ខេត្តប៉ៃលិន៖ ក្រោយពីរដ្ឋបាលខេត្ត បានប្រកាសឱ្យប្រជាពលរដ្ឋទូទាំងខេត្តប៉ៃលិន នាំគ្នាទៅចាក់វ៉ាក់សាំងការពារជំងឺកូវីដ១៩ ដែលអនុវត្ត ចាប់ពីថ្ងៃទី៨ ខែកក្កដា ឆ្នាំ២០២១តទៅ ដោយមានរយ:ពេល ១៤ថ្ងៃរួចមក រហូតដល់ព្រឹកថ្ងៃទី១០ ខែកក្កដា ឆ្នាំ២០២១ លោកជំទាវ បាន ស្រីមុំ អភិបាលខេត្តប៉ៃលិន បានបន្តដឹកនាំមន្ត្រីមកពីមន្ទីរ ជុំវិញខេត្ត ពិនិត្យមើលដំណើរការនៃយុទ្ធនាការចាក់វ៉ាក់សាំងនេះ។ នេះជាការអនុវត្តផែនការជំហានយុទ្ធសាស្ត្រ ក្នុងការប្រយុទ្ធប្រឆាំងទប់ស្កាត់ការឆ្លងជំងឺកូវីដ-១៩ របស់រាជរដ្ឋាភិបាលកម្ពុជា ក្រោមការយកចិត្តទុកដាក់ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
នៅក្នុងឱកាសចុះជួបសំណេះសំណាលជាមួយប្រជាពលរដ្ឋ នៅតាមមណ្ឌលចាក់វ៉ាក់សាំងទូទាំងខេត្តប៉ៃលិន លោកជំទាវ បាន ស្រីមុំ អភិបាលខេត្តប៉ៃលិន បានក្រើនរំលឹកដល់ប្រជាពលរដ្ឋ ឱ្យអនុវត្តនូវវិធានការការពាររបស់ប្រមុខរាជរដ្ឋាភិបាល គឺ (៣ការពារ ៣កុំ) ទោះបីជាទទួលបានការចាក់វ៉ាក់សាំងរួចរាល់ហើយក៏ដោយ ព្រោះជំងឺកូវីដ១៩នេះ ពិតជាសាហាវណាស់ តែបើយើងបានទទួលវ៉ាក់សាំង គឺងាយស្រួលក្នុងការព្យាបាល។
លោកជំទាវអភិបាលខេត្ត បានបន្តថា « បើទោះពុកម៉ែបងប្អូន បានចាក់ថ្នាំវ៉ាក់សាំងដូសទី១ ឬបានចាក់ដូសទី២ រួចរាល់ហើយក៏ដោយ ក៏ត្រូវរក្សាវិធានការ ៣ការពារ ៣កុំរបស់ប្រមុខរាជរដ្ឋាភិបាល ឲ្យបានខ្ជាប់ខ្ជួន ទើបអាចរួចខ្លួនពីជំងឺកូវីដ១៩ ប្រភេទថ្មី ( COVID-19 Delta) ដែលមានប្រភពមកពីក្រៅប្រទេស។
លោកជំទាវអភិបាលខេត្ត ក៏បានណែនាំដល់ប្រជាពលរដ្ឋទាំងអស់ ត្រូវស្តាប់តាមការណែនាំរបស់គ្រូពេទ្យ ដោយក្រោយពេលចាក់វ៉ាក់សាំងរួច មិនត្រូវពិសាស្រា គ្រឿងសមុទ្រ កុំពិសាម្ទេសច្រើនពេក និងមិនត្រូវលើករបស់ធ្ងន់ៗ ជាដើម។
ចំណែកប្រជាពលរដ្ឋ ដែលមកទទួលការចាក់វ៉ាក់សាំង មានការត្រេកអរយ៉ាងខ្លាំង ហើយក៏សូមថ្លែងអំណរគុណដល់សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែងតែយកចិត្តទុកដាក់ចំពោះប្រជាពលរដ្ឋ គ្រប់ពេលវេលា គ្រប់កាលទេស: ហើយក៏សូម អរគុណដល់អភិបាលខេត្តប៉ៃលិន ដែលបានដឹកនាំមន្ត្រីក្រោមឱវាទដុតដៃដុតជើង ផ្តល់សេវានៃការចាក់ វ៉ាក់សាំងនេះ បានយ៉ាងល្អ និងទាន់ពេលវេលាផងដែរ។
សូមបញ្ជាក់ថា យុទ្ធនាការនៃការចាក់វ៉ាក់សាំង នៅទូទាំងខេត្តប៉ៃលិននេះ មានរយៈពេល ១៤ថ្ងៃ គឺចាប់ថ្ងៃទី៨ ខែកក្កដា ឆ្នាំ២០២១ ដោយពេលព្រឹកចាប់ពីម៉ោង ៨:០០ព្រឹក ដល់ម៉ោង១១:០០នាទី ព្រឹក ។ ពេលរសៀល ចាប់ពីម៉ោង២:០០ ដល់ម៉ោង ៥:០០នាទីល្ងាច និងនៅតាមទីតាំង ដូចខាងក្រោម៖ ទី១. ក្រុងប៉ៃលិន. នៅក្នុងមន្ទីរពេទ្យបង្អែកខេត្តប៉ៃលិនចំនួន០២កន្លែង មណ្ឌលសុខភាពក្រចាប់ ចំនួន ០១កន្លែង ទី២. ស្រុកសាលាក្រៅ គឺនៅមណ្ឌលសុខភាពផ្សារព្រំចំនួន០២កន្លែង នៅមណ្ឌលសុខភាពស្ពង់ ចំនួន ០១កន្លែង និងនៅមណ្ឌលសុខភាពភ្នំព្រាល ចំនួន ០១កន្លែង។ សូមកុំភ្លេចភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន ទើបក្រុមការងារ អាចចាក់ជូនបាន៕ នីយ៉ា
ចែករំលែកព័តមាននេះ