រាជធានីភ្នំពេញ ៖ ទីបំផុតការតាមប្រមាញ់បន្ទប់ទឹកមន្ដដែលបង្អួតរូបនារីស្រាតងូតទឹកតាមអេក្រង់ទូរស័ព្ទ ដែលបង្កឱ្យមានការចាប់អារម្មណ៍តាំងពីពាក់កណ្ដាលខែមិថុនា មកត្រូវសមត្ថកិច្ចបំបែកសំណុំរឿងនេះបានហើយ នៅព្រឹកថ្ងៃទី២៦ មិថុនា គឺសង្ឃកំហូចម្នាក់ គង់នៅក្នុងវត្ដស្រះចក ខណ្ឌដូនពេញ ជាអ្នកលួចថតយ៉ាងអគតិបំផុត ។ ការពិតទៅសមត្ថកិច្ចខណ្ឌដូនពេញ មានដីកាឆែកឆេរក្នុងដៃរួចទៅហើយកាលពីរសៀលថ្ងៃទី ២៥ មិថុនា ដែលបានសង្ស័យទីតាំងចំនួន២ ប៉ុន្ដែពិតជាមិនខុសនោះទេថា ពេលណាដែលមានកិច្ចសហការពីនារីរងគ្រោះបញ្ហា នេះច្បាស់ជាវែកមុខជនកំហូចឃើញមិនខាន ។រឿងរ៉ាវសង្ឃកំហូចលួចថតរូបនារីស្រាតក្នុងបន្ទប់សំរាប់ងូតទឹកមន្ដ បានធ្វើឱ្យ មានការភ្ញាក់ផ្អើលជាទូទៅមួយនៅរាជធានីភ្នំពេញ ព្រោះតែវាបានបង្ហាញឱ្យឃើញថា អ្នកដែលប្រព្រឹត្ដអំពើអសីលធម៌បំផុត នេះគឺជាសង្ឃដែលពុទ្ធបរិស័ទចាត់ទុកជា ស្រែបុណ្យរត់ទៅពឹងពាក់ឱ្យជួយរំដោះ គ្រោះចង្រៃផ្សេងៗ បែរជាជួបគ្រោះធ្ងន់ធ្ងរ ប៉ះពាល់ដល់កិត្ដិយស និងសេចក្ដីថ្លៃថ្នូររបស់ នារីភេទឱ្យជួបនូវភាពអៀនខ្មាសរកទីបំផុតគ្មានទៅវិញ ។
ជាមួយនឹងការចាប់ខ្លួន សមត្ថកិច្ចរកឃើញរូបថតស្ដ្រីអាក្រាតជាវីដេអូឃ្លីបជាង៣០០រូប ក្នុងអង្គចងចាំមេម៉ូរី (Memory) របស់សង្ឃនាម នេត ខៃ គង់នៅកុដិលេខ១ វត្ដស្រះចក សង្កាត់ស្រះចក ខណ្ឌដូនពេញ បន្ទាប់ពីការតាមប្រមាញ់ ហើយបានឆែកឆេរ រកឃើញកាលពីព្រឹកថ្ងៃទី២៦ មិថុនា កន្លងមកនេះ ។មន្ដ្រីប៉ូលិសខណ្ឌដូនពេញបានឱ្យដឹងថា នៅព្រឹកថ្ងៃទី២៣ មិថុនា ឆ្នាំ២០១០ ក្រុមគ្រួសារស្ដ្រីរងគ្រោះម្នាក់មានទីលំនៅក្នុងសង្កាត់វត្ដភ្នំ ខណ្ឌដូនពេញ បានកាន់សារព័ត៌មានកោះសន្ដិភាពដែលចុះផ្សាយកាលពីថ្ងៃទី១៨ មិថុនា សុំឱ្យអ្នករងគ្រោះមកដាក់ពាក្យបណ្ដឹងដើម្បីឱ្យសមត្ថកិច្ចស្រាវជ្រាវវែកមុខជនកំហូចដែលមានចេតនាបំផ្លាញកិត្ដិយស និងសេចក្ដីថ្លៃថ្នូររបស់នារី ។ ការចុះផ្សាយរបស់សារព័ត៌មានកោះសន្ដិភាពនោះ ទាក់ទិនទៅនឹងនារីរូបស្អាតសាច់ស.ខ្ចីម្នាក់ងូតទឹកស្រាត ដែលរូបវីដេអូឃ្លីបនោះមានរយៈពេល៤នាទី ហើយជាការងូតទឹកមន្ដក្នុងបន្ទប់ដែល មានការសូត្រធម៌ ឬបាលីខ្សឹបៗផង។ ក្រោយពីនោះមក ក៏មានការបង្ហាញរូបនារីស្រាតដោះអាវ៣នាទីម្នាក់ទៀត ដែលតាមការពិនិត្យគឺនៅក្នុងបន្ទប់ទឹកតែមួយ ។
