សាឡង់ដឹកខ្សាច់បើកបុ.កទូកអ្នកនេសាទដាច់ជា២កំណាត់លិចបាត់ក្នុងទន្លេ
- ភ្នំពេញ
រាជធានីភ្នំពេញ ៖ ទូកអ្នកនេសាទជនជាតិខ្មែរអ៊ីស្លាម១គ្រឿង ត្រូវបានសាឡងដឹកខ្សាច់មួយគ្រឿងបានបើកបុ.កដាច់ជាពីរ
រាជធានីភ្នំពេញ ៖ ទូកអ្នកនេសាទជនជាតិខ្មែរអ៊ីស្លាម១គ្រឿង ត្រូវបានសាឡងដឹកខ្សាច់មួយគ្រឿងបានបើកបុ.កដាច់ជាពីរកំណាត់ ហើយលិចបាត់នៅក្នុងទន្លេសាប ។ ទោះបីជាយ៉ាងណា ពុំបណ្តាលអោយមនុស្សរងគ្រោះថ្នាក់ដល់អាយុជីវីតឡើយ ប៉ុន្តែស្ត្រីជាប្រពន្ធ បានរងរបួសពកក្បាល ។ បន្ទាប់ពីបុកទូកលិចហើយ សាឡង់មួយគ្រឿងនោះ ក៍បានបើកទៅបាត់ដោយសន្យាថា ចាំដោះស្រាយសងការខូចខាតជាក្រោយ ។
ហេតុការណ៍ខាងលើនេះបានកើតឡើងកាលពីវេលាម៉ោងប្រមាណ១២និង៤០នាទីថ្ងៃត្រង់ទី១១ខែ កក្កដា ឆ្នាំ ២០២១ ភូមិទី១(ក្បាលជ្រោយចង្វារ) មុខព្រះបរមរាជវាំង ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
ទូកនេសាទដែលសាឡង់បុ.កលិចខាងលើនោះមានម្ចាស់ឈ្មោះ ស្មាន់ ខសិន ភេទប្រុស អាយុ៦០ឆ្នាំ ត្រូវជាប្តី និងប្រពន្ធឈ្មោះ លែប អាធីកាស អាយុ ៦០ឆ្នាំ ព្រមទាំងកូនឈ្មោះ សារ គីរីន ភេទប្រុស អាយុ២១ឆ្នាំ មានលំនៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
តាមម្ចាស់ទូករងគ្រោះបានអោយដឹងថា នៅមុនពេលកើតហេតុ គាត់និងក្រុមគ្រួសារមានគ្នា៣នាក់ជិះទូកនេសាទមួយគ្រឿងខាងលើមកពីលក់ត្រីនៅរាជធានីភ្នំពេញ ខណះនោះស្រាប់តែមានសាឡង់ដឹកខ្សាច់មួយគ្រឿងបានធ្វើដំណើរ ក្នុងទិសដៅពីត្បូងទៅជើង ក៍បានមកបុ.កទូករបស់ពួកគាត់យ៉ាងពេញទំហឹង បណ្តាលអោយលិចបាត់នៅក្នុងទន្លេតែម្តង។
តាមព័ត៌មានអោយដឹងទៀតថា ក្នុងហេតុការណ៍នោះ អ្នកនេសាទរូបនោះបានលោតចេញហែលទឹក គេចពីគ្រោះថ្នាក់ ហើយភ្លាមៗនោះ ត្រូវបានទូកនេសាទជនជាតិខ្មែរអ៊ិស្លាមដូចគ្នា ចេញទៅជួយស្រង់សង្គ្រោះ ។ បន្ទាប់ពីកើតហេតុ សាឡង់មួយគ្រឿងនោះក៍បានបើកទៅបាត់ដោយសន្យាថា ធានាសងការខូចខាត។
តាមព័ត៌មានអោយដឹងទៀត ភ្លាមៗ ម្ចាស់ទូកនេសាទក៍បានទាក់ទងទៅជនជាតិខ្មែរអ៊ិស្លាមដូចគ្នា ប្រមាណជិត១០ទូកបាននាំគ្នា មកមុជទឹករាវរកទូកនោះអស់ប្រមាណ១ម៉ោង ទើបរកឃើញតែមួយកំណាត់ និងម៉ាស៊ីនតែប៉ុណ្ណោះ ចំណែកមួយកំណាត់ទៀត និងសម្ភារះ រួមមានសំណាញ់ចំនួន២ និងលុយប្រមាណ៧ពាន់ដុល្លារបានលិចបាត់ក្នុងទន្លេមិនទាន់រកឃើញនៅឡើយ ៕
ចែករំលែកព័តមាននេះ