- ភ្នំពេញ
ភ្នំពេញ៖ ចាប់តាំងពីថ្ងៃទី១ ខែកក្កដា ឆ្នាំ២០២១ ក្នុងពេលថ្លែងសារពិសេសជូនជនរួមជាតិ អំពីស្ថានភាពជំងឺកូវីដ១៩ នៅកម្ពុជា សម្តេចតេជោ នាយករដ្ឋមន្ត្រី ហ៊ុន…
ភ្នំពេញ៖ ចាប់តាំងពីថ្ងៃទី១ ខែកក្កដា ឆ្នាំ២០២១ ក្នុងពេលថ្លែងសារពិសេសជូនជនរួមជាតិ អំពីស្ថានភាពជំងឺកូវីដ១៩ នៅកម្ពុជា សម្តេចតេជោ នាយករដ្ឋមន្ត្រី ហ៊ុន…
ភ្នំពេញ៖ ចាប់តាំងពីថ្ងៃទី១ ខែកក្កដា ឆ្នាំ២០២១ ក្នុងពេលថ្លែងសារពិសេសជូនជនរួមជាតិ អំពីស្ថានភាពជំងឺកូវីដ១៩ នៅកម្ពុជា សម្តេចតេជោ នាយករដ្ឋមន្ត្រី ហ៊ុន សែន បានណែនាំដល់រាជធានីខេត្តទាំងអស់ ត្រូវត្រៀមរៀបចំក្តារមឈូស សម្រាប់ដាក់សពអ្នកស្លាប់ដោយសារជំងឺកូវីដ១៩។
ក្នុងបទបញ្ជាណែនាំនោះ សម្តេចតេជោ ហ៊ុន សែន បានប្រកាសឲ្យយកឈើ ដែលគណៈកម្មការចម្រុះដឹកនាំដោយលោកនាយឧត្តមសេនីយ៍ សៅ សុខា ចាប់រឹបអូសបានកន្លងមក យកទៅធ្វើមឈូស ព្រមទាំងណែនាំដល់ខេត្តរាជធានីទាំងអស់ ត្រូវទិញក្តារមឈូស ក្នុងរាជធានីខេត្តនិមួយៗ យ៉ាងហោចណាស់ ៨០% នៃក្តារមឈូស ដែលមាន ដើម្បីត្រៀមដាក់សពអ្នកស្លាប់ដោយកូវីដ។
ជាមួយគ្នានោះ ក៏មានសេចក្តីរាយការណ៍ថា រាជរដ្ឋាភិបាលកម្ពុជា គ្រោងទិញក្តារមឈូសប្រមាណ ៣.០០០ ផ្តល់ជូនអាជ្ញាធរខេត្តរាជធានី។ ក្នុងនោះ កាលពីថ្ងៃទី៦ ខែកក្កដា ឆ្នាំ២០២១ ក្តារមឈូសប្រមាណ ១០០០ ក្តារមឈូស ត្រូវបានដឹកចូលមកពីថៃ តាមច្រកព្រំដែន ក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ។ ក្តារមឈូសរបស់ថៃ ១តម្លៃ ១០០០បាត ដោយមន្ត្រីអះអាងថា ជាតំលៃថោកជាងក្តារមឈូស ក្នុងស្រុក ទើបរាជរដ្ឋាភិបាលកម្ពុជា បានកម្ម៉ង់ទិញពីប្រទេសថៃ សម្រាប់បែងចែកជូនអាជ្ញាធររាជធានីខេត្ត សម្រាប់ត្រៀមបម្រុងដាក់សាកសពអ្នកស្លាប់ដោយជំងឺកូវីដ។
ជាមួយគ្នានោះ ក្រសួងបរិស្ថាន ក៏បាន និងកំពុងចាប់ផ្តើមធ្វើក្តារមឈូស ដែលធ្វើពីឈើសរុបប្រមាណជាង ១.៣០០ម៉ែត្រគូប។ ឈើទាំងនេះ ត្រូវបានក្រសួងបរិស្ថាន ចាប់រឹបអូសបាន អំឡុងពេលបង្ក្រាបបទល្មើសធនធានធម្មជាតិ កាលពីឆ្នាំ២០២០ និងនៅឆ្នាំ២០២១ នេះ។ ឈើទាំងនេះ អាចផលិតក្តារមឈូស បានប្រមាណជាង ១ ០០០ នឹងត្រូវជូនគណៈកម្មការជាតិប្រឆាំងនឹងជំងឺកូវីដ ១៩ ដើម្បីចាត់ចែងដាក់សព ដែលស្លាប់ដោយជំងឺកូវីដ១៩។
