ខេត្តបាត់ដំបង ៖ ជនសង្ស័យចំនួន០៣នាក់ ក្នុងនោះមានម្នាក់ ជាអ្នកសារព័ត៏មានផង ហើយក៏ជាមេខ្លោង ក្នុងការរៀបចំផែនការដើរលួចម៉ូតូ ត្រូវបានមន្ត្រីការិយាល័យព្រហ្មទណ្ឌកំរិតស្រាល នៃស្នងការដ្ឋានខេត្ត កសាងសំណុំរឿងបញ្ជូន ទៅកាន់សាលាដំបូងខេត្តហើយ នៅព្រឹកថ្ងៃទី១៦ កក្កដា ២០២១នេះ ក្រោយបញ្ជប់ការសាកសួរក្នុងសំណុំរឿងប្រព្រឹត្តអំពើចោកម្ម ។
មន្ត្រីការិយាល័យព្រហ្មទណ្ឌកំរិតស្រាល បានឲ្យដឹងថា ជនសង្ស័យទាំង០៣នាក់នោះ មាន ទី១ ឈ្មោះ សុខ ផានិត អាយុ៤៧ឆ្នាំ ជាអ្នកសារព័ត៏មាន និងជាមេខ្លោងរៀបចំផែនការដើរលួចម៉ូតូ រស់នៅភូមិចំការឬស្សី សង្កាត់ព្រែកព្រះស្ដេច ក្រុងបាត់ដំបង ទី២ ឈ្មោះ កែវ សុខុម ហៅ ម៉ាប់ អាយុ២៦ឆ្នាំ និងទី៣ ឈ្មោះ គន្ធ វុទ្ធា ហៅ ធា អាយុ២៧ឆ្នាំ ទាំង២នាក់នេះ ស្នាក់នៅបន្ទប់ជួល នៅភូមិរំចេក៤ សង្កាត់រតនៈ ក្រុងបាត់ដំបង ។
នាយការិយាល័យព្រហ្មទណ្ឌកំរិតស្រាល លោក ឈឿង គឹមសុង បាននិយាយថា ក្រុមជនសង្ស័យទាំង០៣នាក់ខាងលើនេះ ត្រូវបានកម្លាំងរបស់លោក ស្រាវជ្រាវឃាត់ខ្លួនបានកាលពីព្រឹកថ្ងៃទី១៤ កក្កដា នៅបន្ទប់ជួលរបស់ពួកគេ ក្រោមការបញ្ជាផ្ទាល់ពីលោកស្នងការខេត្ត និងលោកព្រះរាជអាជ្ញាអមសាលាដំបូងខេត្ត ក្រោយពីសង្ស័យថា ជនទាំង០៣នាក់នេះ បានរួមដៃគ្នាលួចយកម៉ូតូ០១គ្រឿង ពីផ្ទះប្រជាពលរដ្ឋនៅស្រុកបាណន់ ។
លោកបានបញ្ជាក់ថា ជាមួយនឹងការឃាត់ខ្លួននោះ កម្លាំងរបស់លោកដកហូតបានវត្ថុតាងជាច្រើន ដែលក្រុមនេះប្រើជាមធ្យោបាយដើម្បីប្រព្រឹត្តអំពើចោរកម្ម រួមទាំងម៉ូតូរបស់ជនរងគ្រោះផងដែរ ។
យោងតាមរបាយការណ៏ព្រឹត្តិហេតុរបស់ការិយាល័យព្រហ្មទណ្ឌកំរិតស្រាល បានឲ្យដឹងថា ជនមិនស្គាល់អត្តសញ្ញាណ បានចូលទៅកាច់សោ.កលួចយកម៉ូតូ០១គ្រឿង ម៉ាកហុងដាឌ្រីមស៊េរីឆ្នាំ២០២០ កាលពីវេលារំលងអាធ្រាត្រឈានចូលថ្ងៃទី១៤ កក្កដា របស់ប្រជាពលរដ្ឋឈ្មោះ ស៊ិន ឃុន ស្រីអាយុ៤៦ឆ្នាំ នៅភូមិធ្ង័រ ឃុំចែងមានជ័យ ស្រុកបាណន់ ខណៈដែលម្ចាស់ចាក់សោ កទុកនៅក្រោមផ្ទះ ។
ក្រោយពីលួចបាន ជនសង្ស័យបានជិះគេចខ្លួនចូលមកក្រុងបាត់ដំបង ប៉ុន្តែនៅព្រឹកថ្ងៃដដែលក៏ត្រូវកម្លាំងការិយាល័យព្រហ្មទណ្ឌកំរិតស្រាល ធ្វើការស្រាវជ្រាវឃាត់ខ្លួនបានចំនួន០៣នាក់ជាបន្តបន្ទាប់ ។
