ប្រទេសចិន ៖ ធនាគារកណ្តាលបានបង្ហាញថា ប្រទេសចិនមានបំណងរក្សានូវស្ថិរភាពប្រាក់យន់ តាមរយៈការចាត់វិធានការរឹតតែខ្លាំងឡើងថែមទៀតចំពោះរូបិយប័ណ្ណរបស់ខ្លួន ធៀបនឹងកញ្ចប់រូបិយប័ណ្ណបរទេសដទៃទៀត
ប្រទេសចិន ៖ ធនាគារកណ្តាលបានបង្ហាញថា ប្រទេសចិនមានបំណងរក្សានូវស្ថិរភាពប្រាក់យន់ តាមរយៈការចាត់វិធានការរឹតតែខ្លាំងឡើងថែមទៀតចំពោះរូបិយប័ណ្ណរបស់ខ្លួន ធៀបនឹងកញ្ចប់រូបិយប័ណ្ណបរទេសដទៃទៀត ដើម្បីបង្កើតប្រព័ន្ធអត្រាប្តូរប្រាក់អាចបត់បែនបាន ។
ធនាគារប្រជាជនចិន ថ្មីៗនេះបានបញ្ចេញសន្ទស្សន៍នៃទម្ងន់ពាណិជ្ជកម្មមួយសម្រាប់ប្រាក់យន់ ដែលជាការវាស់ស្ទង់នូវតម្លៃប្រាក់យន់ ធៀបនឹងកញ្ចប់រូបិយប័ណ្ណចំនួន១៣ នៃដៃគូពាណិជ្ជកម្មធំៗរបស់ចិន ។ ធនាគារថែមទាំងលើកឡើងថា សន្ទស្សន៍នេះនឹងចេញផ្សាយជារឿយៗ ដែលអាចពិនិត្យកាន់តែហ្មត់ចត់លើតម្លៃប្រាក់យន់នេះ ។
ប្រាក់ដុល្លារអាមេរិក ប្រាក់អឺរូ និងប្រាក់យេនជប៉ុន គឺជាសមាសភាពធំជាងគេបំផុតចំនួន៣ក្នុងកញ្ចប់រូបិយប័ណ្ណ ដែលស្មើនឹង២៦,៤%, ២១,៤% និង១៤,៧% នៃកញ្ចប់រូបិយប័ណ្ណ ។
គួរបញ្ជាក់ដែរថា សន្ទស្សន៍នេះត្រូវបានចងក្រងដោយប្រព័ន្ធពាណិជ្ជកម្មលើរូបិយប័ណ្ណបរទេសរបស់ចិន គឺមានកម្រិត១០១.៤៥ពិន្ទុកាលពីថ្ងៃសុក្រសប្តាហ៍មុន ដែលបង្ហាញថា ប្រាក់យន់បានឡើងថ្លៃ១,៤៥% បើធៀបនឹងកញ្ចប់រូបិយប័ណ្ណដទៃទៀតចាប់តាំងពីដំណាច់ឆ្នាំ២០១៤ កន្លងមកនេះ ។
ស្របពេលនេះដែរ ប្រាក់យន់បានចុះខ្សោយ៥% បើធៀបនឹងប្រាក់ដុល្លារអាមេរិក ដែលស្ថិតក្រោមអត្រាជាផ្លូវការ ។
ដោយឡែក Robobank របស់ហូឡង់បានលើកឡើងថា មានភាពស្រពេចស្រពិលមួយចំនួនអំពីស្ថិរភាពប្រាក់យន់ចិន នៅពេលដែលមានការទម្លាក់ថ្លៃខ្លាំង បើធៀបនឹងប្រាក់ដុល្លារអាមេរិក នាពេលថ្មីៗនេះ ៕
ចែករំលែកព័តមាននេះ