសជើងឯកអាស៊ីលើកទី១៩ដែលកម្ពុជាទទួលធ្វើជាម្ចាស់ផ្ទះនោះ បានចាប់ផ្ដើមជាផ្លូវការហើយកាលពីថ្ងៃព្រហស្បតិ៍ទី១៧ ធ្នូ ដែលការប្រកួតនេះមានរយៈពេល៣ថ្ងៃចាប់ពីថ្ងៃទី១៧ ដល់១៩ ធ្នូ នៅទីលានពហុកីឡដ្ឋានជាតិ។
លោក សូម៉ៃ សុខគា អគ្គលេខាធិការសហព័ន្ធកីឡាប៊ូលនិងប៉េតង់កម្ពុជា បានឱ្យដឹងថា នេះគឺជាលើកទី២ហើយដែលកម្ពុជាទទួលធ្វើជាម្ចាស់ ដែលកាលពីលើកទី១នៅក្នុងឆ្នាំ២០០១ធ្វើនៅក្រុងតាខ្មៅ ខេត្តកណ្ដាល ។ ចំណែកលើកទី២នេះធ្វើនៅរាជធានីភ្នំពេញដែលមានប្រទេសចំនួន១២ចូលរួមគឺកម្ពុជាជាម្ចាស់ផ្ទះ ឡាវ វៀតណាម ថៃ ម៉ាឡេស៊ី ឥណ្ឌូណេស៊ី ចិនតៃវ៉ាន់ សិង្ហបុរី ព្រុយណេ ជប៉ុន ឥណ្ឌា និងប្រទេសម៉ុងហ្គោលី ។ ការប្រកួតចែកចេញជា២វិញ្ញាសា គឺប្រកួតវាយយកពិន្ទុ និងប្រកួត៣នាក់ទល់នឹង៣នាក់ ។ ក្នុងនោះមានការប្រកួតផ្នែកយុវជន ផ្នែកនារីពេញវ័យនិងផ្នែកបុរសពេញវ័យលើវិញ្ញាសាវាយយកពិន្ទុនិងវិញ្ញាសាប្រកួត៣នាក់ទល់នឹង៣នាក់ ។
លោកបានឱ្យដឹងទៀតថា ការប្រកួតលើកនេះ ក្រសួងអប់រំយុវជន និងកីឡារៀបចំបានល្អខ្លាំងណាស់ ដូចជាមានការទទួលភ្ញៀវយ៉ាងត្រឹមត្រូវបំផុតសូម្បីតែកន្លែងហ្វឹកហាត់សមដៃ នៅមុនពេលប្រកួត ក៏យើងពុំមានការហាមឃាត់ទេ គេចង់ហាត់កន្លែងណាក៏បានដែរ។ មិនតែប៉ុណ្ណោះយើងបានផ្ដល់នូវកន្លែងស្នាក់នៅ ហូបចុក សុទ្ធសឹងតែជាសណ្ឋាគារល្អៗ មិនឱ្យភ្ញៀវខកចិត្តឡើយ ។ ការដែលក្រសួងអប់រំយុវជន និងកីឡាធ្វើបែបនេះ គឹដើម្បីអូសទាញភ្ញៀវទេសចរឱ្យគេមកលេងនៅស្រុកខ្មែរឱ្យបានច្រើន ។ ចំណែកនៅប្រទេសគេវិញនោះធ្វើមិនបានល្អដូចយើងនោះទេ ។ ជាក់ស្ដែងនៅប្រទេសថៃ កន្លែងស្នាក់នៅមិនសូវល្អ ហើយកន្លែងហ្វឹកហាត់សមដៃក៏គេមិនសូវគិតគូទៀត។ ដូច្នេះហើយបានជាលោកសរសើរក្រសួងអប់រំយុជន និងកីឡាដែលបានខិតខំយកចិត្តទុកដាក់យ៉ាង ខ្លាំង ធ្វើយ៉ាងណាដើម្បីឱ្យព្រឹត្តិការណ៍ប្រកួតលក្ខណៈអាស៊ីលើកនេះប្រព្រឹត្តទៅបានល្អ ។
គួររំលឹកថា ការប្រកួតកីឡាប៉េតង់ជ្រើសរើសជើងឯកអាស៊ីលើកទី១៨កាលពីឆ្នាំទៅគឺ ប្រទេសឡាវជាអ្នកទទួលធ្វើជាម្ចាស់ផ្ទះ ហើយកាលណោះ កម្ពុជាបានក្លាយជាម្ចាស់ជើងឯក ព្រោះថាក្នុងចំណោមមេដាយមាសចំនួន៦គ្រឿងដែលដាក់ឱ្យប្រកួតដណ្ដើមនោះ កម្ពុជាយកបាន៤គ្រឿងទៅហើយ នៅសល់២គ្រឿងទៀតបានទៅលើប្រទេសថៃ ។ ដោយឡែកសម្រាប់ការប្រកួតលើកនេះលោកមានសង្ឃឹមច្រើនថា នឹងអាចដណ្ដើមបានមេដាយមិនចាញ់ការប្រកួតនៅប្រទេសឡាវ នោះទេ ។ ការប្រកួតកីឡាប៉េតង់ជ្រើសរើសជើងឯកអាស៊ីមួយនេះធ្វើឡើងតាំងពីឆ្នាំ១៩៩៧មកម្ល៉េះដែលកាលណោះប្រទេសថៃជាអ្នកទទួលធ្វើជាម្ចាស់ផ្ទះមុនគេ ហើយព្រឹត្តិការណ៍មួយនេះធ្វើឡើងរយៈពេលមួយឆ្នាំម្ដង៕
ចែករំលែកព័តមាននេះ