រឿងអាស្រូវក្នុងវិស័យប្រដាល់អាចត្រូវបានលុបបំបាត់ទាំងស្រុងទេ? ក្រោយមានលិខិតព្រមាន
- ភ្នំពេញ
រាជធានីភ្នំពេញ ៖ កាលពីថ្ងៃទី១២ កក្កដា ក្នុងឆ្នាំ២០២១ គណៈកម្មាធិការជាតិអូឡាំពិកកម្ពុជា(NOCC) បានចេញសេចក្ដីប្រកាស
រាជធានីភ្នំពេញ ៖ កាលពីថ្ងៃទី១២ កក្កដា ក្នុងឆ្នាំ២០២១ គណៈកម្មាធិការជាតិអូឡាំពិកកម្ពុជា(NOCC) បានចេញសេចក្ដីប្រកាស
រាជធានីភ្នំពេញ ៖ កាលពីថ្ងៃទី១២ កក្កដា ក្នុងឆ្នាំ២០២១ គណៈកម្មាធិការជាតិអូឡាំពិកកម្ពុជា(NOCC) បានចេញសេចក្ដីប្រកាស ព័ត៌មាន ដោយធ្វើការព្រមានសហព័ន្ធកីឡាប្រដាល់គុនខ្មែរ ដែលនេះគឺជារឿងដ៏អាម៉ាស់មួយ ដែលមិនអាចប្រកែកបានរបស់សហព័ន្ធប្រដាល់ បន្ទាប់ពីសហព័ន្ធនេះ បានបង្កអោយមានរឿងអយុត្តិធម៌កើតឡើង រហូតផ្ទុះប្រតិកម្មដល់ថ្នាក់ដឹកនាំកំពូល។ គួររំលឹកថា ទាន់ក្តៅៗ សម្តេចតេជោ ប្រតិកម្ម ភ្លាម! សហព័ន្ធកីឡាប្រដាល់គុនខ្មែរ ឲ្យកីឡាករ ឃីម បូរ៉ា ក្លាយជាម្ចាស់ខ្សែក្រវ៉ាត់ ភ្លែត!
ករណីមិនប្រក្រតីក្នុងការកាត់ក្ដីលើការប្រកួតរបស់កីឡាករនេះ មិនមែនជាលើកទី១ទេ ពោលគឺស្ទើរតែក្លាយជារឿងដុះស្នឹមទៅហើយ ប៉ុន្តែអាចមិនសូវមានរឿងខ្ជរខ្ជាយទើបចេះតែសុខរហូតមក។ សំណួរមួយដែលអ្នកគាំទ្រកំពុងជជែកគ្នានៅក្នុងពេលនេះ តើករណីដែលធ្លាប់កើតមាន នឹងលែងមានតទៅទៀត ដើម្បីផ្ដល់ភាពយុត្តិធម៌ដល់កីឡាករគ្រប់រូប ឬក៏អាចកើតមានម្ដងម្កាលដដែលៗ ក្នុងពេលបន្ទាប់?
លិខិតព្រមានជាចំហរដែលគណៈកម្មការជាតិអូឡាំពិកកម្ពុជាបង្ហោះជាសាធារណៈនេះ គឺបានបង្ហាញយ៉ាងច្បាស់ពីករណីដឹកនាំមិនបានល្អរបស់មន្ត្រីសហព័ន្ធកីឡាប្រដាល់ ដែលបណ្ដាលអោយកីឡាករមួយចំនួនជួបរឿងអយុត្តិធម៌។ អ្នកតាមដានជាច្រើន បានហៅការព្រមានធ្ងន់ធ្ងរនេះថា នឹងធ្វើអោយសហព័ន្ធចងចាំនូវកំហុសឆ្គង ហើយនឹងលុបអោយអស់នូវអ្វីដែលធ្លាប់កើតឡើងលើកីឡាករ ជាពិសេសលើកីឡាករ ដែលគ្មានខ្សែទុយោ ដើម្បីតវ៉ានោះ។
អ្នកឃើញសេចក្ដីព្រមានជាច្រើនបានបញ្ចេញមតិរិះគន់សហព័ន្ធកីឡាប្រដាល់ និងថា អ្វីដែលផ្ទុះប្រតិកម្មនេះ មិនមែនទើបតែមានមួយករណីប៉ុណ្ណោះទេ គឺមានរាប់មិនអស់រួចមកហើយ ដោយគ្រាន់តែករណីកន្លងមក មិនមែនជារឿងធ្ងន់ធ្ងរ មិនមែនជារឿងភ្ញាក់ផ្អើលដល់មហាជន ហើយក៏ស្ងប់ស្ងាត់ទៅវិញ។ កីឡាករដែលត្រូវគេអះអាងថា ទទួលបានលទ្ធផលមិនសូវយុត្តិធម៌រមែងសម្រេចចិត្តបាត់មុខម្ដងមួយៗនាពេលកន្លងមកនោផង ជាពិសេសនៅពេលដែលពួកគេឡើងប្រកួតជាមួយកីឡាករ ដែលជាកូនសិស្សរបស់គ្រូបង្វឹកមានឥទ្ធិពលនៅក្នុងសង្វៀនប្រដាល់ ឬជាមួយកីឡាករ ដែលជាសំណប់ចិត្តរបស់ថ្នាក់ដឹកនាំណាមួយ។
