ខេត្តឧត្តរមានជ័យ ៖ ប្រាសាទតាមាន់និងតាក្របី ស្ថិតនៅក្នុងស្រុកបន្ទាយអំពិលខេត្តឧត្តរមានជ័យ ដោយធ្វើដំណើរពីទីប្រជុំជនឃុំគោកមន ស្រុកបន្ទាយអំពិល ឆ្ពោះទៅព្រំដែនកម្ពុជា-ថៃ ចម្ងាយ១៨គីឡូម៉ែត្របែកចេញពីថ្នល់ជាតិលេខ៥៦A ពីសិរីសោភ័ណខេត្តបន្តាយមានជ័យ ឆ្ពោះទៅក្រុងសំរោង ខេត្តឧត្តមានជ័យប្រវែង១២០គីឡូម៉ែត្រ តាមផ្លូវកៅស៊ូរហូត ។ ប្រាសាទតាក្របីមានចម្ងាយពីប្រាសាទតាមាន់៧គីឡូម៉ែត្រ ប៉ែកខាងជើងនៅតាមដងភ្នំដងរែក ។
ជារៀងរាល់ថ្ងៃកងកម្លាំងការពារលើបរិវេណប្រាសាទនោះ គឺនៅរួមគ្នារវាងទាហានកម្ពុជា និងទាហានថៃ ដែលបើកឲ្យអ្នកទេសចរទៅកម្សាន្តបានដូចគ្នាទាំងសងខាង ។ ទាហានកម្ពុជា (សុំមិនបញ្ចេញឈ្មោះ) ក្នុងវរសេនាតូចលេខ៤២២ក្នុងយោធភូមិភាគទី៤ ឈរជើងនៅទីនោះឱ្យដឹងកាលពីពេល ថ្មីៗកន្លងមកថា ក្រោយពីប៉ះទង្គិចគ្នាក្នុងការដណ្តើមឈរជើងនៅទីនោះតាំងពីឆ្នាំ២០១០មក ថ្នាក់ដឹកនាំប្រទេសទាំងពីរបានឯកភាពគ្នាឲ្យឈរជើងរួមគ្នាជាបណ្តោះអាសន្នសិន ព្រោះតែមានភាពមិនច្បាស់លាស់ពីខ្សែបន្ទាត់ព្រំដែននៃប្រទេសទាំងពីរ ហើយទុកពេលឲ្យគណៈកម្មការព្រំដែន រួមគ្នាពិនិត្យដោះស្រាយជាក្រោយ និងយល់ព្រមឲ្យអ្នកទេសចរទាំងសងសាងខាងអាចទៅកម្សាន្តបានដូចគ្នា ។
ចំពោះលក្ខណៈភូមិសាស្ត្រប្រាសាទតាមាន់គឺមិនខុសគ្នាពីប្រាសាទព្រះវិហារឡើយ ដោយប្រាសាទស្ថិតនៅចង្កេះភ្នំដែលខាងកម្ពុជាមានចំណោតខ្លាំងជាងខាងប្រទេសថៃ ហើយពីមុនមកលំបាកក្នុងការធ្វើដំណើរទៅកម្សាន្ត ។ ក្នុងឆ្នាំ២០០៨និង២០០៩ ដែលកម្ពុជាមានផ្លូវស្រួលហើយនោះ ទើបមានបញ្ហាកន្លងមក តែ អ្វីៗបានសម្រួលដោះស្រាយឲ្យ្នាដល់សព្វថ្ងៃនេះ ។
ប្រាសាទតាមាន់ ត្រូវឡើងភ្នំមានចម្ងាយប្រមាណ៥០០ម៉ែត្រ ហើយជារៀងរាល់ថ្ងៃមានអ្នកទេសចរទៅកម្សាន្តក្នុងថ្ងៃធម្មតា ពី៥០នាក់ទៅ១០០នាក់ តែបើចំពោះថ្ងៃបុណ្យទាន គឺកើនឡើងច្រើនទាំងអ្នកទេសចរជាតិ និងអន្តរជាតិ ។ សរុបរួមទៅ គឺសភាពការណ៍នៅលើប្រាសាទមិនស្ងប់ស្ងាត់ឡើយតែងតែមានភ្ញៀវឡើងចុះមិនដាច់ទាំងខាងកម្ពុជា និងថៃជារៀងរាល់ថ្ងៃ ។