ជនសង្ស័យឈ្មោះ សុខ ផានិត ដែលមានមុខរបរជាអ្នកសារព័ត៏មានផង បានព្យាយាមឆ្លើយបដិសេធ និងដោះបន្ទុក ចំពោះការចោទប្រកាន់នេះ ។ ប៉ុន្តែបក្សពួករបស់ខ្លួន(កូនចៅ) បានឆ្លើយដាក់បន្ទុកទាំងស្រុងទៅលើ អ្នកសារព័ត៏រូបនេះថា សុខ ផានិត គឺជាមេគំនិត រៀបចំផែនការដើរលួចម៉ូតូ ដោយបានផ្ដល់សម្ភារសម្រាប់កាច់សោ.កម៉ូតូឲ្យកូនចៅរបស់ខ្លួនទៀតផង(នេះបើតាមសមត្ថកិច្ចស្រង់សម្តីជនសង្ស័យ នៅពេលសួរចម្លើយ)។
សមត្ថកិច្ចបានស្រង់ចម្លើយរបស់ជនដៃដល់ឈ្មោះ កែវ សុខុម ហៅ ម៉ាប់ ដោយបានសារភាពថា មេរបស់ខ្លួនឈ្មោះ សុខ ផានិត ជាអ្នកដឹកខ្លួនទៅទម្លាក់នៅកន្លែងលួចម៉ូតូទាំងយប់ នៅភូមិធ្ង័រ ឃុំចែងមានជ័យ ស្រុកបាណន់ បន្ទាប់ពីបានជិះពិនិត្យភូមិសាស្ត្ររួចរាល់ពេលថ្ងៃ ។
កែវ សុខុម ហៅ ម៉ាប់ បាននិយាយទៀតថា នៅយប់កើតហេតុ ខ្លួនបានចូលទៅកាច់សោ.កលួចយកម៉ូតូនោះមែន ក្រោយលួចបានខ្លួនបានជិះចេញសំដៅមកក្រុងបាត់ដំបង ដោយជិះតាមក្រោយមេរបស់ខ្លួន ឈ្មោះ សុខ ផានិត រហូតមកដល់បន្ទប់ជួល លុះព្រឹកឡើង ក៏ត្រូវមត្ថកិច្ចមកក្របួចកដល់បន្ទប់ល្មម។
ឈ្មោះ កែវ សុខុម ហៅ ម៉ាប់ នេះបានឆ្លើយដាក់បន្ទុកទៅលើមេរបស់ខ្លួនថា រាល់សកម្មភាពប្រព្រឹត្តបទល្មើស ការដើរពិនិត្យភូមិសាស្ត្រស្វែងរកកន្លែងលួច ការប្រើមធ្យោបាយដឹកទម្លាក់តាមគោលដៅ និងសម្ភារៈ ឬឧបករណ៏សម្រាប់កាច់សោ.កម៉ូតូ គឺឈ្មោះ សុខ ផានិត ជាអ្នករៀបចំទាំងអស់ ហើយខ្លួនគ្រាន់តែចាំធ្វើតាមបញ្ជាតែប៉ុណ្ណោះ ។
លោក ឈឿង គឹមសុង បាននិយាយដែរថា ប៉ុន្តែក្រុមនេះមិនបានសារភាពអំពីចំនួនបទល្មើស ដែលពួកគេបានប្រព្រឹត្តនោះទេ ។ ជាមួយនឹងការឃាត់ខ្លួនជនសង្ស័យទាំង០៣នាក់ ភ្លាមៗកម្លាំងជំនាញ បានដកហូតម៉ូតូចំនួន០២គ្រឿង ក្នុងនោះមាន០១គ្រឿងជាម៉ូតូជនរងគ្រោះ និង០១គ្រឿងទៀតម៉ាកCPX ជាម៉ូតូរបស់ឈ្មោះ សុខ ផានិត ។ ដោយឡែកវត្ថុតាងដទៃទៀត ជាសម្ភារៈ ឬជាឧបករណ៏សម្រាប់កាច់សោ.កម៉ូតូ និងសម្រាប់ដោះស្លាកលេខ និងដោះគ្រឿងម៉ូតូ ។
លោក បានបញ្ជាក់ថា បច្ចុប្បន្នមន្ត្រីជំនាញ បានបញ្ជប់ការសួរនាំ និងបានកសាងសំណុំរឿងបញ្ជូនជនទាំង០៣នាក់ ទៅកាន់សាលាដំបូងខេត្តហើយ ៕
ចែករំលែកព័តមាននេះ