អ្នកលេងហ្វេសប៊ុក ឈ្មោះ Rotha Khom បានសរសេរភ្ជាប់នឹងលិខិតព្រមានថា «សុំចូលរួមយោបល់ដោយសាមញ្ញ តាំងពីខ្ញុំកើតមក និងចាប់ផ្តើមដឹងក្តីស្គាល់ប្រដាល់ ខ្ញុំលឺរឿងនឹងយូរហើយ។ បើនិយាយទៅទាល់តែពុកចង្អុលមុខបានធ្វើ បើមិនចឹងហៃអើតាមគ្នាទៀត។ តើធ្វើយ៉ាងណាទើបកីឡាករ អាចមានគុណភាពដើម្បីប្រកួតជាមួយគេនៅស៊ីហ្គេម2023។ គួរកុំបណ្តោយអោយដំបៅមួយក្រុមតូច នាំខូចកិត្តិយសជាតិទាំងមូល» ។ មិនខុសគ្នាដែរ អ្នកលេងហ្វេសប៊ុកឈ្មោះ ដែន ប្រឹក្សា បានសរសេរថា«សូមគាំទ្រពេញទំហឹងនៅចំណាត់ការដ៍ល្អមួយនេះ។ ប៉ុន្តែក្នុងនាមខ្ញុំជាអ្នកគាំទ្រប្រដាល់គុនខ្មែរជាង១០ឆ្នាំ ខ្ញុំតែងតែឃើញនូវភាពអយុត្តិធម៍កើតមានចំពោះកីឡាករខ្មែរជារឿយៗ ។ អស់លោកចៅក្រម និងអាជ្ញាកណ្ដាល ការកាត់សេចក្ដីគ្មានសុភវិនិច្ឆ័យ គ្មាន អធ្យាក្រឹត គ្មានតម្លាភាព និងគ្មានភាពយុត្តិធម៍។ សង្ឃឹមថាថ្ងៃណាមួយនឹងមានការប្រែប្រួលផ្លាស់ប្ដូរប្រធានសហព័ន្ធថ្មី ដាក់អ្នកដែលមានឆន្ទលះបង់គ្រប់បែបយ៉ាងដើម្បីគុនខ្មែរមួយនេះដ៍ពិតប្រាកដ។ កូនខ្មែរមួយរូបនេះ សង្ឃឹមនឹងជឿជាក់លើសម្ដេចពុកថានឹងមានការកែទម្រង់ក្នុងប្រព័ន្ធប្រដាលគុនខ្មែរទៅថ្ងៃខាងមុខជាក់ជាមិនខាន់»។
ក្រឡេកទៅមើលអ្នកបញ្ចេញបយោបល់ឈ្មោះ Phatbum Thorng ក៏សរសេរគួរអោយចាប់អារម្មណ៍ផងដែរ ដោយលើកឡើងថា «បើសម្តេចមិនស្រែកទេអស់លោកនៅតែធ្វើមិនដឹងមិនលឺ គ្មានកែប្រែទម្លាប់ពុករលួយបក្សពួកនិយមក្នុងវិស័យគុនខ្មែរ។ការដឹកនាំរាល់ថ្ងៃគ្មានបានផ្លែផ្កាសោះជាហេតុបាត់បង់ការគាំទ្រពីសំណាក់មហាជន និងគុណតម្លៃគុនខ្មែររបស់ដូនតាយើង»។
ជាមួយនឹងការបញ្ចេញមតិទាំងនេះ ហាក់មានក្ដីសង្ឃឹមជាច្រើនថា ការប្រកួតនៅលើសង្វៀនប្រដាល់ នឹងផ្ដល់យុត្តិធម៌ដល់កីឡាករគ្រប់រូប ដោយមិនកាត់ក្ដីដោយយោងលើបក្សពួក ឬខ្សែទុយោដូចអ្វីដែលមហាជនធ្លាប់លើកឡើងនោះទេ ហើយរឿងតាវដ៏អាម៉ាស់ដែលបានផ្ទុះឡើងនេះ ក៏ត្រូវគេចាត់ទុកថា នឹងក្លាយជាបទពិសោធន៍ធំមួយ ដើម្បីអោយសហព័ន្ធប្រដាល់គុនខ្មែរ ពិសេសអាជ្ញាកណ្ដាល និងអ្នករៀបចំ នឹងរៀបចំខ្លួនកាន់តែល្អ ដើម្បីស្ដារមុខមាត់ ក្រោយការអាម៉ាស់មួយនេះផងដែរ។ ប្រភពចេញពីកីឡាករ ហាក់បង្ហាញការសាទរចំពោះ លិខិតព្រមានរបស់គណកម្មការជាតិអូឡាំពិកកម្ពុជាមុននេះភាគច្រើន បើទោះជាពួកគេម្នាក់ហាក់មិនបង្ហាញពីហេតុផលថាហេតុអ្វី ទើបពេញចិត្តនឹងសេចក្ដីព្រមាននេះក្ដី ៕
ចែករំលែកព័តមាននេះ