ក្រសួងបរិស្ថាន បានប្រកាសថា គិតមកដល់ថ្ងៃទី១១ ខែកក្កដា មន្ទីរបរិស្ថានខេត្ត ចំនួន ១៧ បានផលិតក្តារមឈូស បានចំនួនជាង ៤០០ និងបានកំពុងបន្តការផលិតបន្ថែមទៀត។
ពាក់ព័ន្ធនឹងជំងឺកូវីដ១៩ ក្រសួងសុខាភិបាល បានប្រកាសថា ក្នុងរយៈពេល ២៤ម៉ោងចុងក្រោយនេះ នៅទូទាំងប្រទេស មានអ្នកឆ្លងកូវីដ១៩ ចំនួន ៨៣០នាក់ ជាសះស្បើយ ១០១២នាក់ និងករណីស្លាប់ ចំនួន ២៨នាក់។ គិតត្រឹមថ្ងៃទី១២ ខែកក្កដា ឆ្នាំ២០២១ នៅទូទាំងប្រទេស មានករណីឆ្លងកូវីដ១៩ សរុប ចំនួន ៦២ ៧០០នាក់។ ករណីជាសះស្បើយសរុប ចំនួន ៥៤ ៤៨៩នាក់ និងករណីស្លាប់សរុប ចំនួន ៩៥៣នាក់។
បើគិតចាប់ពីថ្ងៃទី១១មីនា មកដល់ថ្ងៃទី១២ ខែកក្កដា ឆ្នាំ២០២១ ករណីអ្នកស្លាប់ដោយជំងឺកូវីដ១៩ នៅកម្ពុជា សរុបមានចំនួន ៩៥៣នាក់ហើយ។ មកដល់ថ្ងៃទី១២កក្កដា ឆ្នាំ២០២១ នៅភ្នំពេញ នៅសល់សពប្រមាណ ៥០នាក់ ដែលមិនទាន់បូជា។ ការស្តុកទុកសាកសពក្នុងទូរក្លាស្សេនេះ មិនមែនមកពីខ្វះក្តារមឈូសទេ តែមកពីមិនមានបច្ចាសម្រាប់បូជា ខណៈដែលកន្លែងបូជាសពអ្នកស្លាប់ដោយសារជំងឺកូវីដ ១៩ សម្រាប់រាជធានីភ្នំពេញ ដែលកំពុងសាងសង់ លើផ្ទៃដី ៧០ហិកតា នៅស្រុកថ្ពង ខេត្តកំពង់ស្ពឺ មកដល់ពេលនេះ មិនទាន់រួចរាល់នៅឡើយទេ។
ជាការពិត ការរៀបចំក្តារមឈូសដល់សព គឺជាការគោរពដល់អ្នកស្លាប់ ទៅតាមជំនឿប្រពៃណី ដែលខ្មែរយើង តែងតែប្រារព្ធ។ ប៉ុន្តែសម្រាប់អ្នកស្លាប់ដោយកូវីដ គឺជាករណីពិសេស ព្រោះថា សពអ្នកស្លាប់ដោយសារជំងឺកូវីដ១៩ មិនត្រូវបានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណីទំនៀមទម្លាប់ឡើយ។ ពោលគឺដើម្បីទប់ស្កាត់ការឆ្លងរាលដាលជំងឺកូវីដ១៩ គឺសពអ្នកស្លាប់ដោយសារជំងឺកូវីដ១៩ ត្រូវបានគណៈកម្មការ ដែលដឹកនាំដោយគ្រូពេទ្យ រៀបចំចាត់ចែងតាមក្បួនវេជ្ជសាស្ត្រយ៉ាងត្រឹមត្រូវ ហើយកន្លងមក ស្លាប់ភ្លាម សពនោះ ត្រូវបានបញ្ជូនទៅបូជាភ្លាម ដោយមិនមានសាច់ញាត្តិណា អាចដង្ហែសពទៅបូជា ឬទៅបញ្ចុះឡើយ។ ចុងក្រោយ មានតែក្រុមគ្រូពេទ្យ យកធាតុ ដែលដាក់ក្នុងកោដិ យកទៅឲ្យសាច់ញាត្តិតែប៉ុណ្ណោះ។
