រាជធានីភ្នំពេញ ៖ ព្រឹត្តិការណ៍ប្រកួតប្រដាល់ដណ្ដើមខ្សែក្រវាត់ «សមរភូមិអ្នកប្រយុទ្ធស្រាបៀរលីអូវគ្គ២» ក្នុងប្រភេទទម្ងន់៦០គីឡូក្រាមដែលរៀបចំឡើងដោយស្ថានីយទូរទស្សន៍PNN នៅថ្ងៃទី១៩ ធ្នូ ខាងមុខនេះប្រជុំដោយអ្នកប្រដាល់ជើងខ្លាំងមកពី៣ប្រទេសផ្សេងគ្នា ។
ព្រឹត្តិការណ៍នេះធ្វើឡើងបន្ទាប់ពីព្រឹត្តិការណ៍វគ្គ១បានបញ្ចប់ទៅដោយជោគជ័យកាលពីថ្ងៃទី២៤ តុលា កន្លងទៅនេះ ។ កាលណោះកីឡាករសៀវ ង៉ុយ មកពីសមាគមកីឡាប្រដាល់ក្រសួងការពារជាតិ ក្លាយជាម្ចាស់ខ្សែក្រវាត់ ក្នុងប្រភេទទម្ងន់៥៤គីឡូក្រាម កីឡាករសែន រ៉ាឌី មកពីក្លិបអប្សរាគុនខ្មែរ ជាម្ចាស់ខ្សែក្រវាត់ក្នុងប្រភេទទម្ងន់៥៧គីឡូក្រាម និងកីឡាករថៃ មង្គលពេជ្រ ចរប្រាឌិត ជាម្ចាស់ខ្សែក្រវាត់ក្នុងប្រភេទទម្ងន់៦៣,៥គីឡូក្រាម ។
នៅក្នុងសន្និសីទកាសែតដែលបានធ្វើឡើងនៅសណ្ឋាគារភ្នំពេញកាលពីថ្ងៃទី១៤ ធ្នូ កន្លងមកនេះ លោក សំណព្វ អ្នកគ្រប់គ្រងកម្មវិធីប្រដាល់ប្រចាំស្ថានីយទូរទស្សន៍PNNបានឱ្យដឹងថា សម្រាប់ការប្រកួតលើកនេះមានតែមួយប្រភេទទម្ងន់ប៉ុណ្ណោះ គឺ៦០គីឡូក្រាម ដែលមានកីឡាករកម្ពុជា៤រូប កីឡាករឡាវ២រូប និងកីឡាករថៃ២រូប ។
កីឡាករកម្ពុជាមាន ឡៅ ចន្ទ្រា មកពីក្លិបកងទ័ពឆត្រយោង៩១១, សូត្រ ប៊ុនធី មកពីក្លិបបក្សីស្លាបដែក, ឃឹម បូរ៉ា មកពីក្លិបរស្មីភូមិគាបខេត្តបន្ទាយមានជ័យ និងសេក គឹមផៃ មកពីក្លិបអង្គរមានជ័យខេត្តសៀមរាប។ចំណែកកីឡាករថៃមាន Jack Nondgyim និងKongprachin SitsojolayរីឯកីឡាករឡាវមានNawana Chopadcharphon និងChhlam Khaw ។ ការប្រកួតនេះធ្វើឡើងតាមរូបមន្តជម្រុះតាមពូលដែលកីឡាករឡាវនិងថៃនៅពូលជាមួយគ្នា ។ កីឡាករទាំង២ពូលប្រកួតជម្រុះរកអ្នកដែលមានពិន្ទុច្រើនជាងគេក្នុងមួយពូល២រូបដើម្បីឡើងមកប្រកួតនៅវគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រជាបន្តទៀត ។
លោកសំណព្វបានឱ្យដឹងទៀតថា សម្រាប់រង្វាន់ដែលត្រូវប្រគល់ជូនគឺម្ចាស់ជើងឯកទទួលបានទឹកប្រាក់៥.០០០ដុល្លារសហរដ្ឋអាមេរិក និងប្រាក់ខែប្រចាំខែ២៥០ដុល្លារក្នុងមួយខែរយៈពេល៣ខែ ។ ចំណែកជើងឯករងទទួលបាន៣.០០០ដុល្លារសហរដ្ឋអាមេរិក ចំណាត់ថ្នាក់លេខ៣ទទួលបាន២.០០០ដុល្លារសហរដ្ឋអាមេរិក និងចំណាត់ថ្នាក់លេខ៤ទទួលបាន១.០០០ដុល្លារសហរដ្ឋអាមេរិក ៕
ចែករំលែកព័តមាននេះ