លោក វ៉ាត់ ចំរើន លើកឡើងផ្ទុយពីមហាជន ជុំវិញការលើកពេលស៊ីហ្គេម និងប៉ារ៉ាហ្គេមរបស់វៀតណាម
- ភ្នំពេញ
រាជធានីភ្នំពេញ ៖ ក្រោយការប្រកាសលើកពេលស៊ីហ្គេម និងប៉ារ៉ាហ្គេមរបស់វៀតណាម ពីចុងឆ្នាំនេះរហូតដល់ឆ្នាំ២០២២ គេកត់
រាជធានីភ្នំពេញ ៖ ក្រោយការប្រកាសលើកពេលស៊ីហ្គេម និងប៉ារ៉ាហ្គេមរបស់វៀតណាម ពីចុងឆ្នាំនេះរហូតដល់ឆ្នាំ២០២២ គេកត់សម្គាល់ថា កីឡាករ កីឡារិនីមិនតិចទេ បានបង្ហាញអារម្មណ៍ខកចិត្ត ដោយសារតែពួកគេយល់ថា ប្រសិនបើគ្មានការលើកពេល គឺពួកគេនឹងបានបញ្ចប់កាតព្វកិច្ចឆាប់ៗ ហើយបានទៅធ្វើការងារផ្សេងបន្ត។ យ៉ាងណាមិញ វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) បែរជាចាត់ទុកថា ការសម្រេចលើកពេលនេះ គឺជារឿងដ៏ល្អសម្រាប់កីឡាករកម្ពុជាទៅវិញ បើទោះជាអ្នកខ្លះបារម្ភថាអាចនឹងធ្វើអោយមានការពន្យារពេលសម្រាប់ស៊ីហ្គេមនៅកម្ពុជា ព្រោះបណ្ដាប្រទេសខ្លះអាចយកលេសថា ប្រកួតកៀកគ្នាពេក រៀបចំមិនទាន់។
លោក វ៉ាត់ ចំរើន ថ្លែងថា ការសម្រេចនៃការពន្យារពេល ស៊ីហ្គេម លើកទី៣១ នៅប្រទេសវៀតណាម ពីចុងឆ្នាំ២០២១ ទៅអំឡុងពាក់កណ្តាលឆ្នាំ២០២២ នឹងក្លាយជាផែនការមួយដ៏ល្អសម្រាប់ការហ្វឹកហាត់ដល់ក្រុមជម្រើសជាតិរបស់កម្ពុជា ដើម្បីឲ្យការហ្វឹកហាត់នោះ កាន់តែមានផ្លែផ្កា ព្រោះមានពេលវេលាគ្រប់គ្រាន់។
លោកថា ដោយសារការពន្យារពេលស៊ីហ្គេម នៅវៀតណាមនេះ គឺជាឱកាសល្អ ដែលកម្ពុជាយើងនៅមានពេលវេលាបន្ថែមទៀត ក្នុងការត្រៀមខ្លួនចូលរួមប្រកួតដណ្តើមមេដាយ។ លោកបន្តបន្ថែមថា ថ្វីដ្បិតតែយើងមានពេលវេលាច្រើនសម្រាប់ការចូលរួមស៊ីហ្គេម នៅប្រទេសវៀតណាម ក៏ពិតមែន ប៉ុន្តែយើងក៏បានបាត់បង់ពេលវេលាច្រើនដែរ ក្នុងការហ្វឹកហាត់ ដោយសារស្ថានភាពវិបត្តិជំងឺកូវីដ-១៩។
ជាមួយគ្នានោះ លោកអគ្គលេខាធិការលើកទឹកចិត្តឲ្យកីឡាករ កីឡាការិនីជម្រើសជាតិគ្រប់ប្រភេទកីឡាទាំងអស់បន្តកិច្ចខិតខំប្រឹងប្រែងហ្វឹកហាត់ឲ្យបានខ្លាំងក្លា ដើម្បីសម្រួចគោលដៅប្រជែងមេដាយ នៅក្នុងព្រឹត្តិការណ៍ កីឡាស៊ីហ្គេម លើកទី៣១ នៅប្រទេសវៀតណាម ដែលជាហ្គេមយុទ្ធសាស្ត្រចុងក្រោយរបស់កម្ពុជា ក្នុងការសម្រួចគោលដៅ ឆ្ពោះទៅទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ និងការប្រកួតកីឡាជនពិការ អាស៊ានប៉ារ៉ាហ្គេម លើកទី១២ ឆ្នាំ២០២៣។ ដូច្នេះហើយ ការពន្យារពេលស៊ីហ្គេម នៅវៀតណាមទៅឆ្នាំ២០២២ គឺជាឱកាសត្រៀមខ្លួនអភិវឌ្ឍគុណផលកីឡារបស់ក្រុមជម្រើសជាតិកម្ពុជា ឲ្យបានគត់មត់ និងកាន់តែល្អប្រសើរបន្ថែមទៀត។ យ៉ាងណាក៏ដោយ កីឡាករមួយចំនួនយល់ថា ប្រសិនបើគ្មានការលើកពេល គឺកាតព្វកិច្ចសម្រាប់ការចេញប្រកួតតំណាង នឹងឆាប់បញ្ចប់ ប៉ុន្តែនៅពេលមានការពន្យារពេលបែបនេះ គឺនឹងធ្វើអោយការត្រៀមខ្លួន កាន់តែអូសបន្លាយ ហើយពេលខ្លះក៏មានការប៉ះទង្គិចដល់អារម្មណ៍ដែលខំប្រុងប្រៀបផងដែរ។ ក្នុងនោះអ្នកខ្លះក៏បារម្ភខ្លាចបណ្ដាប្រទេសភាគច្រើន នឹងស្នើអោយកម្ពុជាពន្យារពេលស៊ីហ្គេមនៅឆ្នាំ២០២៣ បើទោះជាភាពជាក់ស្ដែង គឺកម្ពុជាមានសិទ្ធិសម្រេចចិត្តធំជាង។
