ខេត្តកំពង់ឆ្នាំង ៖ មន្ត្រីនៃមន្ទីរសុខាភិបាលខេត្តកំពង់ឆ្នាំង បានរកឃើញអ្នកវិជ្ជមានកូវីដ-១៩ ថ្មីចំនួន៦៤នាក់បន្ថែមទៀតក្នុងរយៈពេល២ថ្ងៃគឺថ្ងៃទី១៣ និងទី១៤ ខែកក្កដា ឆ្នាំ២០២១នេះបើយោងតាមការបញ្ជាក់របស់រដ្ឋបាលសាលាខេត្តកំពង់ឆ្នាំង ដែលបានចេញសេចក្តីជូនដំណឹងនៅរសៀលថ្ងៃទី១៥ ខែកក្កដា ឆ្នាំ២០២១។ យោងតាមសេចក្តីប្រកាសជូនដំណឹង របស់រដ្ឋបាលសាលាខេត្តកំពង់ឆ្នាំងដដែលបានឲ្យដឹងថា៖
អ្នកកើតជំងឺកូវីដដែលរកឃើញថ្មី ចំនួន៦៣នាក់ (ស្រីចំនួន ៣២នាក់) ជាអាជីវករ ជាកម្មករ សិស្ស បុគ្គលិកក្រុមហ៊ុន គ្រូបង្រៀន អ្នកបើកតាក់ស៊ី នគរបាល និងមន្ត្រីរាជការ ដែលមានទីលំនៅ ក្នុងក្រុងកំពង់ឆ្នាំង ចំនួន២៩នាក់ ស្រុកកំពង់ត្រឡាច៧នាក់ ស្រុកកំពង់លែង២នាក់ ស្រុកទឹកផុស៤នាក់ ស្រុកបរិបូរណ៍ ៧នាក់ ស្រុករលាប្អៀរ ១៣នាក់ និងស្រុកសាមគ្គីមានជ័យ ៦នាក់។ អ្នកវិជ្ជមានរកឃើញថ្មី ខាងលើត្រូវបានមន្ទីរសុខាភិបាលយកទៅដាក់ឲ្យសម្រាកព្យាបាលនៅមន្ទីរពេទ្យខេត្តកំពង់ឆ្នាំង មណ្ឌលព្យាបាលវិទ្យាល័យតេជោហ៊ុនសែន ទឹកហូត មណ្ឌលព្យាបាលវិទ្យាល័យហ៊ុនសែនកំពង់ត្រឡាច មណ្ឌលព្យាបាលវិទ្យាល័យហ៊ុនសែនបរិបូរណ៍ និងមណ្ឌលព្យាបាលវិទ្យាល័យកំពង់លែង។
ជាមួយនឹងការជូនដំណឹងខាងលើរដ្ឋបាលសាលាខេត្តបានអំពាវនាវឲ្យប្រជាពលរដ្ឋ ដែលធ្លាប់ប្រាស្រ័យទាក់ទងដោយផ្ទាល់ ឬប្រយោលជាមួយអ្នកកើតកូវីដ-19 ខាងលើក្នុងរយៈពេល 14 ថ្ងៃមុន សូមមកពិនិត្យសំណាកជាបន្ទាន់នៅមន្ទីរពេទ្យបង្អែកខេត្តកំពង់ឆ្នាំង មន្ទីរពេទ្យបង្អែកស្រុកកំពង់ត្រឡាច មន្ទីរពេទ្យបង្អែកបរិបូរណ៍ និងមណ្ឌលសុខភាពដែលជិតបំផុត ដើម្បីទប់ស្កាត់ការឆ្លងការរាលដាលនៃជំងឺកូវ-១៩ ហើយត្រូវអនុវត្តនូវវិធានការ ៣កុំ ៣ការពារ ដើម្បីខ្លួនយើងគ្រួសារយើង និងសង្គមជាតិ។ គួរបញ្ជាក់ផងដែរថា សម្រាប់ខេត្តកំពង់ឆ្នាំងនៅរយៈពេលប៉ុន្មាន៥ ថ្ងៃចុងក្រោយនេះ មានអ្នកឆ្លងកូវីត ក្នុង១ថ្ងៃមួយ ក្នុងចន្លោះពី២០ ទៅជាង៣០នាក់ ដែលតួលេខនេះពិតជាគួរព្រួយបារម្ភក្រៃលែង ដោយហេតុនេះហើយ សូមបងប្អូនប្រុងប្រយ័ត្ឋឱ្យបានគ្រប់ៗគ្នា៕ ដោយ ៖ ពៅ សុខហ៊ាន
ចែករំលែកព័តមាននេះ