ប្រទេសមីយ៉ាន់ម៉ា ៖ យោងតាមក្រុមហ៊ុនក្នុងស្រុក Parami Roundtable Group ឲ្យដឹងថា ប្រទេសមីយ៉ាន់ម៉ា មានកិច្ចការជាច្រើនដែលត្រូវធ្វើ មុនពេលប្រទេសនេះត្រៀមលក្ខណៈចូលរួមក្នុងសមាគមសេដ្ឋកិច្ចអាស៊ាន (AEC) ក្នុងនោះរាប់បញ្ចូលទាំងការធ្វើឲ្យប្រសើរឡើងនូវការដឹកជញ្ជូន ហេដ្ឋារចនាសម្ព័ន្ធ ការផ្គត់ផ្គង់អគ្គិសនី និងគោលនយោបាយសេដ្ឋកិច្ចផងដែរ ។
សមាគមសេដ្ឋកិច្ចអាស៊ាន (AEC) នឹងចូលជាធរមាននៅដំណាច់ឆ្នាំនេះ ដែលនឹងបើកប្រតិបត្តិការនូវពាណិជ្ជកម្មតាមព្រំដែនក្នុងទម្រង់សហគមន៍សេដ្ឋកិច្ចតែមួយ ។ មីយ៉ាន់ម៉ា ឡាវ និងកម្ពុជា នៅមិនទាន់បានផ្តល់នូវការត្រៀមខ្លួនចូលរួមក្នុងសមាគមសេដ្ឋកិច្ចអាស៊ាននៅឡើយទេរហូតដល់ឆ្នាំ២០១៨ ក្នុងការអនុវត្តនូវការកែទម្រង់បន្ថែម និងការទទួលយកបណ្តាប្រទេសដទៃ ។
លោកស្រី Daw Khin Ohn ថ្នាក់ដឹកនាំក្រុមហ៊ុន Parami បានថ្លែងនៅក្នុងកិច្ចពិភាក្សាមួយកាលពីសប្តាហ៍មុនថា ៖ « មីយ៉ាន់ម៉ាមិនទាន់បានត្រៀមខ្លួនចូលរួមក្នុងសមាគមសេដ្ឋកិច្ចអាស៊ាននៅឡើយទេ ប៉ុន្តែខ្លួនត្រូវតែអនុវត្តតាមការធ្វើនិយ័តកម្មទាំងឡាយ ពីព្រោះមីយ៉ាន់បានចុះហត្ថលេខាចូលជាសមាជិករួចហើយ » ។
លោកស្រីបន្តថា ៖ « កាលពីអតីតកាល មីយ៉ាន់ម៉ា ត្រូវបានរិះគន់ដោយសមាជិកដទៃទៀតរបស់អាស៊ាន ពីការធ្លាក់ចុះលើការអនុវត្តតាមការធ្វើនិយ័តកម្មផ្សេងៗ ។ ដើម្បីចៀសវាងការកើតមានរឿងនេះសាជាថ្មីនោះ ការត្រៀមខ្លួនរបស់យើង គួរតែចាប់ផ្តើមពីពេលនេះតទៅ » ។
ស្របពេលទំហំពាណិជ្ជកម្មទ្វេភាគីរបស់មីយ៉ាន់ម៉ា មានចំនួន២៣ប៊ីលានដុល្លារក្នុងឆ្នាំ២០១៣ ទំហំពាណិជ្ជកម្មទ្វេភាគីរបស់សិង្ហបុរីមានចំនួន៧៨៣ប៊ីលានដុល្លារ, ថៃ៤៧៨ប៊ីលានដុល្លារ, ម៉ាឡេស៊ី៤៣៤ប៊ីលានដុល្លារ, ឥណ្ឌូណេស៊ី៣៦៩ប៊ីលានដុល្លារ, វៀតណាម២៦៤ប៊ីលានដុល្លារ និងហ្វ៊ីលីពីន១១៩ប៊ីលានដុល្លារ ។
នៅក្នុងកិច្ចខិតខំប្រឹងប្រែងជំរុញពាណិជ្ជកម្មនេះ មីយ៉ាន់ម៉ាបានណែនាំនូវការកាត់ពន្ធពាណិជ្ជកម្មចាប់តាំងពីឆ្នាំ២០១៣ ។ ការប្រតិបត្តិបែបនេះនៅមិនទាន់បានកំណត់ពីផលប៉ះពាល់ និងបរិមាណពាណិជ្ជកម្មដែលសម្រេចបានត្រឹម២៩ប៊ីលានដុល្លារក្នុងឆ្នាំសារពើពន្ធ២០១៤-២០១៥ នៅឡើយទេ ។
