ខេត្តកំពត ៖ បុណ្យសមុទ្រដែលប្រារព្ធធ្វើឡើងនៅក្នុងខេត្តកំពតចាប់ពីថ្ងៃទី១១ ដល់ថ្ងៃទី១៣ បានទាក់ទាញទេសចរជាតិ និងអន្តរជាតិឱ្យមកកម្សាន្តប្រមាណជិត៤០ម៉ឺននាក់។
ខេត្តកំពត ៖ បុណ្យសមុទ្រដែលប្រារព្ធធ្វើឡើងនៅក្នុងខេត្តកំពតចាប់ពីថ្ងៃទី១១ ដល់ថ្ងៃទី១៣ បានទាក់ទាញទេសចរជាតិ និងអន្តរជាតិឱ្យមកកម្សាន្តប្រមាណជិត៤០ម៉ឺននាក់។
ក្នុងអំឡុងពេលប្រារព្ធពិធីបុណ្យសមុទ្រដែលប្រារព្ធធ្វើឡើងនេះ មានការប្រគំតន្ត្រី ប្រកួតកីឡា និងស្តង់តាំងផលិតផលទាំងក្នុងស្រុក និងក្រៅស្រុករួមមាន ផលិតផលកសិកម្ម សិប្បកម្ម វត្ថុអនុស្សាវរីយ៍ ម្ហូបអាហារកែច្នៃ ឬគ្រឿងឧបភោគ បរិភោគផ្សេងៗ ទំនិញសម្រាប់ប្រើប្រាស់ប្រចាំថ្ងៃ និងទំនិញ សម្រាប់គ្រួសារ ផលិតផលសម្រាប់លម្អក្នុងគេហដ្ឋាន ផលិតផលឱសថ និងគ្រឿងសំអាង ផលិតផលធ្វើអំពីប្លាស្ទិក សមា្ភរសិក្សា និងទំនិញផ្សេងៗជាដើម សរុបចំនួន៣០០ស្តង់ ។
នៅក្នុងឱកាសប្រារព្ធពិធីបុណ្យសមុទ្រនេះ សង្កេតឃើញថា មានប្រជាពលរដ្ឋជាច្រើនបាននាំក្រុមគ្រួសារមកកម្សាន្ត ។ នៅក្នុងដំណើរកម្សាន្តមកកាន់បុណ្យសមុទ្រ ប្រជាពលរដ្ឋបានលើកឡើងថា ពួកគាត់មានចិត្តសប្បាយរីករាយខ្លាំងណាស់ ដែលរាជរដ្ឋាភិបាលកម្ពុជា បានរៀបចំឱ្យមានការប្រារព្ធពិធីបុណ្យសមុទ្រ ព្រោះវាបានផ្តល់ឱកាសឱ្យប្រជាពលរដ្ឋបានជួបជុំគ្នា និងមកកម្សាន្តជាលក្ខណៈគ្រួសារ។
លោកខូយ ឃុនហ៊ួ អភិបាលនៃគណៈអភិបាលខេត្តកំពតបានមានប្រសាសន៍ឱ្យដឹងដែរថា ពិធីបុណ្យសមុទ្រដែលយើងជួបជុំគ្នាប្រារព្ធពិធីនាឱកាសនេះ ជាបុណ្យសមុទ្រលើកទី៤ សម្រាប់ព្រះរាជាណាចក្រកម្ពុជា ហើយអាចនិយាយបានថា ជាបុណ្យទី១ លើកទី១ សម្រាប់ប្រវត្តិសាស្ត្រខេត្តកំពត បន្ទាប់ពីកម្ពុជាបានចូលជាសមាជិកក្លឹបឆ្នេរសមុទ្រដែលស្អាតបំផុតលើសាកលលោក។
គួរបញ្ជាក់ផងដែរថា ការប្រារព្ធពិធីបុណ្យសមុទ្រលើកទី១ ជាប្រវត្តិសាស្ត្រ គឺបានរៀបចំឡើងនៅខេត្តព្រះសីហនុកាលពីឆ្នាំ២០១១ លើកទី២ នៅខេត្តកែប កាលពីឆ្នាំ២០១៣ និងលើកទី៣ នៅខេត្តកោះកុង កាលពីឆ្នាំ២០១៤៕
ចែករំលែកព័តមាននេះ