លទ្ធផលនៃការអង្កេតដែលរៀបចំឡើងដោយវេបសាយ «Alles Schall und Rauch» ស្នាក់ការនៅប្រទេសអាល្លឺម៉ង់ និងមានអ្នកប្រើចំនួន៤០ប្រទេសបង្ហាញថា លោកស្រីអធិការបតី អង់ហ្គេឡា មេកគែល នៃប្រទេសអាល្លឺម៉ង់ ប្រធានាធិបតីបារ៉ាក់ អូបាម៉ា សហរដ្ឋអាមេរិក និងលោកប្រធានាធិបតីរ៉េសេប តយយីប អ៊័ូររដូហ្គាន របស់តួកគី ជា«កំពូលមនុស្សកុហក» ស្ថិតក្នុង៣ចំណាត់ថ្នាក់ដំបូងប្រចាំឆ្នាំ២០១៥ ។
លទ្ធផលនៃការអង្កេតបានសាកសួរអ្នកអានជាង៣.០០០នាក់នៅលើវេបសាយក្នុងប្រទេសអាល្លឺម៉ង់ និងនៅ៤០ប្រទេសទៀតឃើញថា ច្រើនជាង៣៩% របស់អ្នកចូលរួមផ្តល់មតិនេះ បានវាយតម្លៃលោកស្រីអធិការបតីអង់ហ្គោឡា នៃប្រទេសអាល្លឺម៉ង់ ជា«កំពូលមនុស្សកុហក»ប្រចាំឆ្នាំ (Liar of the Year) ។ បន្ទាប់មកគឺប្រធានាធិបតីបារ៉ាក់ អូបាម៉ា សហរដ្ឋអាមេរិកនិងលោកប្រធានាធិបតីរ៉េសេប តយយីប អ៊័រដូហ្គាន ប្រទេសតួកគី ធ្វើឱ្យមេដឹកនាំទាំង៣រូប គ្រងតំណែង«កំពូលមនុស្សកុហក»៣ចំណាត់ថ្នាក់ដំបូងនៅលើពិភពលោកប្រចាំឆ្នាំ២០១៥ ។
ក្រៅពី៣ចំណាត់ថ្នាក់ដំបូងនោះ លទ្ធផលអង្កេតបង្ហាញជាក្រុមគំរូបានជ្រើសយកលោកនាយករដ្ឋមន្ត្រីបេនចាមីន ណេតាន់យ៉ាហ៊ូ ប្រទេសអីុស្រាអែល និងលោកប្រធានាធិបតីប៉េត្រូ ប៉ូរ៉ូឆេនកូ របស់អ៊ុយក្រែន ជាមនុស្សកុហក ស្ថិតនៅលំដាប់ទី៤ និងទី៥ នៅលើពិភពលោក ។
ផ្ទុយទៅវិញលទ្ធផលនោះបានបង្ហាញទៀតថា លោកប្រធានាធិបតីហាស់សាន់ រូហានី របស់អីុរ៉ង់ និងលោកប្រធានាធិបតីបាចា អាល់អាសាដ ប្រទេសស៊ីរី ត្រូវបានវាយតម្លៃជាអ្នកដឹកនាំប្រទេស «គួរឱ្យទុកចិត្តបំផុត» ។
ក្រៅពីមេដឹកនាំអីុរ៉ង់ និងស៊ីរី លទ្ធផលអង្កេតបង្ហាញថា លោកប្រធានាធិបតីហ្វ្រង់ស្វ៊័រ ហូឡង់ របស់បារាំង នាយករដ្ឋមន្ត្រីអាឡិចស៊ីស ស៊ីប្រាស់ របស់ក្រិក និងលោកប្រធានាធិបតីវ្លាឌីមៀរ ពូទីន របស់រុស្ស៊ី ត្រូវបានចាត់បញ្ចូលជា«មេដឹកនាំគួរឱ្យទុកចិត្ត» ដែរ ។
លទ្ធផលនេះបានចុះផ្សាយមិនដល់មួយសប្តាហ៍ ក្រោយពីទស្សនាវដ្តី «ថែម» ដែលមានស្នាក់ការនៅក្រុងញូវយ៉ក សហរដ្ឋអាមេរិក បានកោតសរសើរលោកស្រីអង់ហ្គេឡា មេកគែល គឺជាបុគ្គលឆ្នើមប្រចាំឆ្នាំ២០១៥ ដោយយោងលើការយល់ព្រមរបស់លោកស្រីទទួលជនភៀសខ្លួនចូលអាល្លឺម៉ង់ និងងអឺរ៉ុប រួមទាំងសកម្មភាពរបស់លោកស្រីក្នុងការដឹកនាំក្រុមប្រទេសក្នុងសហគមន៍អឺរ៉ុបពុះពារលើវិបត្តិបំណុលរបស់ប្រទេសក្រិក ៕
ចែករំលែកព័តមាននេះ