បើបន្តដំណើរតាមផ្លូវលេខ56A ដដែលទៅខេត្តបន្ទាយមានជ័យវិញនោះ នឹងទៅដល់ប្រាសាទបន្ទាយឆ្មារ មានចម្ងាយពីខេត្តបន្ទាយមានជ័យប្រមាណជាង៥០គីឡូម៉ែត្រ និងចម្ងាយពីខេត្តឧត្តរមានជ័យ៨០គីឡូម៉ែត្រ។ សព្វថ្ងៃក្រសួងវប្បធម៌កំពុងជំរុញការរៀបចំអភិវឌ្ឍន៍ អភិរក្សឲ្យមានដំណើរការឡើងវិញ បន្ទាប់ពីខ្ទេចខ្ទាំដោយសារសង្គ្រាមកន្លងមក ។
លោកប្រាក់ សុណ្ណរ៉ា អគ្គនាយកបេតិកភណ្ឌនៃក្រសួងវប្បធម៌បញ្ជាក់ថា ក្រសួងវប្បធម៌ និងវិចិត្រសិល្បៈមានដៃគូក្នុងកិច្ចការអភិរក្សរៀបចំប្រាសាទតាំងពីឆ្នាំ២០០៨ មកដល់ឆ្នាំ២០១៤ទើបបញ្ចប់ ។ ប្រាសាទបន្ទាយឆ្មារបាន រៀបចំថ្មដែលដួលរលំរាយប៉ាយរាបដល់ដី សល់ពីសង្គ្រាមនោះឲ្យចេញជាតួប្រាង្គចំនួន១៧ ។
ចំណែកប្រាសាទតាណែមត្រូវរៀបចំអភិរក្សជាបន្ទាន់តាមតម្រូវការដែលភ្ញៀវជាតិនិងអន្តរជាតិចង់ស្គាល់ និងបានឃើញ ដោយក្រសួងវប្បធម៌កំពុងតែត្រៀមចុះអនុស្សរណៈជាមួយដៃគូបន្តពីសាកលវិទ្យាល័យសូអាស់ ក្រុងឡុងដ៍ ចក្រភពអង់គ្លេស ។ ការចុះអនុស្សរណៈនៅថ្ងៃទី២១ ខែធ្នូ ឆ្នាំ២០១៥ នៅក្រសួងវប្បធម៌ដើម្បីពង្រឹងកិច្ចការរៀបចំអភិរក្ស៥ឆ្នាំទៅមុខទៀត ក្នុងការចំណាយបដិភាគជាមួយរាជរដ្ឋាភិបាលកម្ពុជា ។ កិច្ចអភិរក្សនោះមានក្នុងគម្រោងអប់រំ ស្រាវជ្រាវ បច្ចេកទេសចម្លាក់គ្រប់ជំនាញ តាមស្ថានភាពប្រាសាទ ផ្សេងៗ ដែលមានការទ្រុឌទ្រោមខ្លាំង ហើយមានការអភិវឌ្ឍតិចតួចបំផុតនោះឲ្យកាន់តែមានភាពរីកចម្រើនឡើង ប្រកបដោយគុណភាព ។
លោកប្រាក់ សុណ្ណរ៉ា បន្ថែមថា កន្លងមកប្រាសាទបន្ទាយឆ្មារ មានសមាគមទេសចរណ៍នៅតំបន់នោះជួយជ្រោមជ្រែងរៀបចំឡើងវិញ និងមានអង្គការអាល់ហ្វាវ៉ូដជួយឧបត្ថម្ភជាចំណែក ខ្លះៗ ឯផ្នែកបច្ចេកទេសចម្លាក់មានអង្គការសាត្រា បានជួយដោយមានការឧបត្ថម្ភពីអង្គការមិត្តវប្បធម៌ខ្មែរ ដែលជាចំណែកមួយទៀត ក្រោមការត្រួតពិនិត្យយល់ព្រមពីក្រសួងវប្បធម ៕
ចែករំលែកព័តមាននេះ