នៅដំណាច់ខែវិច្ឆិកា ពាណិជ្ជកម្មនៃឆ្នាំសារពើពន្ធឆ្នាំនេះ មានចំនួន១៧,១ប៊ីលានដុល្លារនេះបើតាមតួលេខពីក្រសួងពាណិជ្ជកម្ម ។ ការអូសបន្លាយពេលនៃការដាក់ទណ្ឌកម្មសេដ្ឋកិច្ចរបស់សហរដ្ឋអាមេរិក ថ្លៃដឹកជញ្ជូនខ្ពស់ និងកម្សោយនៃហេដ្ឋារចនាសម្ព័ន្ធ គឺមិនបានជួយដល់បញ្ហានេះឡើយ ។
សមាជិកក្រុមហ៊ុនខាងលើ លោក Daw Tin Tin Htwe ឱ្យដឹងថា ៖ « ប្រទេសនេះមិនបានសម្លឹងឃើញគុណប្រយោជន៍នៃកំណើនក្នុងទំហំពាណិជ្ជកម្មនោះទេ បើទោះជាការកាត់បន្ថយពន្ធត្រូវបានណែនាំក្តី ព្រោះតែមានភាពខ្សោយក្នុងគោលនយោបាយសេដ្ឋកិច្ច ហើយមនុស្សមួយចំនួនដឹងពីការទទួលយកប្រយោជន៍នៃការកាត់ពន្ធ » ។
តាមពិត មីយ៉ាន់ម៉ា មានកាលានុវត្តភាពល្អច្រើន ប៉ុន្តែពលរដ្ឋមីយ៉ាន់ម៉ាមិនដឹងថា តើក្រេបយកគុណប្រយោជន៍នោះដោយរបៀបណា ។
លោក Daw Tin Tin Htwe ថ្លែងទៀតថា ៖ « សេដ្ឋកិច្ចមីយ៉ាន់ម៉ានឹងកើនឡើងយ៉ាងលឿន ប្រសិនជាប្រទេសនេះធ្វើការតាមការប្តេជ្ញាចិត្តជាមួយការធ្វើនិយ័តកម្មនៃសមាគមសេដ្ឋកិច្ចអាស៊ាន នៅពេលដែលអង្គការនេះចូលជាធរមាន » ។
ចំណែកប្រធានក្រុមហ៊ុន លោក Tin Cho មានប្រសាសន៍ថា ៖ « អាជីវកម្មក្នុងស្រុកមួយចំនួនអាចប្រឈមនឹងការបាត់បង់ នៅពេលទីផ្សារតែមួយត្រូវបានបង្កើតឡើង ប៉ុន្តែប្រទេសរបស់យើងនឹងមានសេដ្ឋកិច្ចកើនឡើង ប្រសិនជាយើងមានគោលនយោបាយល្អត្រឹមត្រូវ និងមានការរៀបចំល្អប្រសើរនោះ » ។
ទោះជាយ៉ាងណា មីយ៉ាន់ម៉ានៅតែត្រូវការហេដ្ឋារចនាសម្ព័ន្ធសេដ្ឋកិច្ច ប្រព័ន្ធដឹកជញ្ជូន ការផ្គត់ផ្គង់អគ្គិសនី និងគោលនយោបាយសេដ្ឋកិច្ចប្រសើរជាងមុន ។
ក្នុងចំណោមបណ្តាប្រទេសសមាជិកអាស៊ាន មីយ៉ាន់ម៉ាបានជាប់ចំណាត់ថ្នាក់ទី៧ ក្នុងឆ្នាំ២០១៣ សម្រាប់កំណើននៃការវិនិយោគបរទេស ជាមួយទំហំទឹកប្រាក់២,៦ប៊ីលានដុល្លារ ខណៈសិង្ហបុរីកើន៥៦ប៊ីលានដុល្លារ, ឥណ្ឌូណេស៊ីកើន១៨ប៊ីលានដុល្លារ ហើយថៃ និងម៉ាឡេស៊ី កើន១២ប៊ីលានដុល្លារ ៕
ចែករំលែកព័តមាននេះ