ខេត្តឧត្តរមានជ័យ៖ ក្រុមគ្រូពេទ្យស្ម័គ្រចិត្តលោក ហ៊ុន ម៉ានី ចុះបេសកកម្ម នាំយកវ៉ាក់សាំង ចាក់ជូនប្រជាពលរដ្ឋ ក្នុងក្រុងសំរោង ស្រុកអន្លង់វែង និងស្រុកត្រពាំងប្រាសាទ…
ខេត្តឧត្តរមានជ័យ៖ ក្រុមគ្រូពេទ្យស្ម័គ្រចិត្តលោក ហ៊ុន ម៉ានី ចុះបេសកកម្ម នាំយកវ៉ាក់សាំង ចាក់ជូនប្រជាពលរដ្ឋ ក្នុងក្រុងសំរោង ស្រុកអន្លង់វែង និងស្រុកត្រពាំងប្រាសាទ ខេត្តឧត្តរមានជ័យ ចាប់ពីថ្ងៃទី១២ រហូតដល់ថ្ងៃទី១៥ ខែកក្កដា ឆ្នាំ២០២១ មានពលរដ្ឋ បានទទួលបានចាក់វ៉ាក់សាំង ជាលើកទីមួយ ចំនួនប្រមាណ ១០៤០០នាក់។
លោក ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យ បានឱ្យកោះសន្តិភាពដឹងថា ប្រជាពលរដ្ឋ ដែលបានចុះឈ្មោះ ទទួលចាក់វ៉ាក់សាំង ក្នុងក្រុងសំរោង ស្រុកអន្លង់វែង និងស្រុកត្រពាំងប្រាសាទ ខេត្តឧត្តរមានជ័យ សរុបបានចំនួន ១០៤០០នាក់ ចាប់ពីថ្ងៃទី១២-១៥ ខែកក្កដា ដែលត្រូវទទួលចាក់វ៉ាក់សាំង ជាលើកទី១ និងត្រូវបន្តចាក់ ជាលើកទី២ ចាប់ពីថ្ងៃទី២៧ ខែកក្កដា ឆ្នាំ២០២១។
លោកបានបញ្ជាក់ថា ប្រជាពលរដ្ឋ ដែលអញ្ជើញមកទទួលចាក់វ៉ាក់សាំងការពាររោគរាតត្បាតជំងឺ COVID១៩ ដោយស្ម័គ្រចិត្ត ហើយបានអនុវត្តន៍ទៅតាមគោលការណ៍ ៣កុំ ៣ការពារ និងរក្សាគម្លាតពីគ្នា ឱ្យបានមួយម៉ែត្រកន្លះ។ ខណៈនេះ ប្រជាពលរដ្ឋ ដែលបានទទួលចាក់វ៉ាក់សាំង នៅតាមបណ្តាស្រុក និងក្រុង បានថ្លែងដឹងគុណដល់ក្រុមការងារគ្រូពេទ្យស្ម័គ្រចិត្តរបស់លោក ហ៊ុន ម៉ានី រួមទាំងក្រុមគ្រូពេទ្យ ក្នុងខេត្ត រួមទាំងក្រុមការងារថ្នាក់ឃុំស្រុកផងដែរ៕ ឱម សារឿន
ចែករំលែកព័តមាននេះ