អ្នកគាំទ្រជូនពរកីឡាការិនីស្នូកឃ័រឆ្នើម ស្រួង ភាវី ឈ្នះទឹកប្រាក់១០ម៉ឺនដុល្លារ
- ភ្នំពេញ
រាជធានីភ្នំពេញ ៖ នៅក្នុងពេលនេះ កីឡាការិនីស្នូកឃ័រឆ្នើមកម្ពុជា អ្នកស្រី ស្រួង ភាវី កំពុងបន្តដំណើរទៅចូលរួមការប្រកួតកីឡា
រាជធានីភ្នំពេញ ៖ នៅក្នុងពេលនេះ កីឡាការិនីស្នូកឃ័រឆ្នើមកម្ពុជា អ្នកស្រី ស្រួង ភាវី កំពុងបន្តដំណើរទៅចូលរួមការប្រកួតកីឡាស្នូកឃ័រការ៉ុមជ្រើសរើសជើងឯក PBA Team League 2021-2022 ដែលជាព្រឹត្តិការណ៍ដ៏ធំថ្មីមួយទៀត នៅប្រទេសកូរ៉េខាងត្បូង ដោយការប្រកួតនឹងចាប់ផ្ដើមក្នុងពេលខាងមុខ។ នេះគឺជាបេសកកម្មមួយបន្ថែម បន្ទាប់ពីលោកស្រីដណ្ដើមបានជើងឯកពានរង្វាន់កម្រិតពិភពលោក Blue One Resort LPBA Championship 2021 (ផ្នែកនារី) កាលពីចុងខែមិថុនាកន្លងទៅ។
លោកស្រី ស្រួង ភាវី បានឲ្យដឹងថា ការប្រកួតពានរង្វាន់ PBA Team League 2021-2022 គឺជាការប្រកួតជាក្រុម ដែលមានកម្រិតប្រកួតប្រជែងខ្លាំង បើធៀបនឹងការប្រកួត Blue One Resort LPBA Championship កាលពីពេលថ្មីៗ ដែលជាការប្រកួតលក្ខណៈឯកត្តជន។ អ្វីដែលពិសេសសម្រាប់ការប្រកួតជាក្រុមនេះ គឺថាក្រុមជើងឯក នឹងទទួលបានប្រាក់រង្វាន់រហូតដល់១០ម៉ឺនដុល្លារឯណោះ។
កីឡាការិនីដ៏ល្បីរបស់កម្ពុជារូបនេះបន្ដថា ព្រឹត្តិការណ៍នេះ មានក្រុមខ្លាំងៗ តំណាងក្រុមហ៊ុនយក្សនៅកូរ៉េចំនួន៨ចូលរួម ដែលចម្រាញ់សុទ្ធតែកីឡាករ-កីឡាការិនីជើងខ្លាំងលំដាប់ពិភពលោក មកប្រកួត ជាក់ស្ដែងលោកស្រីលេងឲ្យក្រុមហ៊ុន Blue One Resort ជាមួយមិត្តរួមក្រុម ៥នាក់ទៀត ដែលមានជនជាតិអេស្ប៉ាញម្នាក់ និងកូរ៉េ ៤នាក់។ ចំពោះការប្រកួតគ្រោងធ្វើឡើងរយៈពេល ១ខែ ចាប់ពីថ្ងៃទី៦-កក្កដា រហូតដល់ដំណាច់ខែនេះ ដើម្បីចម្រាញ់រកក្រុមជើងឯក។
កីឡាការិនីមានប្រភពពីខេត្តត្បូងឃ្មុំ លោកស្រី ស្រួង ភាវី បានបង្ហាញនូវមោទនភាព ដែលទទួលបានការគាំទ្រ និងត្រូវបានអញ្ជើញចូលរួមការប្រកួតព្រឹត្តិការណ៍ធំៗជាបន្ដបន្ទាប់ ហើយលោកស្រីបានប្ដេជ្ញា នឹងខិតខំប្រឹងប្រែងឲ្យអស់ពីសមត្ថភាព ដើម្បីដណ្ដើមលទ្ធផលល្អ ជូនអ្នកគាំទ្ររបស់ខ្លួន ទាំងនៅសាធាណរដ្ឋកូរ៉េ និងនៅកម្ពុជា ពិសេសនាំមកនូវកិត្តិយសជូនប្រទេសកំណើតរបស់ខ្លួនផ្ទាល់តែម្ដង។
លោកបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា(NOCC) ធ្លាប់បានសម្ដែងនូវការកោតសរសើរជារឿយៗ ចំពោះការខិតខំប្រឹងប្រែងរបស់កីឡាការិនី ស្រួង ភាវី ហើយលោកបានជំរុញអោយលោកស្រីខិតខំហ្វឹកហាត់បន្ថែមទៀត ពិសេសលើប្រភេទវិញ្ញាសាស្នូកឃ័រ ដែលមានក្នុងការប្រកួតកីឡាស៊ីហ្គេម ដើម្បីមានលទ្ធភាពដណ្ដើមមេដាយជូនជាតិកាន់តែច្រើន ពិសេសរួមដំណើរឆ្ពោះទៅស៊ីហ្គេម ឆ្នាំ២០២៣ នៅកម្ពុជា ដ្បិតវិញ្ញាសាដែលលោកស្រីកំពុងប្រកបអាជីពបច្ចុប្បន្ន គឺប្រភេទកីឡាស្នូកឃ័រការ៉ុម ឬស្នូកឃ័រអាជីពនេះ មិនមានក្នុងការប្រកួតកីឡាស៊ីហ្គេមនោះទេ។
គួរបញ្ជាក់ថា នេះគឺជាលើកដំបូងហើយ ដែលលោកស្រី ស្រួង ភាវី បានចុះកុងត្រាប្រកួតតំណាងក្រុមហ៊ុននៅសាធារណរដ្ឋកូរ៉េ ដ្បិតរយៈពេលជាង១០ឆ្នាំកន្លងមក ដែលលោកស្រីទៅរស់នៅ និងប្រកបអាជីពកីឡាស្នូកឃ័រការ៉ុមនៅទីនោះ លោកស្រីបានប្រកួតលក្ខណៈក្លឹប ដោយធ្លាប់ដណ្ដើមបានជើងឯកថ្នាក់ជាតិប្រចាំប្រទេសកូរ៉េជាច្រើនមកហើយ។ មិនតែប៉ុណ្ណោះ លោកស្រីក៏ធ្លាប់ចូលរួមប្រកួតជ្រើសរើសជើងឯកពិភពលោក ដោយដណ្ដើមបានមេដាយសំរឹទ្ធជូនប្រទេសកម្ពុជាទៀតផង៕
ចែករំលែកព័តមាននេះ