រាជធានីភ្នំពេញ ៖ បុរសម្នាក់ដែលបានបើករថយន្ត បុកកម្មករប្រមូលសំរាម បណ្តាលឲ្យស្លា.ប់ ២នាក់ របួសធ្ងន់ម្នាក់ ត្រូវបានសមត្ថកិច្ចបញ្ជូនខ្លួន ទៅសាលាដំបូងរាជធានីភ្នំពេញហើយ នៅវេលាម៉ោង២រសៀល ថ្ងៃទី១២ ខែកក្កដា ឆ្នាំ២០២១នេះ ។
កម្លាំងការិយាល័យនគរបាលចរាចរណ៍ផ្លូវគោក បានកសាងសំណុំរឿង និងបញ្ជូនជនបង្កគ្រោះថ្នាក់ចរាចរណ៍ មានឈ្មោះ នេត នីសា ភេទប្រុស មុខរបរនៅផ្ទះ ស្នាក់នៅភូមិគោកឃ្លាង២ សង្កាត់ក្រាំងធ្នង់ ខណ្ឌសែនសុខ ទៅសាលាដំបូងរាជធានីភ្នំពេញ ដើម្បីអនុវត្តបន្តនីតិវិធីច្បាប់ ។
ការិយាល័យនគរបាលចរាចរណ៍ផ្លូវគោក បានបន្តនីតិវិធី និងមានចំណាត់ការលើករណីគ្រោះថ្នាក់ចរាចរណ៍មួយនេះ ដែលហេតុការណ៍បានកើតឡើងកាលពីវេលាម៉ោង០២និង៤០នាទី រំលងអាធ្រាតឈានចូល ថ្ងៃទី១២ ខែកក្កដា ឆ្នាំ២០២១ ត្រង់ចំណុចមុខធនាគារហត្ថា ដែលបណ្តាលឲ្យកម្មករប្រមូលសំរាមស្លា.ប់ចំនួន ០២នាក់ និងរបួសធ្ងន់ម្នាក់ ។
គួររម្លឹកឡើងវិញថា«លួចរថយន្តឪពុកដឹកមិត្ត ផឹកស៊ី លុះត្រឡប់មកវិញ ឆ្មក់យកជីវិតកម្មករប្រមូលសំរាម២នាក់»
បើតាមសេចក្តីរាយការណ៍ បានឲ្យដឹងថា បុរសម្នាក់បានលួចយករថយន្តរបស់ឪពុក រួចក៏ដឹកមិត្តភក្តិ ដើរលេងយប់ ផឹកស៊ីស្រវឹងជោកជាំ ស្រាប់តែរេចង្កូតទៅបុកកម្មករប្រមូលសំរាម ដែលកំពុងតែដើរប្រមូលសំរាមតាមដងផ្លូវ បណ្តាលឲ្យស្លា.ប់២នាក់ និងរងរបួសធ្ងន់ម្នាក់ ចំណែករថយន្តបង្កវិញ ព្យាយាមបើករត់ខ្លួន តែត្រូវបានប្រជាពលរដ្ឋដេញតាមឃាត់បានអ្នកបើកភ្លាមៗតែម្តង បង្កអោយមានការភ្ញាក់ផ្អើលនៅតាមបណ្តោយផ្លូវសហព័ន្ធរុស្សី មុខផ្សារពោធិ៍ចិនតុង ស្ថិតក្នុងភូមិប៉ប្រកខាងជើង សង្កាត់កាកាបទី១ ខណ្ឌពោធិ៍សែនជ័យ ។
ស.ពជនរងគ្រោះ មានទី១-ឈ្មោះ ប៉ែន ចន្ទ័ ភេទប្រុស អាយុ៤២ឆ្នាំ និងទី២- ឈ្មោះសាន់ ឆៃ ភេទប្រុស អាយុ៣១ឆ្នាំ ។ ចំណែកជនរងគ្រោះទី៣- ឈ្មោះ ដួង គង់ ភេទប្រុស អាយុ៤២ឆ្នាំ រងរបួសធ្ងន់ ។
