រាជធានីភ្នំពេញ ៖ កាលពីរសៀលថ្ងៃសៅរ៍ទី១២ ធ្នូ កីឡាករថៃដែលចាញ់ពិន្ទុកីឡាករកម្ពុជាមឿន សុខហ៊ុច ឬ ពុទ្ធ ហ៊ុច នៅលើសង្វៀនទូរទស្សន៍អាស៊ីអាគ្នេយ៍បានបង្ហាញសកម្មភាពប្រទាំងប្រទើសក្រោយពីត្រូវគណៈកម្មការប្រកាសឲ្យចាញ់ ។ គូនេះទំនងជាត្រូវឲ្យឡើងសងសឹកគ្នាវិញឆាប់ៗ ដើម្បីឲ្យថៃអស់ចិត្ត បន្ទាប់ពីបានទទួលលទ្ធផលមិនដូចខ្លួនចង់បាន ។
ការប្រកួតរវាងកីឡាករមឿន សុខហ៊ុច ឬពុទ្ធ ហ៊ុច មកពីក្លិបពុទ្ធសេរីវង្សកីឡា និងកីឡាករថៃ Phlay Noy ក្នុងប្រភេទទម្ងន់៦៧គីឡូក្រាមត្រូវគេកត់សម្គាល់ថាបានធ្វើឲ្យអ្នកទស្សនាដកកចំហមាត់ និងស្រែកហ៊ោកញ្ជ្រៀវយ៉ាងកងរំពងព្រោះតែសង្វាក់នៃការវាយលុកដាក់គ្នាខ្លាំងក្លា ។ ការប្រកួតកាលពីលើកទី១ កីឡាករថៃវាយស្មើពិន្ទុជាមួយកីឡាករកម្ពុជា ផាន់ គ្រាន់ មកពីក្លិបព្រះខ័នរាជ ។ លើកទី២ វាយឈ្នះពិន្ទុកីឡាករ កន ចន្ថា មកពីក្លិបក្រសួងការពារជាតិ។ លើកទី៣ ផ្ដួលកីឡាករ ផាន់ គ្រាន់ ត្រឹមទឹកទី២ក្នុងជំនួបសងសឹក និងលើកទី៤ វាយឈ្នះកីឡាករជើងខ្លាំងឈិន ក្វាន់ ង៉ុយ មកពីក្លិបមកុដរាជសីហ៍ ។ អញ្ចឹងហើយ ទើបការប្រកួតលើកទី៥កាលពីម្សិលម៉្ងៃ កីឡាករPhlay Noy បានបង្ហាញអារម្មណ៍ប្រទាំងប្រទើសក្រោយពីលទ្ធផលត្រូវគេឲ្យចាញ់ ដោយអះអាងថាបានវាយបោកកីឡាករមឿន សុខហ៊ុច និងវាយទប់មិនឲ្យកីឡាករកម្ពុជា វាយលុកបានដោយស្រួល ។
ក្រៅពីអង្គុយលុតជង្គង់មិនទទួលយកលទ្ធផល កីឡាកររូបនេះថែមទាំងចុះពីលើរេញមកឆ្ការដៃឆ្ការជើងថាខ្លួនមិនសមនឹងចាញ់នោះផង ។ សកម្មភាពប្រទាំងប្រទើសត្រូវគេមើលឃើញថាមិនត្រូវនឹងបរិបទនៃការប្រកួតជាក់ស្ដែងនោះទេ ដោយសារកីឡាករថៃដ្បិតថា មានឱកាសវាយបោកមឿន សុខហ៊ុច ភាគច្រើន ប៉ុន្តែកីឡាករកម្ពុជា នៅតែជាអ្នកគ្រប់គ្រងឱកាសវាយត្រូវគោលដៅច្រើនជាង ។
គណៈកម្មការផ្ដល់ពិន្ទុភាគច្រើនបានរិះគន់ចំពោះប្រតិកម្មរបស់កីឡាករថៃ ដោយបានបញ្ជាក់ថា បានតែបោកទៅលើគូប្រកួត ប៉ុន្តែបើរឿងវាយល្អគឺកីឡាករកម្ពុជាល្អជាង ។ លោកថៃ អ៊ូ ជាអ្នកដឹកនាំកីឡាករថៃឲ្យមកប្រកួតបានទទួលយកការលើកឡើងនោះ ។ លោកនិយាយថា កីឡាករPhlay Noy ធ្លាប់តែមកប្រកួតហើយបានឈ្នះ ទើបគិតថាឱកាសគ្រាន់តែវាយបោកកីឡាករកម្ពុជាបានច្រើន គឺពិតជាឈ្នះមឿន សុខហ៊ុច ឬពុទ្ធ ហ៊ុច ។ លោកថា បញ្ហាបែបនេះមិនមែនជារឿងចម្លែកនោះទេ ដ្បិតកីឡាករម្នាក់ៗដែលចាញ់ការប្រកួត បើទោះមិនធ្វើកាយវិការច្រងេងច្រងាងដូចកីឡាករPhlay Noy ក៏រមែងរអ៊ូរទាំពេលចុះមកដល់ក្រោយសង្វៀននោះដែរ ។ លោកថា Phlay Noy យល់ថាខ្លួនឯងនឹងឈ្នះទើបបញ្ចេញកាយវិការមិនសមទំនងបែបនោះ ក្រោយពេលប្រកាសថាចាញ់ ។
យ៉ាងណាក៏ដោយផ្អែកតាមភាពជាក់ស្ដែងលោកថាមឿន សុខហ៊ុច សមនឹងឈ្នះច្រើនជាង ដោយសារតែគេក្រៅពីប្រឹងវាយដេញបាននាំមុខគូប្រកួត ក៏មានឱកាសវាយកែងត្រូវចំគោលដៅប្រទាញបានពិន្ទុផងដែរ ។
មួយគូអន្តរជាតិទៀត គឺសែន រ៉ាដេត មកពីក្លិបអប្សរាគុនខ្មែរ ប្រកួតជាមួយកីឡាករថៃPhun Savath ក្នុងប្រភេទទម្ងន់៥៧គីឡូក្រាម ក៏ទទួលបានការគាំទ្រខ្លាំងក្លាពីអ្នកទស្សនាដូចគ្នា។ គូនេះកីឡាករកម្ពុជាបានត្រឹមកំដរការប្រកួត ដោយសារត្រូវគេឲ្យចាញ់ពិន្ទុ ព្រោះតែកីឡាករថៃទាំងរស់រវើក ក៏ពោរពេញដោយបច្ចេកទេសខ្ពស់ ។ ទោះសែន រ៉ាដេត ប្រឹងប្រកួតអស់ពីសមត្ថភាពតាំងពីទឹកទី១ដល់ទឹកចុងក្រោយ ក៏នៅតែចាញ់ប្រៀបកីឡាករថៃ ។ ប៉ុន្តែក៏មានអ្នកកោតសរសើរចំពោះគេផងដែរ ដែលកីឡាករសែន រ៉ាដេត មិនឡាំប៉ាដូច Phlay Noy នោះ។ ប្រតិកម្មរបស់កីឡាករថៃធ្វើឲ្យអ្នកគាំទ្រមឿន សុខហ៊ុចមិនសប្បាយចិត្ត ប៉ុន្តែអ្នកដែលកាន់ជើងកីឡាករថៃមួយចំនួន បានយល់ស្របថានោះជាប្រតិកម្មសមហេតុផល ៕
ចែករំលែកព័តមាននេះ