របាយការណ៍ក្រៅផ្លូវការនានានិយាយថា កងទ័ពរដ្ឋាភិបាលលីប៊ីដឹកនាំដោយលោកមូអាម៉ា កាដាហ្វី និងពួកឧទ្ទាមបានបន្តប្រយុទ្ធគ្នាយ៉ាងសាហាវកាលពីថ្ងៃទី២៦ មីនា កន្លងមក នៅតំបន់កាន់កាប់របស់កងយោធាសំខាន់ៗនៅពេលដែលយន្តហោះចម្បាំងរបស់ក្រុមប្រទេសសម្ព័ន្ធមិត្តហោះសំកាំងពីលើក្រុង Misrata ។ នៅក្នុងទីក្រុង Misrata ជាក្រុងធំបំផុតនៅភាគខាងលិចលីប៊ី កាន់កាប់ដោយពួកឧទ្ទាមកងទ័ពដែលមានភក្តីភាពចំពោះលោកកាដាហ្វី បានបើកការវាយប្រហារថ្មីទៀតក្នុងការបន្តកិច្ចខិតខំប្រឹងប្រែងរបស់ពួកគេដណ្តើមកាន់កាប់ទីក្រុងនេះវិញ ។
ជាមួយគ្នានេះកងកម្លាំងប្រដាប់អាវុធបារាំងនិយាយថា យន្តហោះចម្បាំងរបស់បារាំងបានបាញ់កម្ទេចយន្តហោះចម្បាំង៥គ្រឿង និងឧទ្ធម្ភាគចក្រ២គ្រឿងរបស់កងទ័ពលោកកាដាហ្វី នៅខាងក្រៅទីក្រុង Misrata កាលពីថ្ងៃទី២៦ មីនា កន្លងមក ។ ចំណែកក្រសួងការពារប្រទេសអង់គ្លេសនិយាយថា យន្តហោះចម្បាំងរបស់ខ្លួនបានបំផ្លាញរថពាសដែករបស់លីប៊ី៥គ្រឿងនៅក្នុងការវាយឆ្មក់តាមអាកាសប្រឆាំងកងទ័ពរបស់លោកកាដាហ្វី នៅក្នុងទីក្រុង Ajdabiya និងទីក្រុង Misrata កាលពីថ្ងៃទី២៦ មីនា កន្លងមក ។ នៅទីក្រុងកំពង់ផែ Brega ភាគខាងកើតលីប៊ី ពួកឧទ្ទាមអះអាងថា ពួកគេវាយយកឈ្នះលើកងទ័ពរបស់លោកកាដាហ្វី ហើយកាន់កាប់ទីក្រុងនេះទាំងស្រុង ។ អ្នកនាំពាក្យពួកឧទ្ទាមត្រូវបានដកស្រង់សម្តីដែលនិយាយកាលពីថ្ងៃទី២៦ មីនា ថា ទីក្រុង Brega ស្ថិតក្នុងកណ្តាប់ដៃរបស់ឧទ្ទាមទាំងស្រុង ។
ទូរទស្សន៍ Al-Arabiya រាយការណ៍ថា ក្នុងការប្រយុទ្ធគ្នារវាងកងទ័ពរបស់លោកកាដាហ្វី និងពួកឧទ្ទាមនៅក្នុងទីក្រុង Ajdabiya បណ្តាលឱ្យស្លាប់មនុស្ស៨០នាក់ និងច្រើននាក់ទៀតរងរបួស ។ ក្នុងការប្រយុទ្ធគ្នានោះពួកឧទ្ទាមដណ្តើមកាន់កាប់បានទីក្រុង Ajdabiya ដែលកាន់កាប់ដោយកងទ័ពរបស់លោកកាដាហ្វី កាលពី២សប្តាហ៍មុន ៕
ចែករំលែកព័តមាននេះ