តាមប្រភពព័ត៌មានពី កម្មករបើករថយន្តដឹកសំរាមម្នាក់ បានប្រាប់ថា នៅមុនពេលកើតហេតុ ក្រុមកម្មករកើបសំរាម របស់ក្រុមហ៊ុន MIZUDA មានគ្នា៤នាក់ ក្នុងនោះរូបគាត់ជាអ្នកបើកបររថយន្ត និងកម្មករអ្នកកើបសំរាម មានគ្នាចំនួន៣នាក់ទៀត ។ ខណៈពេលកំពុងតែឈប់រថយន្ត ហើយក្រុមកម្មករកើបសំរាម និងកំពុងដើររើសសំរាមតាមចិញ្ចើមផ្លូវនោះ ក៏ស្រាប់តែឃើញរថយន្តបង្កបើកបរយ៉ាងលឿន ក្នុងទិសដៅពីកើតទៅលិច លុះមកដល់ចំណុចកើតហេតុ ក៏បានរ៉េចង្កូត មកផ្នែកខាងស្តាំចិញ្ចើមផ្លូវ រួចក៏បុកជនរងគ្រោះទាំង៣នាក់ ប៉ើងពីកន្លែងកើតជាង១០ម៉ែត្រ បណ្តាលឲ្យបាក់ដៃ បាក់ជើង ស្លា.ប់ ចំនួន២នាក់ភ្លាមៗ នៅនឹងកន្លែងកើតហេតុ និងម្នាក់ទៀតរងរបួសធ្ងន់ ចំណែករថយន្តបង្កវិញ នៅមិនទាន់អស់ល្បឿននោះទេ ក៏បានបុកដើមក្ងោក នៅចិញ្ចើមផ្លូវរងការខូចខាតផងដែរ ធ្វើឲ្យរថយន្តបែកកង់មួយចំហៀងខាងស្ដាំមុខក្រោយ ។ រីឯរថយន្តបង្កមិនបានបុករថយន្តប្រមូលសំរាមទេ ។
ខណៈពេលភ្លាមៗនោះដែរ រថយន្តបង្កបានព្យាយាមបើករត់ចេញពីកន្លែងកើតហេតុ ជាង១០០ម៉ែត្របន្តទៀត ប៉ុន្តែត្រូវបានប្រជាពលរដ្ឋដេញតាមរថយន្តបង្ក រួចឃាត់អ្នកបើករថយន្តបង្កបានភ្លាមៗ ចំណែកអ្នករួមដំណើរ៦នាក់ទៀត ដែលស្រវឹងដូចគ្នា បាននាំគ្នារត់ចោលអ្នកបើករថយន្តបាត់អស់ទៅ ។ បន្ទាប់មក សមត្ថកិច្ចនគរបាលប៉ុស្តិ៍ ក៏បានមកដល់កន្លែងកើតហេតុ និងបានរាយការណ៍ទៅផ្នែកជំនាញចរាចរណ៍ខណ្ឌពោធិ៍សែនជ័យ ភ្លាមៗផងដែរ ប្រគល់ទៅផ្នែកជំនាញចរាចរណ៍រាជធានីភ្នំពេញ ដើម្បីធ្វើការវាស់វែង និងស្ទូចយករថយន្តបង្ក ព្រមទាំងអ្នកបើកបររថយន្ត នាំយកទៅផ្នែកជំនាញ ចំណែកស.ពជនរងគ្រោះទាំង២នាក់ សមត្ថកិច្ចបានធ្វើលិខិតប្រគល់អោយក្រុមគ្រួសារយកទៅធ្វើបុណ្យតាមប្រពៃណី នៅស្រុកកំណើតផងដែរ ៕
ចែករំលែកព័តមាននេះ