រាជធានីភ្នំពេញ៖ គិតត្រឹមរយៈពេល៦ខែដើមឆ្នាំ២០២១កន្លងមកនេះបរិមាណទំនិញឆ្លងកាត់កំពង់ផែស្វយ័តក្រុងព្រះសីហនុមានជាង៣លានតោនកើនឡើងជិត៥%បើប្រៀបធៀបរយៈពេលដូចគ្នាឆ្នាំ២០២០។
យោងតាមបាយការណ៍បូកសរុបការងារប្រចាំខែមិថុនា ឆ្នាំ២០២១របស់កំពង់ផែស្វយ័តក្រុងព្រះសីហនុបានបង្ហាញថាបរិមាណទំនិញឆ្លងកាត់កំពង់ផែក្នុងរយៈពេល៦ខែឆ្នាំ២០២១សរុបមានជាង៣,៥លានតោន ក្នុងនោះទំនិញនាំចូលមានជាង២,៦លានតោន(កើនឡើងប្រមាណជាង៥%) ហើយទំនិញនាំចេញមានជាង៨៣ម៉ឺនតោន(កើនឡើងជាង៣%) ពោលកើនឡើងប្រមាណ៤,៩១% បើប្រៀបធៀបនិងរយៈពេលដូចគ្នាឆ្នាំ២០២០។
បើតាមរបាយការណ៍របស់កំពង់ផែស្វយ័តក្រុងព្រះសីហនុក្នុងរយៈពេល៦ខែឆ្នាំ២០២១ កំពង់ផែទទួលបានប្រាក់ចំណូលពីអាជីវកម្មជាង៤៤លានដុល្លារអារិកកើនឡើងជាង១៤% បើប្រៀបធៀបនិងឆ្នាំ២០២០មានជាង៣៨លានដុល្លារអាមេរិក។ ការនាំចេញទំនិញរយៈពេល៦ខែកើនឡើងជាង៣% មានកំណើនតិចតួច ប៉ុន្តែខាងសមាគមភស្តុភារកម្មកម្ពុជាមានការសប្បាយចិត្តស្ថិតក្នុងកាលៈទេសៈដែលកម្ពុជាជួបវិបត្តិជំងឺកូវីដ១៩នេះ។
លោកឧកញ៉ា ស៊ិន ចន្ធី ប្រធានសមាគមភស្តុរភាកម្មកម្ពុជាមានប្រសាសន៍ឱ្យដឹងនៅថ្ងៃទី១២កក្កដានេះថា ការធ្វើអាជីវកម្មបើយើងប្រៀបធៀបទៅឆ្នាំមុនៗ ដែលកម្ពុជាមិនទាន់មានការរីករាលដាលជំងឺកូវីដ១៩ ការនាំចេញ វាមានកំណើនទាប។ប៉ុន្តែនៅឆ្នាំ២០២០និង២០២១នេះ យើងជួបវិបត្តិជំងឺកូវីដ១៩ អីចឹងការនាំចេញទំនិញពីកម្ពុជា តាមរយៈកំពង់ផែស្វយ័តក្រុងព្រះសីហនុនេះ វាកើនឡើងតិចតួច។ដូចនេះការធ្វើអាជីវកម្មរបស់យើងនៅក្នុងវិស័យឡូជីស្ទិកនិងដឹកជញ្ជូននេះ ឃើញថានៅមិនទាន់មានភាពល្អប្រសើរនោះទេ។
លោកឧកញ៉ា លើកឡើងថា« នៅក្នុងវិស័យឡូជីស្ទិកនិងដឹកជញ្ជូននេះកំពុងជួបបញ្ហា ដោយក្រុមហ៊ុនជាសមាជិកសមាគមមានមិនដល់១០%នោះទេ នៅអាចទទួលបានចំណូល ហើយជាង៦០%ផ្សេងទៀតមានត្រឹមតែសកម្មភាពតែគ្មានចំណូល និងប្រមាណ៣០%ទៀតកំពុងមានបញ្ហា ដោយសារការអូសបន្លាយនៃជំងឺកូវីដ១៩នេះ ហើយបើវានូវតែបន្តអូសបន្លាយពេលថែមទៀតយើងនឹងអាចផ្អាកដំណើរការឬក្រុមហ៊ុនក្ស័យធុនជាដើម»។
តាមប្រធានសមាគមភស្តុភារកម្មកម្ពុជា ថាកំណើននៃការនាំចេញទំនិញពីកម្ពុជាឆ្លងកាត់តារមយៈកំពង់ផែស្វយ័តក្រុងព្រះសីហនុនេះស្ថិតក្នុងវិបត្តិជំងឺកូវីដ១៩នេះ បើទោះបីមានការកើនឡើងតិចតួច តែយើងសប្បាយចិត្ត ដោយមានការគិតគូដល់សេដ្ឋកិច្ចពីប្រមុខរាជរដ្ឋាភិបាល៕
ចែករំលែកព័តមាននេះ