គួរបញ្ជាក់ផងដែរថា ដោយសារហេតុផលកូវីតផ្ទុះខ្លាំង ប្រទេសទាំងអស់ដែលជាសមាជិកស៊ីហ្គេម បានឯកភាពព្រមអោយវៀតណាមលើកពេល តែការសម្រេចចិត្តនោះ ទំនងមិនប៉ះពាល់ចំណោះការរៀបចំរបស់កម្ពុជានៅឆ្នាំ២០២៣ឡើយ។ ក្នុងនោះប្រទេសភាគច្រើន ក៏បានកោតសរសើរ និងបានវាយតម្លៃខ្ពស់ថា កម្ពុជាពិតជាមានជំហរច្បាស់លាស់ និងពិតប្រាកដ នៅក្នុងការត្រៀមធ្វើម្ចាស់ផ្ទះ ឆ្នាំ២០២៣ ហើយប្រទេសទាំងអស់ រង់ចាំជួយជ្រោមជ្រែងការផ្សព្វផ្សាយ ក្នុងការបើកយុទ្ធនាការផ្សព្វផ្សាយនេះទាំងអស់គ្នានៅគ្រប់ប្រទេសទាំងអស់។ កម្ពុជាយើង មានមោទនភាពដោយយើងបានធ្វើកិច្ចការនេះមួយជំហានមុន និងមានវិធានការដ៏ច្បាស់លាស់។
ដោយឡែក ចំណុចដ៏សំខាន់មួយទៀត គឺការប្រកួតកីឡាអូឡាំពិក នៅទីក្រុងតូក្យូ ប្រទេសជប៉ុន ចាប់ពីថ្ងៃទី២៣ ខែកក្កដា ឆ្នាំ២០២១តទៅនោះ គឺថាបណ្តាប្រទេសនានាក្នុងអាស៊ីអាគ្នេយ៍ នឹងយកវិធានការទប់ស្កាត់កូវីដ-១៩ ដែលត្រូវបានចែងនៅក្នុងអូឡាំពិកអន្តរជាតិ គឺអាស៊ីអាគ្នេយ៍ទាំងមូលនឹងខិតខំរួមគ្នាប្រមែប្រមូលយកវិធានការទាំងអស់នោះ មកធ្វើជាវិធានការនៃការទប់ស្កាត់កូវីដ-១៩ យកមករៀបចំ ស៊ីហ្គេម នៅវៀតណាម ក៏ដូចជាស៊ីហ្គេម នៅកម្ពុជា ឆ្នាំ២០២៣ផងដែរ ប្រសិនបើជាស្ថានភាពវិបត្តិនៅតែមាន។ ទាំងអស់នេះ ជាគំនិត និងជាយុទ្ធសាស្ត្រចម្បង ដែលប្រទេសទាំងអស់ថា ត្រូវតែរួមគ្នាឈរឲ្យរឹងមាំ នៅក្នុងការរៀបចំព្រឹត្តិការណ៍កីឡាឲ្យបាន ទោះបីជាក្នុងដំណាក់កាលកូវីដ នៅសល់ឥទ្ធិពលខ្លះៗក៏ដោយ ប៉ុន្ដែយើងត្រូវតែនាំគ្នារៀបចំ ដើម្បីឲ្យជីវិតនៃចលនាកីឡា ចលនាអូឡាំពិក និងជួយដល់កីឡាករ កីឡាការិនី ដែលខិតខំហ្វឹកហាត់ត្រៀមប្រកួតនេះ ឲ្យសម្រេចបានដល់គោលដៅរបស់ខ្លួនប្រកបដោយក្តីមោទនៈផងដែរ។
សូមបញ្ជាក់ថា ការប្រកួតកីឡាស៊ីហ្គេម លើកទី៣១ នៅប្រទេសវៀតណាម ដែលគ្រោងនឹងរៀបចំចុងឆ្នាំ២០២១ ត្រូវបានពន្យារពេលទៅរៀបចំនាចុងខែមេសា ដល់ដើមខែឧសភា ឆ្នាំ២០២២ ដោយគណៈអចិន្ត្រៃយ៍ស៊ីហ្គេម បានឯកភាពគ្នា ក្រោមការសម្របសម្រួល និងសម្រេចចិត្តយ៉ាងផុលផុស ជាពិសេសគឺបានការឯកភាពគ្នាទាំងស្រុង ក្នុងការជួយគ្នាទៅវិញទៅមក ជួយបន្ធូរបន្ថយស្ថានភាពតានតឹងនៃវិបត្តិជំងឺកូវីដ-១៩នេះ។ ម្ចាស់ផ្ទះស៊ីហ្គេមវៀតណាម នឹងកំណត់ការបរិច្ឆេទច្បាស់លាស់ ឆាប់ៗខាងមុខនេះ ថាតើពីថ្ងៃណាដល់ថ្ងៃណា ក្នុងចន្លោះខែមេសា ដល់ខែឧសភា ក្នុងឆ្នាំ២០២២ ជូនក្រុមប្រឹក្សាកីឡាអាស៊ីអាគ្នេយ៍ ក្រោយដាក់សំណើនេះជូនដល់រដ្ឋាភិបាលរបស់ខ្លួន៕
ចែករំលែកព័តមាននេះ