យោងតាមពាកបណ្ដឹងរបស់ស្ដ្រីរងគ្រោះ ប៉ូលិសជំនាញខណ្ឌដូនពេញ សហការជាមួយអាជ្ញាធរខណ្ឌដូនពេញ និងនគរបាលប៉ុស្ដិ៍រដ្ឋបាលវត្ដភ្នំ បានកំណត់មុខសញ្ញា និងទីតាំង គឺកុដិលេខ១ ស្ថិតក្នុងវត្ដស្រះចក សង្កាត់ស្រះចក ខណ្ឌដូនពេញ បន្ទាប់ពីស្រាវជ្រាវ។ នៅព្រឹកថ្ងៃទី២៦ មិថុនា ឆ្នាំ២០១០ គណៈកម្មការចំរុះដឹកនាំដោយលោកសុខ សម្បត្ដិ អភិបាលខណ្ឌដូនពេញ និងព្រះរាជអាជ្ញាអមសាលាដំបូងរាជធានីភ្នំពេញ សំរេចឃាត់ខ្លួនសង្ឃនាមនេត ខៃ អាយុ៣៧ឆ្នាំ គង់នៅកុដិលេខ១ និងធ្វើការឆែកឆេររកឃើញវត្ថុតាង ព្រមទាំងរកឃើញកាស្សែតវីដេអូអាសអាភាសចំនួន៥០ដុំ, វីស៊ីឌី៨២ដុំ, មេម៉ូរី (Memory) ចំនួន២, ទូរស័ព្ទដៃចំនួន៤ គ្រឿង, ម៉ាស៊ីនកាត់.តឌីវីឌី១គ្រឿង, ម៉ាស៊ីន ថត២គ្រឿង, ក្បាលវីដេអូ១គ្រឿង, កំប៉ុងជើងធូបបង្កប់កាមេរ៉ា១, កុំព្យូទ័រ១កំប្លេ, រថយន្ដឡិចស៊ីស RX៣០០ ពណ៌ស្ករមួយគ្រឿង ពាក់ស្លាកលេខភ្នំពេញ ២M-៦៣៩០, លុយអាមេរិកចំនួន៥.១៣៤ដុល្លារ, លុយខ្មែរ ៦៧ម៉ឺនរៀល និងលិខិតឆ្លងដែនមួយក្បាល ។
ខណៈពេលដែលឃាត់ខ្លួនសង្ឃនេត ខៃ សមត្ថកិច្ចបានឆែកឆេររករូបថតស្ដ្រីខ្មែរ អាក្រាតជាច្រើនរូប និងឆែកឆេរក្នុងមេម៉ូរី (Memory) ក៏ឃើញមានរូបថតស្ដ្រីអាក្រាត ជាវីដេអូឃ្លីបជាង៣០០រូប ដូច្នេះនារីជាង៣០០នាក់ ដែលត្រូវរងគ្រោះដោយសារសង្ឃ នេត ខៃ លួចថតក្នុងបន្ទប់ទឹក ។នៅអធិការដ្ឋាននគរបាលខណ្ឌដូនពេញ ក្រោយពីឃាត់ខ្លួន សង្ឃនេត ខៃ បានសារភាពថា កន្លងមកខ្លួនបានលួចដាក់ទូរស័ព្ទដៃក្នុងបន្ទប់ទឹកសំរាប់ស្រោចទឹកមន្ដ ដោយបង្កប់ក្នុងកំប៉ុងជើងធូបដែលដាក់នៅលើធ្នឹម ហើយថតបានប្រហែលជា៣០លើកប៉ុណ្ណោះ។ក្នុងការលួចថតស្ដ្រីខ្មែរអាក្រាតនេះដែរសង្ឃ នេត ខៃ បញ្ជាក់ថា គឺធ្វើតែអង្គឯង ពុំមានបក្សពួកទេ ដោយដាក់ទូរស័ព្ទបង្កប់ទុកក្នុង បន្ទប់ទឹក