រាជធានីភ្នំពេញ ៖ ក្រសួងសុខាភិបាល និងអាជ្ញារាជធានីភ្នំពេញ ណែនាំដល់អ្នកជំងឺកូវីដ-១៩ ដែលសម្រាកនៅតាមផ្ទះត្រូវដាក់សំរាមនៅក្នុងស្បោងដាច់ដោយឡែកពីអ្នកដទៃឲ្យបានលើសពី៧២ម៉ោង ទើបអាចបញ្ចេញមកខាងក្រៅបាន ដើម្បីចៀសវាងការឆ្លងបន្តទៅអ្នកដទៃ និងងាយស្រួលអ្នកប្រមូលដឹកជញ្ជូន។
ថ្លែងក្នុងសន្និសីទសារព័ត៌មានស្ដីពីនីតិវិធី និងយន្តការព្យាបាលតាមផ្ទះ ចំពោះអ្នកជំងឺកូវីដ-១៩ កម្រិតស្រាល និងគ្មានរោគសញ្ញា សម្រាប់ភូមិសាស្ត្ររាជធានីភ្នំពេញ នៅព្រឹកថ្ងៃទី១២ ខែកក្កដា លោកវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល បានមានប្រសាសន៍ថា ការទុកដាក់សំរាមរបស់អ្នកជំងឺកូវីដ-១៩ កម្រិតស្រាលដែលសម្រាកព្យាបាលថែទាំនៅតាមផ្ទះឲ្យបានល្អត្រូវទុកដាក់សំរាមនៅក្នុងស្បោងឲ្យបានត្រឹមត្រូវ និងដាច់ ដោយឡែកពីសំរាមរបស់អ្នកផ្សេងទៀត និងត្រូវធ្វើការបាញ់ថ្នាំ ឬអាល់កុលដើម្បីសម្លាប់មេរោគកូវីដ-១៩ នៅលើសំរាមទាំងក្នុង និងខាងក្រៅស្បោងហើយទុកដាក់សំរាមដាច់ដោយឡែកឲ្យបានលើសពី៧២ម៉ោង ទើបអាចចេញមកបរិយាកាសខាងក្រៅបាន។
លោកបន្តថា អ្នកជំងឺកូវីដ-១៩ ត្រូវប្រើប្រាស់ស្បោងសំរាម ដែលមានចំណុះ១៥គីឡូក្រាម ដើម្បីផ្ទុកបរិមាណសំរាមឲ្យបានរយៈពេល៥ថ្ងៃយ៉ាងតិចចៀសវាងបញ្ចេញសំរាមរាល់ថ្ងៃនិងទុកដាក់សំរាមនៅក្នុងស្បោងត្រូវសរសេរស្លាកសញ្ញាបញ្ជាក់លើស្បោងដើម្បីងាយស្រួលដល់ប្រតិបត្តិករប្រមូលសំរាមក្នុងការប្រមូលកាកសំណល់នោះ។ លោកបានបញ្ជាក់ថា «ការទុកដាក់សំរាម អ្នកមានវិជ្ជមានកូវីដ-១៩ ការសិក្សាស្រាវជ្រាវបច្ចេកទេសសំរាមចេញពីការប្រើប្រាស់អ្នកផ្ទុកកូវីដនេះ លើស៧២ម៉ោងហើយអាចមានសុវត្ថិភាពហើយ។ ប៉ុន្តែទោះយ៉ាងណាក៏ដោយ គួរយើងត្រូវតែប្រយ័ត្ន ក្នុងការវេចខ្ចប់ដាក់ថង់ប្លាស្ទិក ឲ្យបានជិតល្អហើយសរសេរស្លាកឲ្យច្បាស់ ដើម្បីឲ្យអ្នកដឹកជញ្ជូនមានសុវត្ថិភាពបន្តទៀត។
ប៉ុន្តែយើងឲ្យគាត់ញែកសំរាមចេញពីក្រុមគ្រួសាររបស់គាត់ និងទីតាំងបន្ទប់គាត់ត្រូវមានធុងសំរាម ត្រូវមានថង់សំរាមយ៉ាងតិច២ថង់ ១ប្រើឲ្យបានរយៈពេលឲ្យបាន៣ថ្ងៃ។ ញែកថង់ឲ្យបានច្បាស់ហើយកត់ថ្ងៃខែឲ្យលើសបាន៣ថ្ងៃដើម្បីឲ្យភ្នាក់ងារយកសំរាម ឬក្រុមគ្រួសារយើងប៉ះថង់បាន យើងបញ្ចេញមកក្រៅបានសំរាមនេះលែងមានឆ្លងរោគហើយ ការសិក្សានេះមិនមែនតែកម្ពុជានោះទេ គឺការណែនាំរបស់អង្គការសុខភាពពិភពលោក »។ សូមបញ្ជាក់ថា ក្នុងករណីប្រជាពលរដ្ឋណាមិនបានសហការ និងមិនអនុវត្តតាមការណែនាំបង្កឲ្យមានការឆ្លងជំងឺកូវីដ-១៩ ដល់អ្នកដទៃនោះ បុគ្គលអ្នកប្រព្រឹត្តនោះ នឹងទទួលខុសត្រូវតាមមាត្រា០៩នៃច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវចុះថ្ងៃទី១១ ខែមីនា ឆ្នាំ ២០២១ ដោយបានចែងថា អំពើចម្លង ដោយចេតនានូវជំងឺកូវីដ-១៩ដល់អ្នកដទៃ ត្រូវផ្តន្ទាទោសដាក់ពន្ធនាគារពី៥ឆ្នាំទៅ១០ឆ្នាំ៕ ដោយ ៖ ចន ណារិទ្ធ
ចែករំលែកព័តមាននេះ