បន្ទាយមានជ័យ ៖ ឃាត់ខ្លួនក្មេងទំនើង១ក្រុម ៣នាក់ជិះម៉ូតូកាន់កាំបិត និងដាវស្វែងកាប់ក្មេងទំនើង១ក្រុមទៀត ដែលដេញកាប់ពួកគេកន្លងទៅ ត្រូវបានបញ្ជូនទៅសាលាដំបូងខេត្តបន្ទាយមានជ័យ ចាត់ការតាមច្បាប់ នៅថ្ងៃទី១៣ ខែកក្កដា…
បន្ទាយមានជ័យ ៖ ឃាត់ខ្លួនក្មេងទំនើង១ក្រុម ៣នាក់ជិះម៉ូតូកាន់កាំបិត និងដាវស្វែងកាប់ក្មេងទំនើង១ក្រុមទៀត ដែលដេញកាប់ពួកគេកន្លងទៅ ត្រូវបានបញ្ជូនទៅសាលាដំបូងខេត្តបន្ទាយមានជ័យ ចាត់ការតាមច្បាប់ នៅថ្ងៃទី១៣ ខែកក្កដា ឆ្នាំ២០២១ ។
លោកវរៈសេនីយ៍ត្រី យ៉ាន់ សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណបានប្រាប់ថា ៖ ក្មេងទំនើងដែលឃាត់ខ្លួន៣នាក់មាន ១.ឈ្មោះ ផូ ភា ហៅចយ ភេទប្រុស អាយុ១៩ឆ្នាំ ២.ឈ្មោះ មឿន ស៊ីណែត ភេទប្រុស អាយុ១៧ឆ្នាំ ៣.ឈ្មោះ ង៉ាម សារុន ភេទប្រុសអាយុ១៧ឆ្នាំ ជនសង្ស័យទាំង៣នេះ រស់នៅភូមិ៣ សង្កាត់ព្រះពន្លា ក្រុងសិរីសោភ័ណ ។
លោកបានបញ្ជាក់ថា ៖ ដើម្បីការពារសន្តិ និងសណ្តាប់ធ្នាប់ជូនប្រជាពលរដ្ឋ កម្លាំងកងរាជអាវុធហត្ថក្រុងសិរីសោភ័ណបានចេញល្បាតពេលយប់បានប្រទះឃើញក្មេងទំនើង១ក្រុមគ្នា៣នាក់ ជិះម៉ូតូ១គ្រឿង ម្នាក់កាន់ដាវសាំម៉ូរ៉ៃ១ និងម្នាក់ទៀត កាន់កាំបិតជិះម៉ូតូអូសតាមផ្លូវ បណ្តាលប្រជាពលរដ្ឋមានការព្រួយបារម្ភ ដោយពួកនេះធ្វើសកម្មភាពកាប់ចាក់គ្នាកន្លងមក ដែលប៉ះពាល់សន្តិសុខ និងសណ្តាប់ធ្នាប់ ហើយឃាត់ខ្លួនបាន៣នាក់ និងកាំបិតចំនួន២ ម៉ូតូ១គ្រឿង កាលពីយប់ថ្ងៃទី១២ ខែកក្កដា ឆ្នាំ២០២១ តាមបណ្តោយផ្លូវក្រុងសិរីសោភ័ណ ។
លោកវរៈសេនីយ៍ត្រី យ៉ាន់ សុវណ្ណ បានបញ្ជាក់ថា ៖ ក្រោយឃាត់ខ្លួនក្មេងទំនើង៣នាក់ បានបញ្ជូនមកបញ្ជាការដ្ឋានកងរាជអាវុធហត្ថក្រុងសិរីសោភ័ណ ដើម្បីសាកសួរតាមចម្លើយសារភាពពីក្មេងទំនើងថា ខ្លួនពិតជាពួកគេបានជិះម៉ូតូកាន់កាំបិតពិតមែន ដោយពួកគេខឹងក្មេងទំនើង១ក្រុមទៀត បានស្ទាក់ដេញកាប់ពួកគេទើបខឹងបានទៅយកកាំបិតជិះម៉ូតូ តាមរកកាប់វិញ តែមិនទាន់ឃើញផង ត្រូវសមត្ថកិច្ចចាប់បានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់ ៕
ចែករំលែកព័តមាននេះ