ហើយពេលជូនស្ដ្រីរងគ្រោះទៅស្រោចទឹកក្នុងបន្ទប់ គឺខ្លួនចុចវីដេអូចោល ហើយមិនមែនប្រើម៉ាស៊ីនថតវីដេអូទេ។ ការលួចថតរូបភាពអក្រាតក្នុងបន្ទប់ទឹកនេះ គឺប្រហែលជាដើមឆ្នាំ២០០៨ ហើយភាគច្រើនជាស្ដ្រីខ្មែរ ។ តាមការសារភាពថា ការថតនេះគ្រាន់តែទុកមើលមិនបានយកលក់ឡើយ។ ចំពោះរូបភាពស្ដ្រីអាក្រាតដែលបែកធ្លាយ គឺតាមរយៈការបាញ់ប្ល៊ូធូតាមទូស័ព្ទដៃពីមួយទៅមួយរហូតដល់មានការភ្ញាក់ផ្អើលពេញរាជធានីភ្នំពេញ ។ តាមសង្ឃនេះថា មិនដឹងធ្លាយចេញតាមណាទេ ។
លោកសុខ សម្បត្ដិ អភិបាលខណ្ឌដូនពេញ មានប្រសាសន៍ថា នៅព្រឹកថ្ងៃទី២៦ មិថុនា សង្ឃនេត ខៃ ត្រូវបានព្រះឃោសាវិ សុទ្ធិ ស យ៉ុង អនុគណខណ្ឌដូនពេញ និងព្រះ គ្រូយក់ កុយ ព្រះធម្មធរអនុគណខណ្ឌដូនពេញ ផ្សឹក ដើម្បីប្រគល់ឱ្យប៉ូលិសចាត់ការតាមផ្លូវច្បាប់ ។ប៉ូលិសខណ្ឌដូនពេញបញ្ជាក់ថា យោងតាមការស្រាវជ្រាវ និងពិនិត្យបន្ទប់ទឹកស្រោចទឹកមន្ដរបស់សង្ឃនេត ខៃ ឃើញមានស្នាម ទើបតែបិទស៊ីម៉ង់ត៍តាមប្រហោងឥដ្ឋ ហើយលាបស្ប៉េត្រូ គឺពួកគេមិនប្រើទូរស័ព្ទ នោះទេ គឺប្រើកាមេរ៉ាថតដោយមានជំនាញ ព្រោះតាមរយៈវីដេអូឃ្លីបបានបង្ហាញថា ថតពីចុងជើងរហូតដល់ក្បាល និងមានពន្លឺភ្លឺច្បាស់ល្អណាស់ រហូតទាញមកជិតទៀតផង។ ចំណែកចំលើយសារភាពរបស់សង្ឃ នេះមិនប្រាប់សមត្ថកិច្ចអស់ទេ ជាក់ស្ដែងពេលដែលប៉ូលិសឆែកឆេរទូរស័ព្ទរបស់គេ ឃើញរូបភាពស្ដ្រីអាក្រាតបែរជាប្រកែក ដោយចោទថា មានគេបាញ់ប្ល៊ូធូចូល ។ រហូតទាល់តែសមត្ថកិច្ចជំនាញរកឃើញរូបថតស្ដ្រីអាក្រាតថតវីដេអូឃ្លីបភាគច្រើនជាស្ដ្រីខ្មែរ ទើបសង្ឃនេត ខៃ ស្ងាត់មាត់ដូចគេចុកយល់ព្រមទទួលកំហុស ដោយពោលថា “ធ្វើអាក្រក់បានអាក្រក់ នេះជាកម្មពៀរដែលខ្លួន សាងឡើងមិនចាំបាច់ជាតិក្រោយទេ គឺជាតិ នេះតែម្ដង ដែលជួបប្រទះបញ្ហាដែលកើត ឡើងនេះគួរឱ្យសោកស្ដាយក្រៃលែង” ។