យ៉ាងណាក៏ដោយ ការត្រៀមក្តារមឈូសនេះ មិនមែនជាការបន្លាច មិនមែនជាការប្រមាថ ហើយក៏មិនមែនជាក្តីសុបិន្តដែរ តែវាជាការពិត ខណៈឥឡូវនេះ អត្រានៃការស្លាប់ដោយសារជំងឺកូវីដ នៅទូទាំងប្រទេសយើង មានចន្លោះពី ២០ ទៅ ៣០នាក់ ក្នុង ១ថ្ងៃៗ។
នេះគឺជាការយកចិត្តទុកដាក់ខ្ពស់របស់សម្តេចតេជោ ហ៊ុន សែន ក៏ដូចជា រាជរដ្ឋាភិបាលកម្ពុជា ចំពោះសុខទុក្ខប្រជាពលរដ្ឋខ្មែរ ហើយក៏ដូចជាការរក្សាកិត្តិយស និងជាការគោរពដល់សពឲ្យមានមឈូសត្រឹមត្រូវ ដោយសម្តេច បានមានប្រសាសន៍ថា «ទោះបីជាប្រទេសយើងក្រ តែមិនត្រូវឲ្យពលរដ្ឋខ្មែរយើង ស្លាប់ដោយអណោចអធ័មឡើយ»។
ដូច្នេះអាជ្ញាធរសមត្ថកិច្ច និងពេទ្យ គួរតែចាត់ចែងតាមការគួរ លើសពអ្នកស្លាប់ដោយកូវីដ ដោយរកក្តារមឈូស ក្នុងស្រុក តាមតំបន់នោះ ដាក់សពឲ្យបានសមរម្យ តែក៏មិនចាំបាច់ដល់ថ្នាក់យកឈើប្រណិតៗ ដែលអាជ្ញាធរសមត្ថកិច្ច ចាប់បានក្នុងបទល្មើសបង្ក្រាបព្រៃឈើក្នុងពេលកន្លងមក យកមកធ្វើមឈូសនោះទេ។ កន្លងមក បើមានអ្នកឈឺកូវីដ រហូតដល់ស្លាប់ គឺសាច់ញាត្តិ បានឃើញត្រឹមតែឡើងឡានពេទ្យ ចេញពីផ្ទះ ទៅកន្លែងសម្រាកព្យាបាលប៉ុណ្ណោះ ហើយក៏លែងបានឃើញមុខផ្ទាល់ទៀតហើយ។
កន្លងមក កុំតែពេទ្យ ឬអាជ្ញាធរសមត្ថកិច្ច ថតរូបពេលលើកសព ដែលរុំក្រណាត់កៅស៊ូតាមក្បួនពេទ្យ បញ្ចូលឡ សម្រាប់បូជា កុំអី ក៏យើងមិនបានឃើញនោះឡើយ។ ប៉ុន្តែចុងក្រោយនេះ ក៏ឃើញក្រុមអ្នកពាក់ខោអាវពេទ្យការពារកូវីដ លើកមឈូស បញ្ចូលឡបូជា នៅតាមបណ្តាខេត្តនានា ដែលត្រូវបានថត មកផ្សព្វផ្សាយ។
ដូច្នេះ គួរតែមានការកំណត់ ជាគោលការណ៍ពីការរៀបចំក្តារមឈូស សម្រាប់សពអ្នកស្លាប់ដោយកូវីដ ហើយគួរតែប្រើក្តារមឈូសក្នុងស្រុកឲ្យអស់លទ្ធភាព ព្រោះថា ស្រុកយើង មិនខ្វះឈើ សម្រាប់គ្រាន់តែធ្វើមឈូសនោះទេ។ តែក៏មិនគួរ ដល់ថ្នាក់ថា យកឈើល្អប្រណិតៗ មានបេន នាងនួន ឬគ្រញូង ដែលគណៈកម្មការដឹកនាំដោយលោកនាយឧត្តមសេនីយ៍ សៅ សុខា ឬក៏ក្រសួងបរិស្ថាន ចាប់បង្ក្រាបបាន កន្លងមក យកមកធ្វើក្តារមឈូស សម្រាប់ដាក់សព អ្នកស្លាប់ដោយកូវីដនោះឡើយ។
ក្នុងរឿងនេះ គួរតែលៃលកយ៉ាងណា ឲ្យចំណាយអស់តិច ហើយបើអាច គួរតែទុកថវិកា ដែលចំណាយលើក្តារមឈូសថ្លៃៗនោះ ប្រគល់ជូនក្រុមគ្រួសារសពវិញ ប្រសើរជាជាង៕
ចែករំលែកព័តមាននេះ