ខេត្តឧត្តរមានជ័យ៖ ជនសង្ស័យ ២នាក់ ត្រូវបានស្នងការដ្ឋាននគរបាល ខេត្តឧត្តរមានជ័យ បញ្ជូនខ្លួន ទៅតុលាការអមសាលាដំបូងខេត្ត ដោយជាប់ពាក់ព័ន្ធពីបទកាច់សោកម៉ូតូ កាលពីវេលាម៉ោងប្រមាណ ៥ល្ងាច ថ្ងៃទី៦ ខែកក្កដា ឆ្នាំ២០២១។ ហេតុការណ៍នេះ កើតឡើង នៅចំណុចក្បែរទីបញ្ជាការកងវិរៈសេនាតូចលេខ២៦២ ក្នុងកងពលតូច ថ្មើរជើងអន្តរាគមន៍លេខ៦ ស្ថិតក្នុងក្នុងភូមិអូររំដេង ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។
ជនសង្ស័យទាំង ២នាក់ ដែលប្រព្រឹត្តមុខរបរសង្គមស្អប់ខ្ពើម លួចកាច់សោម៉ូតូគេ ចំនួនមួយគ្រឿង ឈ្មោះ ឈុន ឆៃរ៉េ ភេទ ប្រុស អាយុ ២៨ឆ្នាំ រស់នៅភូមិស្រែក្រសាំង ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ និងម្នាក់ទៀត ឈ្មោះ អាង សម្បត្តិ ភេទប្រុស អាយុ ៤០ឆ្នាំ។ ជននេះ បានមកសម្ងំស្នាក់នៅក្នុងភូមិអូរត្រាំប៉ោង ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។
លោក ហួត សុធី ស្នងការដ្ឋាននគរបាលខេត្ត បានមានប្រសាសន៍ឱ្យដឹង នៅវេលាម៉ោង ១៧ និង៣០នាទី ល្ងាចថ្ងៃទី៦ ខែកក្កដា ឆ្នាំ២០២១ ដឹកនាំកម្លាំងជំនាញព្រហ្មទណ្ឌ ដោយលោក អ៊ូច ម៉ៅ អធិការនគរបាលស្រុកត្រពាំងប្រាសាទ បានចុះសហការជាមួយកម្លាំងយោធាវរសេនាតូចលេខ២៦២ ក្នុងកងពលតូចអន្តរាគមន៍លេខ៦ បង្ក្រាប និងឃាត់ខ្លួនជនសង្ស័យបានចំនួន ២នាក់ ដែលធ្វើសកម្មភាពលួចកាច់សោកយកម៉ូតូ ចំនួន ១គ្រឿង។
លោកស្នងការ បានមានប្រសាសន៍ថា ជនសង្ស័យខាងលើនេះ ត្រូវបានកម្លាំងការិយាល័យជំនាញ រៀបចំកសាងសំណុំរឿង បញ្ជូនទៅតុលាការអមសាលាដំបូងខេត្តឧត្តរមានជ័យ ចាត់ការបន្តតាមនីតិវិធីរួចរាល់ ខណៈនេះ ចៅក្រមស៊ើបសួរ សម្រេចចេញដីកាបង្គាប់ឱ្យឃុំខ្លួនបណ្ដោះអាសន្ន នៅពន្ធនាគារខេត្តឧត្តរមានជ័យ បទល្មើស ដែលមានចែងឱ្យផ្តន្ទាទោសតាមបទបញ្ញត្តិមាត្រា៣៥៣ និង ៣៥៦ នៃក្រមព្រហ្មទណ្ឌ។ ចំណែកវត្ថុតាងម៉ូតូ ប្រគល់ឱ្យជនរងគ្រោះ យកទៅប្រើប្រាស់៕ ឱម សារឿន
ចែករំលែកព័តមាននេះ