សង្ឃនេះឱ្យដឹងថា រូបភាពស្ដ្រីខ្មែរម្នាក់ ដែលយកចេកខ្ចីរុកចូលប្រដាប់ភេទនេះ គឺជាស្ដ្រីមេម៉ាយម្នាក់ចង់មានប្ដីបានមករកខ្លួន ហើយដោយមានគំនិតចង់លួចថតក៏បង្គាប់ឱ្យធ្វើបែបនេះទៅ ព្រោះធ្លាប់លួចមើលវីដេអូសិចដែលស្ដ្រីខ្លះសេពកាមដោយខ្លួនឯង យកវត្ថុផ្សេងៗជាតំណាងកេរ្ដិ៍ភេទបុរសមកសំរេចតណ្ហារបស់ខ្លួន ធាតុពិតពុំមែនជាមន្ដអាគមអ្វីឡើយ ។ព្រះចៅអធិការវត្ដស្រះចកព្រះនាមមាស គង់ ដែលត្រូវជាបងប្អូនជីដូនមួយនឹងសង្ឃ នេត ខៃ មានថេរដីកាថា សង្ឃនេត ខៃ បានមកគង់នៅវត្ដស្រះចករយៈពេល៩ វស្សា កាលដើមឡើយបួសជាសង្ឃនៅវត្ដ ទួលអង្គញ់ ខេត្ដកំពង់ចាម បាន៦វស្សា នៅវត្ដបឹងកុក៣ខែ ។ កន្លងមកក្នុងវត្ដស្រះចកនេះមានសង្ឃមួយអង្គខុសវិន័យ ចាប់ផ្សឹកបណ្ដេញចេញពីវត្ដផងដែរ ។ រឿងដែលកើតឡើងពេលនេះវាជាការសោកស្ដាយ ហើយចាប់ពីថ្ងៃនេះតទៅព្រះអង្គ នឹងធ្វើការណែនាំដល់សង្ឃទាំងអស់ដែល គង់នៅវត្ដត្រូវតែគោរពវិន័យច្បាស់លាស់ ទើបឱ្យគង់នៅ ។គេសង្កេតឃើញថា នៅព្រឹកថ្ងៃទី២៧ ខែ មិថុនា ឆ្នាំ២០១០ បន្ទាប់ពីសមត្ថកិច្ចចាប់ សង្ឃកំហូចរួចមក គេឃើញប្រជាពលរដ្ឋ ប្រុសស្រីជាច្រើននាក់បន្ដមករកសង្ឃស្រោចទឹករំដោះគ្រោះដដែល ហើយបច្ចុន្បន្នទីតាំង សង្ឃស្រោចទឹកក្នុងវត្ដស្រះចកមាន៦ កន្លែង។
ទាក់ទិននឹងការតាមប្រមាញ់សង្ឃកំហូច នេត ខៃ នេះដែរក្រុមគ្រួសារស្ដ្រីរងគ្រោះ ដែលមានទីលំនៅក្នុងខណ្ឌដូនពេញ បានថ្លែងអំណរគុណដល់សារព័ត៌មានកោះសន្ដិភាព ដែលបានចុះផ្សាយអំពាវនាវដល់អ្នករងគ្រោះ ឱ្យបង្ហាញខ្លួនដល់សមត្ថកិច្ច ដោយមិនបានដាក់រូបថតដែលចុះផ្សាយកាលពីថ្ងៃទី១៨ មិថុនា ២០១០ ។ បន្ទាប់មកក្រុមគ្រួសារស្ដ្រីរងគ្រោះសំរេចចិត្ដមកដាក់ពាក្យបណ្ដឹងនៅ នគរបាលប៉ុស្ដិ៍រដ្ឋបាលវត្ដភ្នំ ទើបឈានទៅវែកមុខចាប់សង្ឃកំហូចបាន ។ ស្ដ្រីរងគ្រោះក៏បានថ្លែងអំណរគុណផងដែរដល់គណៈកម្មការចំរុះខណ្ឌដូនពេញ ដែលខិតខំស្រាវជ្រាវ នេះបើតាមការអះអាងរបស់មន្ដ្រីនគរបាលប៉ុស្ដិ៍រដ្ឋបាលវត្ដភ្នំ ។ប៉ូលិសបានអំពាវនាវតាមរយៈសារព័ត៌ មាន សុំឱ្យស្ដ្រីរងគ្រោះទាំងអស់ចូលខ្លួនមក ដាក់ពាក្យបណ្ដឹងដល់សមត្ថកិច្ច ដើម្បីដាក់បន្ទុកដល់ជនកំហូចបំផ្លិចបំផ្លាញកិត្ដិយសនារីខ្មែរ ព្រោះពេលនេះរកឃើញរូបភាពអាក្រាត ស្ដ្រីខ្មែរថតវីដេអូឃ្លីបជាង៣០០រូបវាស្មើជនរងគ្រោះជាង៣០០នាក់ដែរ ។បន្ទាប់ពីមានការផ្សឹករួចរាល់ពីចៅអធិការ ជនរូបនេះត្រូវប៉ូលិសកសាងសំណុំរឿង បញ្ជូនទៅសាលាដំបូងរាជធានីភ្នំពេញ នៅព្រឹកថ្ងៃចន្ទនេះ ចោទពីបទ “ថត និងផ្សព្វផ្សាយរូបភាពអាសអាភាស” ។
