ខេត្តកណ្ដាល ៖ កម្លាំងនគរបាលនៃអធិការដ្ឋានស្រុកអង្គស្នួល ខេត្តកណ្ដាល រួមជាមួយកម្លាំងនគរបាលប៉ុស្តិ៍ក្រោមចំណុះទាំងអស់បានធ្វើតេស្តសំណាកជម្ងឺCOVID-19 ដោយមានក្រុមគ្រូពេទ្យចុះទៅយកដល់ទីតាំងអធិការដ្ឋានតែម្ដង ហើយជាលទ្ធផលក្នុងចំណោមជាង១០០នាក់ បានរកឃើញវិជ្ជមានចំនួន៣នាក់ ក្នុងនោះ មានអធិការរងម្នាក់…
ខេត្តកណ្ដាល ៖ កម្លាំងនគរបាលនៃអធិការដ្ឋានស្រុកអង្គស្នួល ខេត្តកណ្ដាល រួមជាមួយកម្លាំងនគរបាលប៉ុស្តិ៍ក្រោមចំណុះទាំងអស់បានធ្វើតេស្តសំណាកជម្ងឺCOVID-19 ដោយមានក្រុមគ្រូពេទ្យចុះទៅយកដល់ទីតាំងអធិការដ្ឋានតែម្ដង ហើយជាលទ្ធផលក្នុងចំណោមជាង១០០នាក់ បានរកឃើញវិជ្ជមានចំនួន៣នាក់ ក្នុងនោះ មានអធិការរងម្នាក់ និងមន្ត្រីនគរបាលប៉ុស្តិ៍២នាក់ ។
ការធ្វើសំណាកខាងលើនោះ បានប្រព្រឹត្តវេលាព្រឹកថ្ងៃទី១៥ ខែកក្កដា ឆ្នាំ២០២១ នៅក្នុងអធិការដ្ឋាននគរបាលស្រុកអង្គស្នួល ដែលមានទីតាំងស្ថិតនៅតាមបណ្ដោយផ្លូវជាតិលេខ៤ ឃុំពើក ស្រុកអង្គស្នួល ខេត្តកណ្ដាល ។
នគរបាលបានប្រាប់ឲ្យដឹងថា ដោយសារតែមួយរយៈនេះកងកម្លាំងទាំងអស់ទាំងកម្លាំងអធិការដ្ឋាននគរបាលស្រុក និងកម្លាំងនគរបាលប៉ុស្តិ៍ទាំងអស់មមារញឹក ក្នុងការទប់ស្កាត់ការឆ្លងរាលដាលជម្ងឺCOVID-19 ហើយភាគច្រើនបានចុះផ្ទាល់ថែមទៀតនោះ ទើបលោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាលមានការបារម្ភពីសុខភាពកងកម្លាំង ហើយបានណែនាំឲ្យយកសំណាកធ្វើតេស្តឲ្យបានគ្រប់ៗគ្នា ។ បន្ទាប់មក លោក ខុន សេរីរដ្ឋា អភិបាលនៃគណៈអភិបាលស្រុកអង្គស្នួល និងលោកវរសេនីយ៍ឯក មាន សំណាង អធិការនគរបាលស្រុកអង្គស្នួលបានប្រមូលកម្លាំងនគរបាលសរុបចំនួន១២៣នាក់ ស្រី០៣នាក់ ធ្វើតេស្តសំណាក ដោយមានក្រុមគ្រូពេទ្យចុះទៅយកដល់ទីតាំងអធិកាដ្ឋានតែម្ដង ។
ប្រភពដដែលបានបន្តទៀតថា ជាលទ្ធផលនៃការធ្វើតេស្តនេះបានរកឃើញនគរបាលចំនួន៣រូប មានវិជ្ជមាន COVID-19 ក្នុងនោះមានអធិការរងនគរបាលស្រុក១នាក់ និងមន្ត្រីនគរបាលប៉ុស្តិ៍២នាក់ ចំណែក១២០នាក់ទៀត ក្នុងនោះមានលោកអធិការ និងអធិការរងព្រមទាំងមន្ត្រីនគរបាលតាមបណ្ដាប៉ុស្តិ៍រដ្ឋបាលទាំងអវិជ្ជមាន ។ ចំពោះអ្នកវិជ្ជមានទាំង៣នាក់ គឺសុទ្ធតែជាអ្នកប្រចាំការនៅតាមមណ្ឌលចត្តាឡីស័ក និងតំបន់បិទខ្ទប់ដែលមានការឆ្លងរាលដាលច្រើន ហើយក្រោយពីការរកឃើញវិជ្ជមានបែបនេះត្រូវបានក្រុមគ្រូពេទ្យបញ្ជូនទៅព្យាបាលហើយ៕
ចែករំលែកព័តមាននេះ