មតិខ្លះថា ករណីនេះស្ថាប័នជាន់ខ្ពស់ព្រះពុទ្ធសាសនាខ្មែរគួរមានវិធានការយ៉ាងណាដែរ ឬមួយក៏ទុកឱ្យសភាពការណ៍នេះវារឹត តែរីករាលដាលធំឡើងៗពីមួយថ្ងៃទៅមួយថ្ងៃ? ព្រះពុទ្ធសាសនាខ្មែរបានដើរទន្ទឹមគ្នាជា មួយនឹងគោលនយោបាយរបស់រាជរដ្ឋាភិបាលក្នុងការរួមចំណែកអភិវឌ្ឍសីលធម៌ សង្គមឱ្យមានរបៀបរៀបរយ ។ ព្រះពុទ្ធសាសនាបច្ចុប្បន្នបានក្លាយខ្លួនទៅជាសាច់ ជាឈាម ជាឆ្អឹង ជាសរសៃ ជាខួរក្បាល ជាបេះដូងរបស់ខ្មែរទៅហើយ ដូច្នេះសុំអ្នកបួស ក្នុងព្រះពុទ្ធសាសនាខ្លះដែលធ្វើមិនគប្បីគួរគិតពិចារណាឱ្យបានវែងឆ្ងាយដើម្បីជាកិត្ដិយសសាសនារបស់ជាតិមួយនេះ ។កត្ដាដែលនាំឱ្យមានការរីករាលដាលពីករណីមិនគប្បីដូចខាងលើសំរាប់សង្ឃខ្លះនា ពេលបច្ចុប្បន្ននេះ គឺដោយសារទី១-បច្ចេក វិទ្យាទំនើបព្រះសង្ឃមានទូរស័ព្ទល្អៗប្រើ និងមានកុំព្យូទ័រផ្ទាល់ខ្លួន ២-ប្រព័ន្ធនៃការគ្រប់ គ្រងសង្ឃអាចនៅមានភាពធូររលុង ។ ៣-ការអនុវត្ដច្បាប់ក្នុងសង្គមសង្ឃមិនឯកភាព គ្នាដោយវគ្គ, ៤-ការដោះស្រាយ និងការទប់ស្កាត់ករណីសង្ឃទំនើងខ្លះមិនទាន់ពេលវេលា ។ល។
ពុទ្ធសាសនិកជនខ្មែរតាំងពីបុរាណកាលមក ចាត់ទុកព្រះពុទ្ធសាសនាជាសាសនា នាំមកនូវសន្ដិភាពសំរាប់ប្រទេសរបស់ខ្លួន រាល់ក្បួនច្បាប់ គម្ពីរ ដីកាទាំងឡាយក៏កើត ចេញពីអ្នកប្រាជ្ញពុទ្ធសាសនាដែរ ឧទាហរណ៍ សម្ដេចព្រះសង្ឃរាជជួន ណាត ជាដើម។ មិនតែប៉ុណ្ណោះក៏មានបញវន្ដ និងមេដឹកនាំប្រទេសមួយចំនួនចេញមកពមជ្ឈដ្ឋានព្រះពុទ្ធសាសនាដែរ ។ដូច្នេះការរីកចំរើន និងការដើរទៅកាន់ មរណៈនៃពុទ្ធវិន័យនេះ វាមានហេតុមាន បច្ច័យរបស់វាគ្រប់គ្រាន់ គឺវាមិនអាចកើតឡើងដោយឥតហេតុបច្ច័យនោះទេ ។ ពុទ្ធសាសនិកជន គឺយើងគ្រប់គ្នាមានសេចក្ដី ខ្មាសអៀនចំពោះបរទេសខ្លាំងណាស់ ដោយសារតែមានបុគ្គលសង្ឃខ្លះប្រព្រឹត្ដនូវអំពើ គួរឱ្យខ្ពើមរអើមរបៀបនេះ ៕
ចែករំលែកព័តមាននេះ